នាព្រឹកថ្ងៃទី២១ ខែកញ្ញា ឆ្នាំ២០១៩ ឯកឧត្តម អ៊ឹង ហឿន ប្រធាមក្រុមប្រឹក្សាខេត្តសៀមរាប បានអំពាវនាវដល់ប្រជាពលរដ្ឋទាំងអស់ឱ្យរួមគ្នាថែរក្សា សុខសន្តិភាព បានស្ថិតស្ថេរគង់វង្ស សំដៅបន្តជំរុញល្បឿនការអភិវឌ្ឍប្រទេសជាតិឱ្យកាន់តែមានការ រីកចម្រើនថែម ទៀតនោះ។
ការថ្លែងយ៉ាងដូច្នេះក្នុងឱកាសឯកឧត្តម បាន អញ្ជើញចូលរួមកាន់បិណ្ឌវេនទី៨ នៅវត្តចន្ទរាម ហៅវត្តត្រកៀត ភូមិត្រគៀក ឃុំមុខម៉ែន ស្រុកពួកខេត្តសៀមរាប។
ឯកឧត្តម អ៊ឹង ហឿន បានថ្លែងទៀតថា បុណ្យភ្ជុំបិណ្ឌ ជាបុណ្យមួយដ៏ធំនៃប្រពៃណីទំនៀមទម្លាប់ជាតិខ្មែរដែលអ្នកកាន់ព្រះពុទ្ធសាសនាគោរពប្រតិបត្តិតាំងពីដូនតារៀងមក។ ម្យ៉ាងទៀតពិធីកាន់ បិណ្ឌនេះពុទ្ធបរិស័ទ ពុទ្ធសាសនិកខ្មែរយើង បានប្រារព្ធធ្វើឡើងចាប់ពីថ្ងៃ១រោច ខែភទ្របទ ដល់ថ្ងៃ១៥រោច ខែភទ្របទ ដែលបងប្អូនជាមន្ត្រី រាជការ អ្នកមុខអ្នកការ ពុទ្ធបរិស័ទ ប្រជាពុទ្ធបរិស័ទ ជិតឆ្ងាយ បានមកជួបជុំគ្នានាំយកចង្ហាន់ ចំណីអាហារ ទៀនធូប បច្ច័យទៅប្រគេន ព្រះសង្ឃគង់ចាំព្រះវស្សា នៅតាមទីវត្តអារាមនានា
។
បន្ទាប់ពីការគោរពថ្វាយភួងផ្កាបូជាទៀនធូបចំពោះព្រះពុទ្ធរូបព្រះសម្មាសម្ពុទ្ធ និងនមស្សការព្រះរតនៈត្រៃតាមគន្លងព្រះពុទ្ធសាសនា និងពិធីរាប់បាត្ររួចមក ឯកឧត្តមមានប្រសាសន៍សំណេះសំណាលទៅកាន់ព្រះសង្ឃ តាជីយាយជី ប្រជាពុទ្ធបរិស័ទ ជិតឆ្ងាយដែលបានចូលរួមនាឱកាសនោះថា ការគោរពធ្វើបុណ្យភ្ជុំបិណ្ឌនេះឡើង ដើម្បីឧទ្ទិសកុសលផលបុណ្យជូនដល់ វិញ្ញាណក្ខន្ធមាតាបិតាជីដូនជីតាញាតិការទាំងប្រាំពីរ សណ្តានបុព្វការីជនដែលបាន ចែកឋានទៅកាន់លោកខាងមុខ និងដួងវិញ្ញាណក្ខន្ធកម្មាភិបាល យុទ្ធជនយុទ្ធនារីដែលបាន ពលីជីវិតក្នុងបុព្វហេតុរំដោះជាតិមាតុភូមិនិងការពារអភិវឌ្ឍន៍ប្រទេសជាតិ។
ឯកឧត្តមបានគូសបញ្ជាក់ថា ប្រជាពុទ្ធបរិស័ទទាំងអស់ដែល បានជួបជុំគ្នាមានឱកាសបានធ្វើបុណ្យទានយ៉ាងសប្បាយរីករាយ នាពេលនេះក៏ដោយសារតែ ប្រទេសជាតិរបស់យើងមានសុខសន្តិភាពពេញលេញក្នុងការរស់នៅមានការអភិវឌ្ឍរីកចម្រើន សម្បូរសប្បាយ។ កត្តានាំ ឱ្យមានសន្តិភាព និងការអភិវឌ្ឍនេះក៏ដោយសារតែ គោលនយោបាយដ៏ត្រឹមត្រូវរបស់គណបក្សប្រជាជនកម្ពុជា និងរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានបញ្ចប់សង្គ្រាមទាំងស្រុងដឹកនាំកសាងប្រទេសជាតិឆ្ពោះទៅរកសុខសន្តិភាពនិងអភិវឌ្ឍន៍លើគ្រប់វិស័យទាំងវិស័យពុទ្ធចក្រនិងអាណាចក្រ។
ឯកឧត្តមបន្តទៀតថា វិស័យពុទ្ធសាសនាជាសាសនារបស់រដ្ឋ ប្រជាពលរដ្ឋគោរព ប្រតិបត្តិបានដើរតួនាទីយ៉ាងសំខាន់ក្នុងចូលរួមចំណែកកសាងសុខសន្តិភាពក្នុងប្រទេសជាតិយើង។ ក្នុងពិធីកាន់បិណ្ឌនេះ ឯកឧត្តម លោកជំទាវ ព្រមទាំងអស់លោក លោកស្រីជាដឹកនាំក្នុងខេត្ត និង ពុទ្ធបរិស័ទ បានធ្វើការវេរប្រគេននូវទ័យ្យទានវត្ថុដល់ព្រះសង្ឃ ដើម្បីសម្រាប់ប្រើប្រាស់នៅ ក្នុងពេលព្រះសង្ឃគង់ចាំព្រះវស្សា ក្នុងទីវត្តប្រាសាទគោកចក រួមមានអង្ករ ២៥០គក្រ មី០៥កេស ទឹកក្រូច១០កេស, ទឹកត្រី ០៤យួរ, ទឹកស៊ីអ៊ីវ០៤យួរ, ទឹកសុទ្ធ ១០កេស, ត្រីខ ១កេស , ស្ករស១០គក្រ និង ទឹកដោះគោ ០១កេស តែ៥កញ្ចប់ និង បច្ច័យចំនួន ២លានរៀល និង សីលវ័ន្ត សីលវន្តី ម្នាក់ៗក្រណាត់ស១ដុំ បច្ច័យ១ម៉ឺនរៀល ព្រមទាំងបានធ្វើពិធីរាប់បាត្រ បង្សុកូលឧទ្ទិសកុសលផលបុណ្យជូនដល់ដួងវិញ្ញាណក្ខ័ន្ត បងប្អូនជនរងគ្រោះក្នុងរបបប្រល័យពូជសាសន៍ នឹងសូមឲ្យអំណាចនៃអានិសង្ឃ នេះជួយទ្រទ្រង់ឲ្យវិញ្ញាណក្ខ័ន្តអ្នកទាំងនោះ បានទៅកាន់ទីសោយសុខឋានបរមសុខកុំបីឃ្លៀងឃ្លាត ក្នុងឋានសុគតិភពកុំបីខានឡើយ ។
នៅឱកាសនោះដែរក្នុងនាមអាជ្ញាធរខេត្តសៀមរាប ឯកឧត្តមក៏បាននាំយកនូវអំណោយរបស់សម្តេចពិជ័យសេនា ទៀ បាញ់ និង លោកជំទាវ ចែកជូនដល់បងប្អូនប្រជាពលរដ្ឋក្រីក្រ និង ងាយរងគ្រោះ ចំនួន៣៨០គ្រួសារ មកពីឃុំចំនួន ៥របស់ស្រុកពួក ដោយក្នុង មួយគ្រួសារ ទទួលបានអង្ករ ២០គក្រផងដែរ ។ ក្នុងការសំណេះសំណាលនោះដែរ ឯកឧត្តម អ៊ឹង ហឿន ក៏បានពាំនាំនូវការសួរសុខទុក្ខ ពីសំណាក់សម្តេចតេជោ ហ៊ុន សែន និង សម្តេចកតិ្តព្រឹទ្ធបណ្ឌិត និងសម្តចពិជ័យសេនា ឯកឧត្តមអភិបាលខេត្ត ក្នុងឱកាសបុណ្យភ្ជុំបិណ្ឌនេះ ដោយបានយកចិត្តទុកដាក់ខ្ពស់ពីសុខទុក្ខរបស់បងប្អូនប្រជាពលរដ្ឋខ្វះខាត និង ងាយរងគ្រោះ ។ ជាសំខាន់កន្លងមកនេះ ប្រមុខរាជរដ្ឋាភិបាលកម្ពុជា ក៏បានផ្តល់នូវស្រូវពូជ រួមទាំងសម្ភារៈប្រើប្រាស់ ដែលផ្តល់តាមរយៈក្រសួងកសិកម្ម និង មន្ទីរសង្គមកិច្ច អតីតយុទ្ធជន និង យុវនីតិសម្បទាខេត្តផងដែរ ៕
