សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅក្នុងឱកាសបុណ្យភ្ជុំបិណ្ឌនេះ បានផ្តល់ ជូនមន្ត្រីរាជការ កងកម្លាំងប្រដាប់អាវុធ កម្មករ កម្មការិនី សិស្ស និស្សិតទាំងអស់ ដែលធ្វើដំណើរទៅលេងស្រុកកំណើតជួបជុំបងប្អូនក្រុមគ្រួសារ ពីរាជធានីភ្នំពេញ ទៅតាមបណ្តាខេត្ត និងពីបណ្តាខេត្តត្រឡប់ទៅរាជធានីភ្នំពេញ រយៈពេល ០៥ថ្ងៃ ចាប់ពីថ្ងៃទី ២៦ ដល់ថ្ងៃទី៣០ ខែកញ្ញា ឆ្នាំ២០១៩ ដោយឥតបង់ថ្លៃសម្រាប់ការធ្វើដំណើរតាមរថយន្តក្រុង (City Bus) និងតាមកាណូតសាធារណៈ(Tax Boat) របស់រដ្ឋាករស្វយ័តដឹកជញ្ជូនសាធារណៈ។
ដោយឡែកសម្រាប់ខេត្តសៀមរាប ឯកឧត្ដម ទៀ សីហា អភិបាលខេត្ត បានចេញសេចក្ដីជូនដំណឹងមួយដោយផ្អែកលើលិខិតរបស់រដ្ឋបាលរាជធានីភ្នំពេញ ដែលបានបញ្ជាក់ថា រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ បានរៀបចំរថយន្តចំនួន ១៥គ្រឿង សម្រាប់បម្រើដល់ការដឹកជញ្ជូនពីរាជធានីភ្នំពេញ មកខេត្តសៀមរាប និងការដឹកជញ្ជូនពីខេត្តសៀមរាប ទៅរាជធានីភ្នំពេញវិញ តាមពេលវេលា និងទីតាំងចំណតដូចខាងក្រោម៖
១. ចេញដំណើរពីរាជធានីភ្នំពេញ មកខេត្តសៀមរាប ទីតាំងចំណតរង្វង់មូលទេពមច្ឆា (ជ្រោយចង្វារ ) រៀងរាល់ម៉ោង ៥៖៣០នាទីព្រឹក និង ៥៖៣០នាទីរសៀល ចាប់ពីថ្ងៃទី២៦-២៩ ខែកញ្ញា ឆ្នាំ២០១៩។
២. ចេញដំណើរពីខេត្តសៀមរាប ទៅរាជធានីភ្នំពេញ នៅ ទីតាំងចំណត រថយន្តប៉ែកខាងកើត (បុរីសៀងណាំ) រៀងរាល់ម៉ោង ១៖៣០នាទីរសៀល ចាប់ពីថ្ងៃទី២៦-២៩ ខែកញ្ញា ឆ្នាំ២០១៨ និងវេលាម៉ោង៥៖៣០នាទីព្រឹកសម្រាប់ ថ្ងៃទី៣០ ខែកញ្ញា ឆ្នាំ២០១៩ ៕
សម្រួលអត្ថបទ ៖ លោក លីវ សាន្ត
