នៅព្រឹកថ្ងៃទី០៤ ខែតុលា ឆ្នាំ២០១៨ម្សិលមិញនេះ សាខាកាកបាទក្រហមកម្ពុជាខេត្តសៀមរាប ដឹកនាំដោយលោក ស៊ុ សំអន នាយកសាខា បានអញ្ជើញជួបសំណេះសំណាលសួរសុខទុក្ខជាមួយព្រឹទ្ធាចារ្យនិវត្តជនចំនួន ៣រូប ដែលធ្លាប់បម្រើការងារមនុស្សធម៌យ៉ាងសកម្មជាមួយសាខាកាកបាទក្រហមកម្ពុជាខេត្តសៀមរាប នៅតាមលំនៅដ្ឋានរបស់ពួកគាត់នៅក្នុងក្រុងសៀមរាប។
ក្នុងនោះមាន ៖ ១. លោកតា ទួន ទេស អាយុ៩២ឆ្នាំ បានបម្រើការងារមនុស្សធម៌អស់រយៈពេល២២ឆ្នាំ និងជាអ្នករួមចំណែកកសាងឧទ្យានសហស្សវត្សរ៍ កាកបាទក្រហមកម្ពុជា , ២. លោកតា កង រឿន អាយុ ៨៣ឆ្នាំ បានបម្រើការងារមនុស្សធម៌ អស់រយៈពេល២២ឆ្នាំ និង ៣. លោកតា ម៉ៅ វ៉ន អាយុ ៨០ឆ្នាំ បានបម្រើការងារមនុស្សធម៌ អស់រយៈពេល១៩ឆ្នាំ ព្រមទាំងបានចែកអំណោយមនុស្សធម៌ជូនពួកគាត់ ដែលក្នុងម្នាក់ៗទទួលបាន៖ មុងសុវត្ថិភាព ១ , មី១កេស , ទឹកដោះគោឆៅ ២យួរ , ស្ករស កន្លះគីឡូក្រាម និងថវិកា ១សែនរៀល ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
