លោក សូ ប្លាតុង អភិបាលស្រុកប្រាសាទបាគង បានឲ្យដឹងថា យោងទៅតាមស្ថានភាពអាកាសធាតុប៉ុន្មានថ្ងៃកន្លមកនេះគឺភ្លៀងបានធ្លាក់ជាបន្តបន្ទាប់ ហើយនៅប៉ែកខាងលើក៏បានបង្ករជាទឹកជំនន់ហូរធ្លាក់ជន់ គិតត្រឹមរសៀលថ្ងៃទី២៥ ខែកញ្ញា ឆ្នាំ២០១៩ នេះ ចំនែកឃុំចំនួន០៤ នៅក្នុងស្រុកប្រាសាទបាគង បានរង នូវផលប៉ះពាល់ ដោយសារជំនន់ទឹកភ្លៀង ក្នុងនោះរួមមាន ឃុំរលួស ឃុំមានជ័យ ឃុំកន្ទ្រាំង និងឃុំបាគង ។
លោក សូ ប្លាតុង បានឲ្យដឹងទៀតថា ដោយឡែកផ្លូវធ្វើដំណើរទៅកាន់តំបន់រមណីយដ្ឋានកំពង់ភ្លុក តាមរយះផ្លូវ ផ្សាររលួស ក៏ត្រូវបានទឹកជន់លិចដែរ ចំពោះរថយន្តធុនតូច និងរ៉ឺម៉កម៉ូតូអាចពិបាកក្នុងធ្វើដំណើរ ទៅតំបន់នោះ ។ តែក្នុងនោះយើងក៏អាចធ្វើដំណើរតាមផ្លូវផ្សារអង្គ្រងបត់ទៅតាមវត្តរលួស ហើយបន្តឆ្ពោះទៅរមណីយដ្ឋានកំពង់ភ្លុក បានដូចគ្នា។
លោកអភិបាលស្រុក ក៏បានឲ្យដឹងដែរថា ក្នុងនាមអភិបាលស្រុក និងជាប្រធានគណៈបញ្ជាការឯកភាពស្រុក បានណែនាំអោយកងកម្លាំងគ្រប់អង្គភាព ត្រៀមវិធានការសរុប មធ្យោបាយសរុប កម្លាំងសរុប សម្រាប់ជួយសង្គ្រោះបងប្អូនប្រជាពលរដ្ឋ ចំណែកអាជ្ញាធរភូមិ ឃុំ ត្រូវមានមន្ត្រីប្រចាំការតាមដានស្ថានភាពទឹកជំនន់ឱ្យជាប់ និងរហ័សរហួន ផ្សព្វផ្សាយព័ត៌មាន រាយការណ៍ ឱ្យឆាប់បំផុត មក គណៈបញ្ជាការឯកភាព ដោយមិនគិតថាពេលយប់ ឬពេលថ្ងៃឡើយ ដោយកំណត់ភូមិសាស្ត្រឱ្យបានច្បាស់លាស់នឹងត្រៀមទីតាំងទួលសុវត្ថិភាពទុកសម្រាប់ប្រើប្រាស់ ក្នុងការជម្លៀសបងប្អុនប្រជាពលរដ្ឋរងគ្រោះ នៅក្នុងមូលដ្ឋាន ពេល មានករណីទឹកជន់ឡើងខ្លាំងជាងនេះ ផងដែរ។
លោកក៏បាន សំណូមពរ សូមឲ្យអាណាព្យាបាលគ្រប់រូប បង្កើនការប្រុងប្រយត្ន័ឲ្យបានខ្ពស់ចំពោះកុមារតូចៗកុំបណ្តោយអោយចុះលេងទឹកដែលកំពុងជន់ ជាពិសេស សូមត្រួតពិនិត្យជាប្រចាំចំពោះបណ្តាញខ្សែរបញ្ជូនចរន្តអគ្គីសនី ដែលអាចបង្ករទៅជាគ្រោះថ្នាក់ជាយថាហេតុ ៕
រដ្ឋបាលស្រុកប្រាសាទបាគង
កែសម្រួល៖ អ៊ុន ណារាជ្យ
