ស្រុកចំនួន៧ ក្នុងចំណោមក្រុង-ស្រុកទាំង១២ នៃខេត្តសៀមរាប ត្រូវបានលិចលង់ដោយសារជំនន់ទឹកភ្លៀង ក្នុងនោះប្រព័ន្ធហេដ្ឋារចនាសម្ព័ន្ធក្នុងមូលដ្ឋានត្រូវបានរងការខូចខាត និងប្រជាពលរដ្ឋមួយចំនួនតូច ត្រូវបានជម្លៀសចេញពីគេហដ្ឋាន នេះបើតាមរបាយការណ៍គណៈកម្មាធិការគ្រប់គ្រងគ្រោះមហន្តរាយខេត្តសៀមរាប កាលពីម៉ោង៧ ល្ងាចថ្ងៃទី ២៤ ខែកញ្ញាឆ្នាំ ២០១៩។
តាមរបាយការណ៍ដដែលនេះ បញ្ជាក់ថា ពុំមានអ្នករងគ្រោះដោយសារគ្រោះទឹកជំន់ននេះឡើយ។ ក្នុងនោះ ស្រុកដែលលិចលង់ចំនួន ៤ រួមមាន ស្រុកវ៉ារិន អង្គរធំ បាគង និងជីក្រែង ទឹកបានស្រកជាបណ្ដើរៗហើយ។ ដោយឡែកស្រុកក្រឡាញ់ ជំនន់ទឹកភ្លៀង បានបង្កឲ្យដាច់ផ្លូវ និងបាក់ស្ពានមួយកន្លែងនៅចំណុចកណ្តាលលើដងផ្លូវពីភូមិរើល ទីប្រជុំជនឃុំក្រូចគរ ទៅកាន់ភូមិព្រៃខ្យង។ ក្រៅពីនោះ ស្រុកចំនួន២ទៀតមានស្រុកពួក និងស្រុកអង្គរជុំ ប្រសិនបើ ពុំមានភ្លៀងធំ ធ្លាក់ក្នុងរយៈពេល២ ទៅ៣ថ្ងៃទៀតទេ ស្ថានភាពនិងត្រឡប់មកជាធម្មតាវិញ។
ក្នុងរបាយការណ៍ក៏បានបញ្ជាក់ផងដែរ អំពីកម្ពស់ទឹកស្ទឹង និងអាងស្តុកទឹក នៅថ្ងៃទី២៤ ខែកញ្ញា ឆ្នាំ២០១៩នេះ ដោយកម្រិតទឹកក្នុងស្ទឺងជីក្រែង បានឡើងដល់កម្ពស់ ៨.៤៦ម៉ែត្រ ដែលលើស កម្រិតប្រុងប្រយ័ត្ន ០.៤៦ម៉ែត្រ និងកម្ពស់ទឹកស្ទឹងក្រឡាញ់ ស្ថិតនៅក្នុងកម្រិតគួរប្រុងប្រយ័ត្នផងដែរ គឺ៧.៩៨ម៉ែត្រ ដែលកម្រិតប្រុងប្រយ័ត្ន ៨ម៉ែត្រ។ ដោយឡែក កម្រិតទឹកទន្លេសាប នៅមានសភាពធម្មតា មិនមានការព្រួយបារម្មណ៍ឡើយ។ ទន្ទឹមនោះកម្ពស់ទឹក ក្នុងអាងទំនប់ទឹកស្ទឹងស្រែង១ ស្ថិតនៅក្នុងស្រុកក្រឡាញ់ ខេត្តសៀមរាប បានឡើងលើសកម្រិតប្រុងប្រយ័ត្ន ០.៩០ម៉ែត្រ ដែលកម្រិតប្រុងប្រយ័ត្ននៅត្រឹមកម្រិត២៦ម៉ែត្រ និងអាងទំនប់ទឹកស្ពានស្រែង ស្ថិតក្នុងស្រុកស្រីស្នំ ក្នុងខេត្តសៀមរាបដូចគ្នា បានឡើងដល់កម្រិតត្រូវប្រុងប្រយ័ត្ន ក្រៅពីនោះ អាងទំនប់ទឹកខ្សាក និងម្កាក់ ពុំមានការព្រួយបារម្មណ៍ឡើយ។
សូមជម្រាបថា ការព្យាករណ៍អំពីរបាយទឹកភ្លៀង នៅតាមបណ្ដាស្រុកនានា ក្នុងខេត្តសៀមរាប នៅមិនទាន់បានចេញផ្សាយមុន ដោយមន្ទីរធនធានទឹក និងឧត្តុនិយមខេត្តសៀមរាប ក្នុងអំឡុងពេលបីថ្ងៃទៅមុខទៀតឡើយ ពោលគឺថ្ងៃទី២៥ ដល់២៦ ខែកញ្ញា ឆ្នាំ២០១៩។
អត្ថបទ៖ សេង ផល្លី
រូបភាព៖ សហការី
