លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានមានប្រសាសន៍ថា ក្នុងឱកាសជួបពិភាក្សាការងារជាមួយថ្នាក់ដឹកនាំ និង មន្ត្រីរាជការនៃមន្ទីរសុខាភិបាលខេត្ត និងមន្ទីរពេទ្យបង្អែកខេត្តសៀមរាប កាលពីរសៀលថ្ងៃទី០៤ ខែតុលា ឆ្នាំ២០១៨ម្សិលមិញនេះ ឯកឧត្តម វីលៀម ហេដន៍( William A.Heidt ) ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា បានសម្តែងនូវភាពរីករាយ និង មានការភ្ញាក់ផ្អើល ចំពោះសកម្មភាពបម្រើសេវារបស់ថ្នាក់ដឹកនាំ មន្ត្រី និបុគ្គលិកក្នុងមន្ទីរពេទ្យនេះ ថាមានសកម្មភាពមមាញឹក និងហ្មត់ចត់ក្នុងកិច្ចរបស់ខ្លួន ហើយឯកឧត្តមឯកអគ្គរដ្ឋ សន្យាថា នៅតែបន្តសហការជួយដល់មន្ទីរពេទ្យនេះជាបន្តទៀត ទោះបីជា ឯកឧត្តម នឹងត្រូវផុតអាណត្តិជាឯកអគ្គរដ្ឋទូតប្រចាំប្រទេសកម្ពុជា ក្នុងពេលខាងមុខក៏ដោយក្តី។
លោក ក្រុស សារ៉ាត់ មានប្រសាសន៍ថា គោលបំណងដែលឯកឧត្តមឯកអគ្គរដ្ឋ អញ្ជើញមកនៅពេលនេះ គឺដើម្បីពិភាក្សាការងារ និងស្វែងយល់អំពីការរីកចម្រើនផ្នែកសុខាភិបាល ជាពិសេសក្រៅពីអគារផ្តល់ឈាម ដែលជាអំណោយរបស់ប្រជាជនសហរដ្ឋអាមេរិកផ្តល់ឲ្យតាមរយៈ ឯកឧត្តមកាលពីបីឆ្នាំមុននោះ តើមន្ទីរពេទ្យខេត្តនេះ ត្រូវការអ្វីបន្ថែមទៀត ដោយមិនចំពោះតែអគារនិងសេវាផ្តល់ឈាមនេះទេ ហើយឯកឧត្តមនឹងកត់ត្រាទុកសម្រាប់ផ្តល់ជាអនុសាសន៍ដល់ឯកអគ្គរដ្ឋទូតអាណត្តិក្រោយ ឲ្យបន្តជួយគាំទ្រ និងសហការជាបន្តទៅទៀត ដើម្បីឲ្យការបម្រើសេវាក្នុងមន្ទីរពេទ្យនេះកាន់តែល្អប្រសើរជាងនេះថែមទៀត និង ធានាមិនឲ្យខ្វះឈាមប្រើប្រាស់ជួយជីវិតក្នុងមន្ទីរពេទ្យ ដោយមិនបង់ថ្លៃ ។
លោកប្រធានមន្ទីរសុខាភិបាលខេត្តសៀមរាប មានប្រសាសន៍បន្ថែមទៀតថា ក្នុងឱកាសនោះដែរ ឯកឧត្តម វីលៀម ហេដន៍ បានទទួលយកសំណើទាំងអស់របស់លោក ដើម្បីផ្តល់អនុសាសន៍ដល់ឯកអគ្គរដ្ឋទូតជាអ្នកក្រោយ ចាត់ចែងបន្ត ដែលសំណើទាំងនោះរួមមាន ៖ សុំបន្តជួយសាងសង់អគារមួយជាន់ ឬពីរជាន់បន្ថែមពីលើអគារដែលមានស្រាប់របស់ស្ថានទូតអាមេរិកបានផ្តល់ឱ្យកាលពីបីឆ្នាំមុន ព្រោះអគារនោះ បានបុកគ្រឹះ និងចាក់ពិដានបេតុងបម្រុងរួចហើយ តែពុំទាន់មានលទ្ឋភាពអាចសង់បន្តទៅលើទៀតបាន ដើម្បីទុកសម្រាប់ដាក់អ្នកជំងឺពាក់ព័ន្ឋទៅនឹងប្រព័ន្ឋឈាម , ស្នើសុំជួយសាងសង់អគារមួយទៀត សម្រាប់អ្នកជំងឺមិនឆ្លងជាប្រភេទជំងឺរ៉ាំរ៉ៃ កើតមានទៅលើមនុស្សមានវ័យចំណាស់ ដូចជាជំងឺលើសឈាម , ជំងឺបេះដូង និង ទឹកនោមផ្អែមជាដើម។
សូមបញ្ជាក់ថា បច្ចុប្បន្ននេះ មន្ទីរសុខាភិបាលខេត្តសៀមរាប កំពុងទទួលធ្វើជាទីភ្នាក់ងារប្រតិបត្តិការពិសេស កំពុងប្រត្តិបត្តិការលើមន្ទីរពេទ្យបង្អែកស្រុកចំនួន៤និងមន្ទីរពេទ្យបង្អែកខេត្ត ដែលទីភ្នាក់ងារប្រតិបត្តិការពិសេសនេះ ទទួលគម្រោងថវិកាពីអង្គការអន្តរជាតិ តាមរយៈគម្រោងពង្រឹងទ្រទ្រង់ប្រពន្ឋ័វិស័យសុខាភិបាល និងគម្រោងថវិកាមូលនិធិសមធម៌សម្រាប់ជួយដល់ប្រជាពលរដ្ឋក្រីក្រ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
