លំនៅដ្ឋានប្រជាពលរដ្ឋ និងអគារសាធារណៈមួយចំនួន ដូចជាមន្ទីរពេទ្យ សាលារៀន នៅក្នុងស្រុកអង្គរជុំ ខេត្តសៀមរាប ត្រូវបានលិចលង់ដោយសារជំនន់ទឹកភ្លៀង ដែលធ្លាក់មកជាបន្តបន្ទាប់។
លោក លុក ផុស អភិបាលស្រុកអង្គរជុំខេត្តសៀមរាប បានឱ្យដឹងថា ករណីទឹកជំនន់លិចស្រុកអង្គរជុំនេះ បានកើតឡើងចាប់តាំងពីម៉ោង៨យប់ថ្ងៃទី២៣ខែកញ្ញាឆ្នាំ២០១៩ ដោយបានធ្វើឱ្យលិច សាលារៀន មន្ទីរពេទ្យ ផ្សារ ផ្ទុះប្រជាពលរដ្ឋ និងផ្លូវសាធារណៈ។ លោកបន្តថា ទឹកជំនន់នេះបានធ្វើឱ្យផ្ទះប្រជាពលរដ្ឋចំនួន៤២០ខ្នងនៅក្នុងឃុំដូនពេក រងការគ្រោះលិចលង់ ក្នុងនោះមានផ្ទះប្រមាណ៣០០ខ្នង នៅក្នុងភូមិបេង និងភូមិខ្ចាស់ មានការលិចខ្លាំងជាងគេ។
ចំណែកមន្ទីរពេទ្យបង្អែកអង្គរជុំ ក៏ត្រូវជនលិចដែរ ដែលបង្ខំឲ្យអាជ្ញាធរពាក់ព័ន្ធសម្រេចបញ្ជូនអ្នកជំងឺចំនួន៤២នាក់ចេញពីមន្ទីរពេទ្យ ដោយក្នុងនោះអ្នកជំងឺខ្លះ ត្រូវបានអនុញ្ញាតឲ្យវិលត្រលប់ទៅផ្ទះ ខ្លះបញ្ជូនទៅមណ្ឌលសុខភាព និងខ្លះត្រូវបានបញ្ជូនចេញទៅកាន់មន្ទីរពេទ្យបង្អែកស្រុកពួក ខេត្តសៀមរាប។
ព័ត៌មានជាតិ ថ្មីៗ
លោក លុក ផុស បន្តទៀតថា ក្រៅពីលំនៅដ្ឋានប្រជាពលរដ្ឋ និងអគារសាធារណៈទឹកជំនន់នេះ ក៏បានកាត់ផ្តាច់ផ្លូវមួយខ្សែពីស្រុកអង្គរជុំ ទៅកាន់ស្រុកវ៉ារិនផងដែរ ។ លោកបានបញ្ជាក់ដែរថា សម្រាប់គ្រោះទឹកជំនន់នេះ គិតត្រឹមរសៀលថ្ងៃទី២៤ ខែកញ្ញានេះ គឺមិនទាន់មានប្រជាពលរដ្ឋណាម្នាក់រងគ្រោះថ្នាក់នោះទេ៕
អត្តបទនិងរូបភាព៖ជា ស្រស់, ខេង ឧត្តម
