មានប្រសាសន៍ក្នុងកិច្ចប្រជុំសាមញ្ញលើកទី៥៣ របស់ក្រុមប្រឹក្សាខេត្តសៀមរាប កាលពីថ្ងៃទី៤ ខែតុលា ឆ្នាំ២០១៨នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តស្តីទី បានធ្វើការជំរុញឱ្យអាជ្ញាធរខេត្ត មន្ទីរស្ថាប័នពាក់ព័ន្ឋ និងក្រុងស្រុកក្នុងខេត្តសៀមរាប ត្រូវបង្កើនការយកចិត្តទុកដាក់ត្រួតពិនិត្យទៅលើភាពអវិជ្ជមានមួយចំនួនដែលបានកើតឡើងនៅក្នុងខេត្ត ជាពិសេសក្នុងក្រុងសៀមរាប។
ដូចជាបញ្ហាបណ្តាញផ្លូវថ្នល់ខូចខាតក្រហេងក្រហូង , បញ្ហាការផលិតទឹកបរិសុទ្ឋអនាធិបតេយ្យគ្មានបច្ចេកទេសត្រឹមត្រូវ និង ជំរុញឱ្យមានការចិញ្ចឹមសត្វគោក្របីនៅតាមមូលដ្ឋាន សម្រាប់បង្កើនការប្រើប្រាស់ក្នុងការអូសទាញ និងភ្ជួររាស់លើការងារបង្កបង្កើនផលស្រូវ ព្រមទាំងបានលាមកសម្រាប់ធ្វើជាជីដាក់លើដំណាំ ខណៈបច្ចុប្បន្នសត្វគោក្របីនេះ ចេះតែថយចុះទៅៗ ហើយប្រើប្រាស់គ្រឿងយន្តកសិកម្មច្រើនជំនួសសត្វគោក្របី ជាហេតុបណ្តាលឱ្យដីទៅជារឹងខ្សោះជីជាតិ ដោយសារប្រើជីគីមីច្រើន ។
ក្នុងឱកាសនោះដែរ ឯកឧត្តម អ៊ឹង ហឿន ក៏បានសម្ដែងនូវការកោតសរសើរ ចំពោះស្នាដៃអនុវត្តន៍បានល្អរបស់មន្ត្រី ថ្នាក់ដឹកនាំមន្ទីរ អង្គភាព អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធទាំងបីប្រភេទរបស់ខេត្តសៀមរាប ដែលរយៈកាលកន្លងមក បានសហការគ្នា ខិតខំយកចិត្តទុកដាក់ខ្ពស់លើការងារសន្តិសុខ សណ្តាប់ធ្នាប់របៀបរៀបរយសាធារណៈ ធានាបាននូវសន្តិសុខ សុខសុវត្ថិភាព ជូនដល់ប្រជាពលរដ្ឋនិងភ្ញៀវជាតិនិងអន្តរជាតិដែលមកកំសាននិងស្នាក់នៅក្នុងខេត្តសៀមរាប ។
សូមបញ្ជាក់ថា កិច្ចប្រជុំសាមញ្ញលើកទី៥៣ របស់ក្រុមប្រឹក្សាខេត្តសៀមរាប នៅថ្ងៃទី៤ ខែតុលានេះ គឺដើម្បីពិនិត្យ ពិភាក្សា និង អនុម័តទៅលើ របៀបវារៈ ចំនួន០៤ចំណុច រួមមាន៖
១ -ពិនិត្យ និងអនុម័តសេចក្ដីព្រាងកំណត់ហេតុកិច្ចប្រជុំសាមញ្ញ លើកទី៥២ របស់ក្រុមប្រឹក្សាខេត្ត ។
២ -ពិនិត្យ ពិភាក្សា និងអនុម័តសេចក្ដីព្រាងរបាយការណ៍ ស្ដីពីការអនុវត្តការងារប្រចាំខែកញ្ញា ឆ្នាំ២០១៨ ស្តីពីការអនុវត្តការងារ របស់រដ្ឋបាលខេត្ត ។
៣ -ពិនិត្យ ពិភាក្សា និងអនុម័តលើសេចក្តីព្រាងប្រតិទិនកសាងកម្មវិធីវិនិយោគ បីឆ្នាំរំកិល ២០១៩- ២០២១ របស់រដ្ឋបាលខេត្ត ។
៤-ពិនិត្យ ពិភាក្សា និងអនុម័តលើសេចក្តីព្រាងសេចក្តីសម្រេចស្តីពីការបង្កើតគណៈកម្មការដឹកនាំ រៀបចំវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្ត ស្តីពីការរៀបចំធ្វើវេទិកាសាធារណៈរបស់ក្រុមប្រឹក្សាខេត្តប្រចាំឆ្នាំ នៅក្នុងត្រីមាសទី៤ ឆ្នាំ២០១៨ ដែលបានកំណត់ដោយច្បាប់ ស្តីពីគ្រប់គ្រងរដ្ឋបាលរាជធានី ខេត្ត សមាជិក សមាជិកាបាន អនុម័តលើកំណត់ហេតុ កិច្ចប្រជុំសាមញ្ញលើកទី៥២ ព្រមទាំងបានពិនិត្យផ្តោតសំខាន់ ទៅលើលទ្ធផលនៃរបាយការណ៍ប្រចាំខែកញ្ញា ឆ្នាំ២០១៨ ព្រមទាំងពិនិត្យពិភាក្សា និង អនុម័តលើសេចក្ដីព្រាងស្តីពីការបង្កើតគណៈកម្មការដឹកនាំ រៀបចំវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តអាណត្តិទី២ឆ្នាំ២០១៨ ដោយការកំណត់គោលដៅតាមបណ្តាស្រុកមួយចំនួនជាអាទិភាពឆ្នាំ២០១៨ របស់ក្រុមប្រឹក្សា ខេត្តផងដែរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
