ក្រសួងអប់រំ យុវជន និងកីឡា តាមរយៈនៃកិច្ចសហការជាមួយ អង្គការអន្តរជាតិខាងការងារ (ILO) អង្គការអ្នកស្ម័គ្រចិត្តសហប្រជាជាតិ អង្គការយូណេស្កូ ព្រមជាមួយនឹងការឧបត្ថម្ភគាំទ្រ ដោយក្រុមហ៊ុនឯកជននានាជាច្រើនទៀត បានរៀបចំទិវាសហគ្រិនភាពកម្ពុជាលើកទី២ នៅមជ្ឈមណ្ឌលជាតិយុវជនកម្ពុជា នាខេត្តសៀមរាប ថ្ងៃទី២១ ខែកញ្ញា ឆ្នាំ២០១៩ ។ ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានវត្តមានជាអធិបតីក្នុងពិធីនេះ ហើយក៏មានវត្តមានសិស្ស-និស្សិត និងយុវជន ប្រមាណជា ៥០០នាក់ និងអ្នកសម្របសម្រួល៥០នាក់ផ្សេងទៀត បានចូលរួមក្នុងកម្មវិធីនេះ ។
ជាការរំលឹកឡើងវិញ ព្រឹត្តិការណ៍លើកដំបូងនៃទិវាសហគ្រិនភាពកម្ពុជា ដែលក្រសួងអប់រំ យុវជន និងកីឡា បានរៀបចំឡើងកាលពីថ្ងៃទី ២១ ខែកញ្ញា ឆ្នាំ២០១៨ គឺយោងតាមបទពិសោធន៍ ដែលក្រសួងអប់រំទទួលបានតាមរយៈនៃការបំបែកកំណត់ត្រាពិភពលោក (Guinness World Record) សម្រាប់សិក្ខាសាលាអាជីវកម្ម ដែលមានលក្ខណៈអនុវត្តជាក់ស្តែងធំបំផុតនៅលើពិភពលោក កាលពីខែសីហា ឆ្នាំ២០១៧ កន្លងទៅ ។
អ្វីដែលកត់សម្គាល់ថា ការរៀបចំទិវាសហគ្រិនភាពកម្ពុជាលើកទី២នេះ ជាព្រឹត្តិការណ៍ដ៏ធំនោះ គឺកម្មវិធីនេះត្រូវរៀបចំឡើងនៅតាមទីតាំងចំនួន ២៥ កន្លែងផ្សេងៗគ្នា ក្នុងពេលតែមួយ ( ថ្ងែទី២១ ខែកញ្ញា ឆ្នាំ២០១៩ ) នៅតាមបណ្តា ២៥ ខេត្ត-រាជធានី ហើយគេរំពឹងថា នឹងមានយុវជន-យុវនារី ចូលរួមយ៉ាងហោចណាស់ប្រមាណជា ៤៥០០នាក់ នៅទូទាំងព្រះរាជាណាចក្រកម្ពុជា ។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា រួមជាមួយថ្នាក់ដឹកនាំនៃអគ្គនាយកដ្ឋានយុវជន អ្នកតំណាងសំខាន់ៗនៃទីភ្នាក់ងារអង្គការសហប្រជាជាតិ អង្គការមិនមែនរដ្ឋាភិបាល និងក្រុមហ៊ុនឯកជននានាដែលចូលរួមសហការឧបត្ថម្ភគាំទ្រ ត្រូវបានថ្លែងសុន្ទរកថា និងផ្តល់អនុសាសន៍សំខាន់ៗដល់យុវជនតាមរយៈនៃការផ្សាយផ្ទាល់ អាខោនហ្វេសប៊ុកhttps://WM.facebook.com/moeys.gov.kh) របស់ក្រសួងអប់រំ យុវជន និងកីឡា ពីក្រុងសៀមរាប ផងដែរ ។
រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ៖ទិវាសហគ្រិនភាពកម្ពុជា គឺជាឱកាសថ្មីមួយទៀតសម្រាប់ផ្តល់ជាចំណេះដឹងថ្មីៗនិងមានផលប្រយោជន៍សម្រាប់យុវជនកម្ពុជា ក្នុងការចាប់ផ្តើមបង្កើតអាជីវកម្មដោយខ្លួនឯងទៅតាមចំណង់ចំណូលចិត្ត ទៅតាមលទ្ធភាព ទៅតាមជំនាញដែលខ្លួនមាន និងទោតាមតម្រូវការទីផ្សារការងារនាពេលបច្ចុប្បន្ន និងអនាគត ។
ឯកឧត្តម បង្ហាញនូវការចាប់អារម្មណ៏ថា មានយុវជនមួយចំនួន បានចាប់ផ្តើមអាជីវកម្មរបស់ខ្លួនដោយភាពប្រថុយប្រថាន មិនទទួលបានការណែនាំតម្រង់ទិស និងមិនបានទទួលការបណ្តុះបណ្តាលគ្រប់គ្រាន់អំពីសហគ្រិនភាព ដែលជាកត្តាធ្វើឲ្យយុវជនទាំងនោះប្រឈមនឹងហានីភ័យខ្ពស់ ចំពោះការចាប់ផ្តើមធ្វើអាជីវកម្មរបស់ពួកគេ ។
ការបណ្តុះគំនិតសហគ្រិនភាពដល់យុវជន មិនត្រាមតែជម្រុញឲ្យសេដ្ឋកិច្ចឆ្ពោះទៅមុខប៉ុណ្ណោះទេ ប៉ុន្តែថែមទាំងបានគាំទ្រដល់យុវជនក្នុងការអភិវឌ្ឍជំនាញទទួលបានជោគជ័យសម្រាប់ការធ្វើអាជីវកម្ម ការងារទៅកាន់ការងារផ្លូវការ និងលើកកម្ពស់ការផ្លាស់ប្តូរជាវិជ្ជមាននៅក្នុងជីវិតនិងសហគមន៍របស់ពួកគេ ផងដែរ ។ នេះគឺជាព្រឹត្តិការណ៍បង្កើតវប្បធម៌ពិភាក្សារៀនសូត្រ ដោយពុំមានគ្រូបង្រៀននោះទេ ហើយអ្នកចូលរួមនឹងត្រូវធ្វើការងារជាក្រុម ទៅតាមការណែនាំជាជំហានៗ ដូចដែលមានបង្ហាញនៅក្នុងមេរៀន ៕
ទិវាសហគ្រិនភាពកម្ពុជាលើកទី២ ឆ្នាំ២០១៩
ទិវាសហគ្រិនភាពកម្ពុជាលើកទី២ ឆ្នាំ២០១៩ #ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Saturday, September 21, 2019
