ឯកឧត្តម លឹម សុថាវ អគ្គលេខាធិការគណៈវិស្វករកម្ពុជា បានមានប្រសាសន៍ថា ប្រសិនបើអ្នកមានអាជីពការងារជាវិស្វករ ហើយមិនបាន ឬក៏យឺតយូរក្នុងការចុះបញ្ជីនៅគណៈវិស្វករកម្ពុជានោះ អ្នកប្រកបរបរនេះ នឹងខាតបង់ប្រយោជន៍ច្រើន ព្រោះថា គណៈវិស្វករកម្ពុជា គឺជាស្ពានចម្លងមួយដែលនឹងនាំវិស្វករកម្ពុជា ទៅកាន់ទីផ្សារអន្តរជាតិ ក្នុងភាពស្មើមុខស្មើមាត់ជាមួយបណ្តាវិស្វករបរទេស ពិសេសនៅពេលដែលសមាហរណកម្មអាស៊ានមកដល់នាពេលខាងមុខនេះ ប្រសិនបើអ្នកប្រកបអាជីពមិនបានចុះបញ្ជី ជាវិស្វករនៅគណៈវិស្វករកម្ពុជាទេ នោះអ្នកនឹងមិនទទួលបានការទទួលស្គាល់ជាវិស្វករអាស៊ានដែរ ។
ឯកឧត្តមានប្រសាសន៍ទៀតថា គណៈវិស្វករកម្ពុជាបានបង្កើតឡើងនៅថ្ងៃទី០៧ ខែមេសា ឆ្នាំ២០០៩ ហើយការបង្កើតនេះ ក្នុងគោលបំណងដើម្បីប្រមូលផ្តុំ និងគ្រប់គ្រងវិស្វករកម្ពុជា ។
ឯកឧត្ត លឹម សុថាវ មានប្រសាសន៍យ៉ាងនេះ ក្នុងឱកាសបើកសិក្ខាសាលា ស្តីពីសារប្រយោជន៍នៃការចុះបញ្ជីនៅគណៈវិស្វករកម្ពុជា នៅសាលប្រជុំសាលាខេត្តសៀមរាប នារសៀលថ្ងៃទី០៣ ខែតុលា ឆ្នាំ២០១៨ ម្សិលមិញនេះ ។
ព័ត៌មានជាតិ ថ្មីៗ
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ការចុះបញ្ជីនេះ នឹងធ្វើឲ្យគុណភាពនៃការប្រតិបត្តិជំនាញរបស់វិស្វករជាតិមានលក្ខណៈចំនួន២ គឺទី១. ស្តង់ដារ និង ទី២. ធ្វើឲ្យមានសីលធម៌វិជ្ជាជីវៈល្អ ដើម្បីទទួលឱកាសការងារទូលំទូលាយ និងចុះសម្រុងក្នុងសង្គម ដូច្នេះលក្ខណៈទាំងពីរនេះ គឺជាសេចក្តីត្រូវការធនធានវិស្វករពិតប្រាកដ ដើម្បីការអភិវឌ្ឍជាតិ និងទុកចិត្តពីអតិថិជនដែលត្រូវការផ្នែកវិស្វកម្ម ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
