នៅព្រឹកថ្ងៃទី ៥ ខែតុលា ឆ្នាំ២០១៨នេះ សាខាកាកបាទក្រហមកម្ពុជាខេត្តសៀមរាប សហការជាមួយយុវជនកាកបាទក្រហមកម្ពុជា អ្នកស្ម័គ្រចិត្ត អាជ្ញាធរមូលដ្ឋាន មន្ត្រីប៉ុស្តិ៍នគរបាលសង្កាត់ទឹកវិល បានបើកយុទ្ធនាការសម្រួលសុវត្ថិភាពចរាចរណ៍ និងចែកខិតប័ណ្ណ ដល់បងប្អូនសាធារណៈជនដែលកំពុងធ្វើដំណើរតាមដងផ្លូវជាតិលេខ៦ ត្រង់ចំណុចផ្លូវចូលទៅកាន់រមណីយដ្ឋានបារាយណ៍ទឹកថ្លា ក្នុងសង្កាត់ទឹកវិល ក្រុងសៀមរាប ក្នុងគោលបំណងចូលរួមកាត់បន្ថយអត្រាស្លាប់ និងរបួសដោយគ្រោះថ្នាក់ចរាចរណ៍ នៅរដូវបុណ្យភ្ជំបិណ្ឌ និងបានពន្យល់ណែនាំនិងសំណូមពរដល់អ្នកធ្វើដំណើរ ឱ្យពួកគាត់បានយល់អំពីវិធីពាក់មួកសុវត្ថិភាព និងជម្រុញដល់ពួកគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ជាដើម។ល។
លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប មានប្រសាសន៍ថា បច្ចុប្បន្ននេះ គ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានធ្វើឱ្យបាត់បង់ធនធានមនុស្ស ហើយបន្សល់ទុកនៅកុមារកំព្រា ស្ត្រីមេម៉ាយ ជនពិការ ប៉ះពាល់ដល់សេដ្ឋកិច្ចគ្រួសារ សេដ្ឋកិច្ចសង្គមជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវ មិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរ។
លោក ស៊ុ សំអន មានប្រសាសន៍ទៀតថា តាមរយៈនេះ សំណូមពរដល់អ្នកបើកបរយាន្តយន្តគ្រប់ប្រភេទ សូមមេត្តាចូលរួមគោរពច្បាប់ចរាចរណ៍ទាំងអស់គ្នា សូមកុំបើកវ៉ាជែង សូមកុំបើកបរនៅពេលស្រវឹង កុំបើកបរពេលងងុយដេក ត្រូវចេះអធ្យាស្រ័យនិងយោគយល់រាល់ពេលបើកបរ ទើបយើងទទួលបានសុខសុវត្ថិភាពទាំងអស់គ្នា។
បើតាមរបាយការណ៍របស់សាខាកាកបាទក្រហមកម្ពុជាខេត្ត បានបង្ហាញថា ក្នុងរយៈពេល៩ខែឆ្នាំ២០១៨ គ្រោះថ្នាក់ចរាចរណ៍កើតឡើង៥៨ករណី បណ្តាលឱ្យមនុស្សស្លាប់ចំនួន៧១នាក់ ស្រី១៥នាក់ , រងរបួសធ្ងន់៤៣នាក់ , របួសស្រាល៥១នាក់ , ខូចខាតម៉ូតូស្រាលនិងធ្ងន់ចំនួន៤០គ្រឿង , ខូចរថយន្តទាំងធុនធំនិងធុនតូច ស្រាលធ្ងន់ចំនួនជាង៤០គ្រឿង ដែលគ្រោះថ្នាក់នេះ បណ្តាលមកពីការបើកបរហួសល្បឿនកំណត់ , ការបើកបរក្នុងស្ថានភាពស្រវឹង , ការបើកបរវ៉ាជែងនិងមិនប្រកាន់ស្តាំ និង ការបើកបរក្នុងស្ថានភាពងងុយដេក ជាដើម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
