នៅថ្ងៃទី២៤ ខែ កញ្ញា ឆ្នាំ២០១៩ម្សិលមិញនេះ ឯកឧត្តមឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប , លោកស្រី យូ សុភា អភិបាលរងខេត្ត និង លោក ណម ពិសិដ្ឋ ប្រធានមន្ទីរសេដ្ឋកិច្ចនិងហិរញ្ញវត្ថុខេត្ត និង ភរិយា ព្រមទាំងមន្ត្រីរាជការក្រោមឱវាទ ក្រុមប្រឹក្សាស្រុក អាជ្ញាធរស្រុក បានអញ្ជើញចុះជួបធ្វើការសំណេះ សំណាលជាមួយលោកគ្រូ អ្នកគ្រូ សិស្សានុសិស្ស ប្រមាណជាង១ពាន់នាក់ ទាំងថ្នាក់មត្តេយ្យ , បឋមសិក្សា និង អនុវិទ្យាល័យ នៅសាលា បឋមសិក្សាកំពង់ឃ្លាំង ក្នុងឃុំកំពង់ឃ្លាំង ស្រុកសូទ្រនិគម ។
ឯកឧត្តមឧកញ៉ាបណ្ឌិត សៀង ណាំ តំណាងរាស្ត្រមណ្ឌលសៀមរាប បានមានប្រសាសន៍ថា រាជរដ្ឋាភិបាលកម្ពុជាក្រោមកិច្ចដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជានាយករដ្ឋមន្ត្រី បានផ្តោតការយកចិត្តទុកដាក់ខ្ពស់ ចំពោះការងារបណ្តុះបណ្តាលធនធានមនុស្ស ក្នុងការឆ្លើយតបទៅនឹងវឌ្ឍនភាពនៃប្រទេសជាតិ ដោយ សាងសង់ហេដ្ឋារចនាសម្ព័ន្ធអប់រំតាំងពីទីក្រុងរហូតដល់ជនបទ ដែលក្នុងមួយភូមិគឺមានសាលារៀនមួយ សម្រាប់ជាថ្នាលបណ្តុះបណ្តាលធនធានមនុស្ស ។
ឯកឧត្តមឧកញ៉ាបណ្ឌិត សៀង ណាំ មានប្រសាសន៍ទៀតថា សមទ្ធិផលដែលបងប្អូនទទួលបានកន្លងមក គឺស្តែងចេញឡើងពីកត្តាសន្តិភាព ក្នុងតំណាក់កាលដែលប្រទេសជាតិ កំពុងធ្វើដំណើរស្ថិតនៅលើវិថីនៃការកសាងប្រទេស ចាកចេញពីកម្រិតនៃប្រទេសកំពុងអភិវឌ្ឍន៍ ចូលក្នុងសមត្ថភាពនៃប្រទេសអភិវឌ្ឍន៍តិចតួច ហើយចាំបាច់ណាស់ដែលរាជរដ្ឋាភិបាល បានយកចិត្តទុកដាក់ខ្ពស់បំផុតលើការងារកសាងធនធានមនុស្ស ប្រកបដោយគុណភាព តាមរយៈវិស័យអប់រំ ដូច្នេះបើគ្មានការអបរំទេនោះ គឺមិនអាចធ្វើឲ្យសង្គមមួយរីកចម្រើនបានឡើយ ហេតុនេះការសិក្សាអប់រំ ជាកូនសោសម្រាប់បើកទ្វារអនាគត ហើយតាមរយៈនេះផងដែរ សូមឲ្យក្មួយៗ ចៅៗ ជាសិស្សានុសិស្ស ដែលជាធនធានមនុស្សនៃជាតិ និង លោកគ្រូ អ្នកគ្រូ ព្រមប្រជាពលរដ្ឋ ត្រូវរួមសាមគ្គីគ្នាថែរក្សាសន្តិភាព ដែលជាឬសគល់នៃការរីកចម្រើនទាំងខ្លួនឯង និង សង្គមទៅអនាគត ។
ព័ត៌មានជាតិ ថ្មីៗ
ក្នុងឱកាសនោះដែរ ឯកឧត្តមឧកញ៉ាបណ្ឌិត បាននាំយកអំណោយ ចែកជូនលោកគ្រូ អ្នកគ្រូ ដែលក្នុងម្នាក់ៗ ទទួលបានសារុង១ និង ប្រាក់៣ម៉ឺនរៀល រីឯសិស្សានុសិស្ស ក្នុងម្នាក់ៗ ទទួលបានសៀវភៅ សសេរ ប៊ិច ខ្មៅដៃ ជ័រលប់ និង ប្រាក់ចំនួន ១១.០០០រៀល ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
