គិតត្រឹមម៉ោង ៧ ល្ងាចនៅថ្ងៃទី ២៤ ខែកញ្ញាឆ្នាំ ២០១៩ ទឹកជំនន់ទឹកភ្លៀង បានបណ្ដាលឲ្យលិច ឃុំចំនួន០៥ ក្នុងចំណោមឃុំទាំង០៧ របស់ស្រុកអង្គរជុំ ខេត្តសៀមរាប និងលិចផ្ទះប្រជាពលរដ្ឋ ៤២០ខ្នង ក្នុងនោះ៣០០ខ្នងខ្លាំងជាងគេ នេះបើតាមរបាយការណ៍គណៈកម្មាធិការគ្រប់គ្រងគ្រោះមហន្តរាយខេត្តសៀមរាប។
តាមប្រសាសន៍លោក លុក ផុស អភិបាលស្រុកអង្គរជុំ បានឲ្យដឹងថា ឃុំចំនួន៥ ដែលលិចនោះមាន ឃុំគោល ដូនពេង ស្រែខ្វាវ ចាឈូក តាសោម ប៉ុន្តែមានតែឃុំដូនពេងមួយប៉ុណ្ណោះដែលលិចខ្លាំងជាងគេ។ ដោយឡែក លោកបានបន្ថែមថា ជំនន់ទឹកភ្លៀងនេះ មិនបង្កឲ្យប្រជាពលរដ្ឋត្រូវជម្លៀសខ្លួនចេញពីគេហដ្ឋានឡើយ ប៉ុន្តែប្រព័ន្ធហេដ្ឋារចនាសម្ព័ន្ធ ភាគច្រើនត្រូវទឹកជំនន់ហូរកាត់ ជាពិសេសផ្លូវពីស្រុកអង្គរជុំ ទៅស្រុកវារិនតត្រូវបានកាត់ផ្ដាច់ ក្នុងខេត្តសៀមរាប។
លោកអភិបាលស្រុកអង្គរជុំ បានបញ្ជាក់ថា ជំនន់ទឹកភ្លៀងនេះ បានកើតឡើងចាប់តាំងពីម៉ោង៨យប់ ថ្ងៃទី២៣ខែកញ្ញាឆ្នាំ២០១៩ បណ្ដាលឲ្យទីតាំងសាធារណជាច្រើន របស់ស្រុកជាច្រើនត្រូវបានលិច ក្នុងនោះក៏មានមន្ទីរពេទ្យបង្អែកស្រុកផងដែរ។ ដើម្បីបង្ការគ្រោះថ្នាក់ជាយថាហេតុពីការឆ្លងចរន្តអគ្គិសនី បានជម្លៀសអ្នកជំងឺចំនួន៤២នាក់ កាលពីថ្ងៃទី ២៤ ខែកញ្ញាឆ្នាំ ២០១៩ម្សិលមិញ យកទៅសម្រាកព្យាបាលនៅមន្ទីរពេទ្យបង្អែកស្រុកពួក ខេត្តសៀមរាប ជាបណ្ដោះអាសន្ន។
ព័ត៌មានជាតិ ថ្មីៗ
លោក លុក ផុស បានបញ្ជាក់បន្ថែមថា អាជ្ញាធរស្រុកបានអន្តរាគមន៍ជួយប្រជាពលរដ្ឋយ៉ាងសស្រាក់សស្រាំ ដោយពុំមានអ្នករងគ្រោះដោយសារជំនន់ទឹកភ្លៀងនេះឡើយ។ គិតត្រឹមព្រឹកនៅថ្ងៃទី ២៥ ខែកញ្ញាឆ្នាំ ២០១៩នេះ ទឹកជំនន់បានស្រកទៅវីញបណ្ដើរៗហើយ ប្រសិនបើគ្មានភ្លៀងធ្លាក់ជោកជាំទៀតទេនោះ រយៈពេល២ ទៅ៣ថ្ងៃ ទឹកនឹងស្រកអស់។
សូមជម្រាបថា នៅអំឡុងខែកញ្ញាឆ្នាំ២០១៣ ស្រុកអង្គរជុំ បានរងការលិចលង់យ៉ាងធ្ងន់ធ្ងរ ដោយសារការបាក់អាងទំនប់ទឹកអូរបីតាប់ ស្ថិតនៅស្រុកវ៉ារិន ខេត្តសៀមរាប។
អត្ថបទ៖ សេង ផល្លី
រូបភាព៖ សហការី
