ក្នុងឱកាសអមដំណើរឯកឧត្តមបណ្ឌិតអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងជាប្រធានក្រុមការងារថ្នាក់ខេត្ត ចុះជួយស្រុកក្រឡាញ់ ចុះពិនិត្យស្ថានភាពទឹកជំនន់ក្នុងតំបន់មួយចំនួនក្នុងស្រុកក្រឡាញ់ កាលពីរសៀលថ្ងៃទី២៤ ខែកញ្ញា ឆ្នាំ២០១៩នេះ លោកស្រី ម៉ននី រង្សី អភិបាលស្រុកក្រឡាញ់ បានមានប្រសាសន៍ថា មានឃុំចំនួន៣ក្នុងស្រុកក្រឡាញ់ បានទទួលរងគ្រោះដោយសារទឹកជំនន់ជន់លិច ដែលបណ្ដាលធ្វើឲ្យប៉ះពាល់ដល់ដំណាំស្រូវរបស់ប្រជាពលរដ្ឋ និង ខូចខាតផ្លូវលំមួយចំនួន ក្នុងនោះ ៖ នៅឃុំក្រូចគរ បានដាច់ស្ពានចំនួន១កន្លែង មានប្រវែង ២០ម៉ែត្រ , ទឹកហូរកាត់ផ្លូវលំប្រវែង៣០០ម៉ែត្រ និង លិចស្រូវវស្សាចំនួន៤០០ហិកតា , ២. ឃុំស្នួល លិចស្រូវវស្សាប្រហែលចំនួន៥៥០ហិកតា និងទឹកហូរកាត់ផ្លូវប្រវែង ១.៣០០ ម៉ែត្រ និង នៅឃុំចន្លាស់ដៃ ទឹកជំនន់បានស្រកខ្លះវិញហើយ។
លោកស្រី ម៉ននី រង្សី បានមានប្រសាសន៍ថា ក្នុងខណៈពេលដែលស្រុកក្រឡាញ់កំពុងទទួលរងគ្រោះដោយសារទឹកជំនន់នេះ បច្ចុប្បន្ននេះ រដ្ឋបាលស្រុក បាននឹងកំពុងយកចិត្តទុកដាក់តាមដានសភាពការណ៍គ្រោះមហន្តរាយនានាក្នុងស្រុក ឯកឧត្តមបណ្ឌិតអ្នកឧកញ៉ា សៀង ណាំ បានដឹកនាំក្រុមការងារថ្នាក់ខេត្ត បានចុះដល់ទីតាំង ដែលជន់លិចផ្ទាល់ភ្លាមៗ នៅភូមិព្រៃខ្យង និងភូមិរើល ក្នុងឃុំក្រូចគរ និង បន្តចុះពិនិត្យស្ថានភាពទឹកជំនន់នៅភូមិព្រៃល្ងៀង ក្នុងឃុំស្នួល ដើម្បីពិភាក្សាគ្នា និង រិះរកវិធានការនានាជួយដល់ប្រជាពលរដ្ឋ ក្នុងករណីចាំបាច់ ។
គួររំលឹកថា ពាក់ព័ន្ធនឹងទឹកជំនន់នេះនៅក្នុងស្រុកអង្គរជុំ បន្ទាប់ពីមានភ្លៀងធ្លាក់ខ្លាំងជាប់ៗគ្នាប៉ុន្មានថ្ងៃកន្លងមកនេះ បានបង្កឱ្យមានទឹកជំនន់កើតឡើងចាប់តាំងពីម៉ោង៨យប់ថ្ងៃទី២៣ ខែកញ្ញា ឆ្នាំ ២០១៩ ដោយបានធ្វើឱ្យលិច សាលារៀន មន្ទីរពេទ្យ ផ្សារ ផ្ទះប្រជាពលរដ្ឋ និងផ្លូវ ពិសេសបានធ្វើឱ្យផ្ទះប្រជាពលរដ្ឋចំនួន៤២០ខ្នងនៅក្នុងឃុំដូនពេង ទទួលរងគ្រោះលិចទឹកនេះ ក្នុងនោះមានផ្ទះប្រមាណ៣០០ខ្នង នៅក្នុងភូមិបេង និងភូមិខ្ចាស់ មានការលិចខ្លាំងជាងគេ ខណៈអ្នកជំងឺចំនួន៤២នាក់ដែលស្នាក់នៅព្យាបាលនៅក្នុងមន្ទីរពេទ្យបង្អែកអង្គរជុំ ត្រូវបានបញ្ជូនចេញទៅកាន់មន្ទីរពេទ្យស្រុកពួក ហើយនៅព្រឹកថ្ងៃទី២៤ ខែកញ្ញា ឆ្នាំ២០១៩នេះ លោក ពិន ប្រាកដ អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណ:អភិបាលខេត្តសៀមរាប បានដឹកនាំកម្លាំងចម្រុះមានអនុប្រធានមន្ទីរសុខាភិបាលខេត្ត គណៈអភិបាលស្រុក កងរាជអាវុធហត្ថស្រុក ប្រធានមន្ទីរបង្អែកអង្គរជុំ បានចុះពិនិត្យស្ថានភាពទឹកជំនន់ផ្ទាល់នៅតំបន់មួយចំនួនក្នុងស្រុកអង្គរជុំ ភ្លាមៗផងដែរ ៕
អត្ថបទ និង រូបថត ៖ លោក លីវ សុខុន
កែសម្រួលអត្ថបទ ៖ លោក លីវ សាន្ត
