នៅថ្ងៃទី ២៦ ខែកញ្ញា ឆ្នាំ២០១៩ នេះ គឺជាថ្ងៃទីមួយ ក្នុងចំណោម ប្រាំថ្ងៃ ដែលរាជរដ្ឋាភិបាលកមម្ពុជា បានប្រកាសថានឹងផ្ដល់ជូនសេវាដឹកជញ្ជូនអ្នកដំណើរទូទៅ ពីរាជធានីភ្នំពេញ ទៅកាន់បណ្ដាខេត្តមួយចំនួន ដោយឥតគិតថ្លៃ ក្នុងឱកាសពិធីបុណ្យភ្ជុំបិណ្ឌ នាពេលខាងមុខនេះ ក្នុងនោះក៏មានខេត្តសៀមរាបផងដែរ។
តាមរយៈសេចក្ដីជូនដំណឹងរបស់រដ្ឋបាលខេត្តសៀមរាប បានបង្ហាញរថយន្តក្រុង(City) ដែលចេញដំណើរពីរាជធានីភ្នំពេញ មកកាន់ខេត្តសៀមរាប មានចំនួនសរុប១៥គ្រឿង។
នៅថ្ងៃនេះផងដែរ ចំនួនអ្នកដំណើរដែលនឹងមកខេត្តសៀមរាប មានចំនួន៦៣០នាក់ នេះបើតាមហ្វេសប៊ុកផ្លូវការរបស់រដ្ឋបាលខេត្តសៀមរាប។ ទន្ទឹមនោះរថយន្តក្រុង ដែលបានមកដល់ក្នុងចំណតដំបូង នៅវេលាម៉ោង ១២:២០នាទីរសៀល។
ព័ត៌មានជាតិ ថ្មីៗ
តាមការឲ្យដឹងពីអ្នកគ្រប់គ្រងចំណត ក្នុងបុរីសៀងណាំ ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប បានឲ្យដឹងថា ក្នុងក្រុងសៀមរាប មានចំណតរថយន្តចំនួន២ ដែលវាធានាបាននូវភាពងាយស្រួលដល់អ្នកដំណើរ និងបញ្ចៀសការកក់ស្ទះចរាចរណ៍។ មួយវិញ ដើម្បីជួយសម្រួលដល់ការមកដល់ និងចេញដំណើរទៅវិញរបស់រថយន្តក្រុងរាជធានីភ្នំពេញ អ្នកគ្រប់គ្រង់ចំណត បានសហការជាមួយអាជ្ញាធរក្រុងយ៉ាងស្អិតរមួត ចៀងវាងការកកស្ទះ បណ្ដាលឲ្យប៉ះពាល់ដល់អ្នកដំណើរឡើយ។
ដោយឡែក អ្នកដំណើរ ដែលបានធ្វើដំណើរតាមរយៈរថយន្តក្រុងរាជធានីភ្នំពេញ មកកាន់ខេត្តសៀមរាប មានការពេញចិត្តជាខ្លាំង ចំពោះការផ្ដល់ជូនសេវាដឹកជញ្ជូនឥតគិតថ្លៃ របស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន ជានាយករដ្ឋមន្ត្រី។
