កាលពីថ្ងៃទី០៤ ខែតុលា ឆ្នាំ២០១៨ ម្សិលមិញនេះ កម្លាំងនគរបាលការិយាល័យប្រឆាំងគ្រឿងញៀនខេត្តសៀមរាប បានកសាងសំណុំរឿង បញ្ជូនយុវជនចំនួន៤នាក់ ដែលជាប់សង្ស័យពាក់ព័ន្ធនឹងករណីគ្រឿងញៀន រួមជាមួយនឹងវត្ថុតាង រួមមានវត្ថុតាងមានម្សៅមេតំហ្វេតាមីនប្រភេទទឹកកកចំនួន០៣កញ្ចប់ ស្មើនឹងទំងន់០.៤ក្រាម ទាំងសំបក និង ទូរស័ព្ទដៃចំនួន០៣គ្រឿង ទៅសាលាដំបូងខេត្ត ដើម្បីចាត់ការទៅតាមនីតិវិធីនៃច្បាប់ បន្ទាប់ពីកម្លាំងនគរបាលការិយាល័យប្រឆាំងគ្រឿងញៀន សហការជាមួយកម្លាំងនគរបាលប៉ុស្តិ៍រដ្ឋបាលសង្កាត់ស្វាយដង្គំ ក្រុងសៀមរាប ចុះបង្ក្រាបបទរក្សាទុក និងចាត់ចែងឲ្យប្រើប្រាស់ដោយខុសច្បាប់នូវសារធាតុញៀន នៅចំនុចភូមិស្វាយដង្គំ សង្កាត់ស្វាយដង្គំ និងចំនុចភូមិគោកដូង សង្កាត់ទឹកវិល ក្រុងសៀមរាប កាលពីថ្ងៃទី០២ និងថ្ងៃទី០៣ ខែតុលា ឆ្នាំ២០១៨កន្លងទៅនេះ ។
យុវជនទាំង៤នាក់នេះ រួមមាន ៖០១. ឈ្មោះ ម៉ៅ សិលា ហៅខ្លា ភេទប្រុស ឆ្នាំកំណើត១៩៩៨ មុខរបរជាងផ្សារដែក មានទីលំនៅភូមិខ្នារ សង្កាត់ជ្រាវ ក្រុងសៀមរាប ជាប់សង្ស័យពាក់ព័ន្ធនឹងករណីរក្សាទុកចាត់ចែងនិងប្រើប្រាស់ ហើយមានសារធាតុញៀនក្នុងខ្លួន , ០២. ឈ្មោះ ស៊ិន ផារិទ្ធ ភេទប្រុស ឆ្នាំកំណើត១៩៩៩ មុខរបរជាងផ្សារដែក មានទីលំនៅភូមិខ្នារ សង្កាត់ជ្រាវ ជាប់សង្ស័យពាក់ព័ន្ធនឹងករណីរក្សាទុកនិងចាត់ចែង ហើយមានសារធាតុញៀនក្នុងខ្លួន , ០៣. ឈ្មោះ លន់ ផល្លា ភេទប្រុស ឆ្នាំកំណើត២០០០ មុខរបរគ្មាន មានទីលំនៅភូមិគោកស្នួល សង្កាត់ទឹកវិល ក្រុង សៀមរាប ជាប់សង្ស័យពាក់ព័ន្ធនឹងករណីសមគំនិតជួញដូរនិងប្រើប្រាស់ ហើយមានសារធាតុញៀនក្នុងខ្លួន និង ០៤. ឈ្មោះ ស៊ា សំអាត ភេទប្រុស ឆ្នាំកំណើត២០០១ មុខរបរគ្មាន មានទីលំនៅភូមិស្ពឺ(ក) ឃុំជយោ ស្រុកចំការលើ ខេត្តកំពង់ចាម ជាប់សង្ស័យពាក់ព័ន្ធនឹងករណីរក្សាទុកនិងជួញដូរ ហើយមានសារធាតុញៀនក្នុងខ្លួន ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
