នៅរដ្ឋបាលសាលាខេត្តសៀមរាប នាព្រឹកថ្ងៃទី២៣ ខែ កញ្ញា ឆ្នាំ២០១៩នេះ ក្រុមប្រឹក្សាខេត្តសៀមរាប អាណត្តិទី៣ បានបើកកិច្ចប្រជុំសាមញ្ញលើកទី៤ ក្រោមកិច្ចដឹកនាំប្រជុំរបស់ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង លោកលី សំរឹទ្ធ អភិបាលស្តីទី នៃគណៈអភិបាលខេត្តសៀមរាប ដោយមានការអញ្ជើញ ចូលរួមពីសំណាក់ឯកឧត្តម លោកជំទាវ ជាសមាជិក សមាជិកាក្រុមប្រឹក្សាខេត្ត អាជ្ញាធរអប្សរា និង លោក លោកស្រី ជាថ្នាក់ដឹកនាំមន្ទីរ ស្ថាប័ន អង្គភាពជុំវិញខេត្ត អាជ្ញាធរក្រុង នាយករដ្ឋបាលសាលាខេត្ត ទីចាត់ការ និង អង្គភាពទាំង ៦ របស់សាលាខេត្ត ដើម្បីពិនិត្យ ពិភាក្សា និង អនុម័តទៅលើរបៀបវារៈសម័យប្រជុំសាមញ្ញ លើកទី៤ ។
ក្នុងដំណើរនៃកិច្ចប្រជុំនេះ សមាជិកក្រុមប្រឹក្សាខេត្ត បានពិនិត្យ ពិភាក្សា និងធ្វើអនុម័តទៅលើ ៖ ១. កំណត់ហេតុនៃកិច្ច ប្រជុំសាមញ្ញលើកទី៣ របស់ក្រុមប្រឹក្សាខេត្ត អាណត្តិទី៣ , ២. របាយការណ៍ប្រចាំខែ សីហា ឆ្នាំ២០១៩ របស់រដ្ឋបាលខេត្ត , ៣. ពិនិត្យ ពិភាក្សា និង អនុម័តលើប្រតិទិន ស្តីពីការរៀបចំកសាងផែនការអភិវឌ្ឍរយៈពេល៥ឆ្នាំ(២០២០.២០២៤) និង លើវិសោធនកម្ម កម្មវិធី វិនិយោគ០៣រំកិល (២០១៩.២០២១) និង ៥. ពិនិត្យ ពិភាក្សា និង អនុម័តលើគោលការណ៍ណែនាំ ផ្នែកគោលនយោបាយ នៃការរៀបចំ កសាងផែនការអនុវត្តរយៈពេល ០៥ឆ្នាំ (២០២០.២០១២៤) របស់រដ្ឋបាលខេត្តសៀមរាប ។
ក្នុងឱកាសនោះ ឯកឧត្ដមសមាជិកក្រុមប្រឹក្សាខេត្តបានលើកឡើងនូវបញ្ហាមួយចំនួន ដែលជំរុញឲ្យអាជ្ញាធរខេត្ត និង អង្គភាពពាក់ព័ន្ធទាំងអស់យកចិត្តទុកដាក់ និង អនុវត្តឲ្យមានប្រសិទ្ធភាព ដូចជាបញ្ហាចរាចរណ៍ , ការជំរុញអ្នកដែលគ្រប់អាយុឲ្យទៅចុះឈ្មោះបោះឆ្នោត , ការងារចំណូលចំណាយ និង បញ្ហាផ្លូវខូចដោយសារលិចទឹកដែលមិនអាចធ្វើចរាចរណ៍បានចំពោះរថយន្តធុនធ្ងន់ លើកំណាត់ផ្លូវពីឃុំស្រែណូយទៅសាលាស្រុកវ៉ារិន ។
ជាការឆ្លើយតបលោក លី សំរឹទ្ធ បានអនុញ្ញាតឲ្យបណ្តាមន្ទីរ ជំនាញពាក់ព័ន្ធ បានធ្វើការបកស្រាយបំភ្លឺនូវគ្រប់រាល់បញ្ហាដែលសមាជិកក្រុមប្រឹក្សាខេត្តបានលើកឡើង ពិសេសលោក លី សំរឹទ្ធ បានណែនាំដល់មន្ត្រីនៅសាលាខេត្ត ត្រូវធ្វើការទំនាក់ទំនងទៅរដ្ឋបាលស្រុកវ៉ារិន ដើម្បីសហការគ្នាធ្វើការជួសជុលផ្លូវខូចដោយសារលិចទឹកលើកំណាត់ផ្លូវពីឃុំស្រែណូយទៅសាលាស្រុកវ៉ារិន ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
