នាព្រឹកថ្ងៃទី២៦ ខែកញ្ញា ឆ្នាំ២០១៩ ឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និង លោកជំទាវ ព្រមទាំងក្រុមការងារថ្នាក់ខេត្ត ថ្នាក់ស្រុកចុះជួយមូលដ្ឋានស្រុកក្រឡាញ់ បាននាំយកអង្ករចំនួន៤តោនកន្លះ , ត្រីខ៤៥០យួរ , មី២៧កេះធំ , ទឹកសុទ្ធ៤៥០យួរ , សារុង៤៥០ និងថវិកា៨លានរៀល ចែកជូនប្រជាពលរដ្ឋជួបផលប៉ះពាល់ និងរងគ្រោះដោយទឹកជំនន់ ហើយជួបការខ្វះខាត ធ្វើដំណើរទៅណាមិនរួចចំនួន៣ភូមិ ស្មើនឹង៤៥០គ្រួសារក្នុងឃុំក្រូចគរ ស្រុកក្រឡាញ់ ។
បើតាមសេចក្ដីរាយការណ៍របស់ លោកស្រី ម៉ននី រង្សី អភិបាលស្រុកក្រឡាញ់ បានឱ្យដឹងថា គិតចាប់ពីថ្ងៃទី១៩ ខែកញ្ញាមក ទឹកជំនន់ដោយទឹកភ្លៀង និងទឹកមកពីប៉ែកខាងលើ បានហូរធ្លាក់មកក្នុងបណ្តាឃុំមួយចំនួនក្នុងស្រុកក្រឡាញ់ ក្នុងនោះឃុំចន្លាស់ដៃ , ឃុំក្រូចគរ និង ឃុំស្នូល ធ្វើឲ្យទឹកកើនឡើងខ្លាំង បណ្តាលឱ្យប៉ះពាល់ដល់ហេដ្ឋារចនាសម្ព័ន្ឋ ដូចជាដាច់ស្ពានមួយកន្លែងប្រវែង២០ម៉ែត្រ លិចស្រូវអស់៤០០ហិកតា ទឹកហូរកាត់ផ្លូវប្រវែង៣០០ម៉ែត្រ ក្នុងឃុំក្រូចគរ , ឃុំស្នូលលិចស្រូវជាង១ពាន់ហិកតា ទឹកហូរកាត់ផ្លូវ៦ខ្សែ ប្រវែង៨.២១២ម៉ែត្រ , លិចបរិវេណសាលាបឋមសិក្សាតាសែង ហើយស្ថិតក្នុងស្ថានភាពនេះ អាជ្ញាធរស្រុក សហការជាមួយមន្ត្រីគ្រប់ផ្នែករបស់ស្រុក ពិភាក្សាបន្ទាន់ជាមួយគណកម្មការដោះស្រាយគ្រោះមហន្តរាយថ្នាក់ស្រុក និងអាជ្ញាធរមូលដ្ឋាន ដើម្បីមានដំណោះស្រាយដើម្បី ធានាសុវត្ថិភាពជូនប្រជាពលរដ្ឋ ។
មានប្រសាសន៍ក្នុងឱកាសនោះ ឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានបញ្ជាក់ថា ប់ពិនិត្យជារួមអំពីស្ថានភាពទឹកជំនន់ទឹកភ្លៀងនេះ និង យោងទៅលើភូមិសាស្ត្រនៃបណ្តាឃុំ ចាប់ពីព្រំប្រទល់ស្រុកអង្គជុំ រហូតដល់ផ្លូវជាតិលេ៦ រួមមានឃុំក្រូចគរ ឃុំស្នួល ឃុំរោងគោ ឃុំស្រណាល និងឃុំក្រឡាញ់ ជាឃុំធ្លាប់រងផលប៉ះពាល់ដោយគ្រោះរាំងស្ងួតកាលពីដើមរដូវវស្សាកន្លងមក ហើយតាមរយៈជំនន់នេះ គឺមិនមានផលប៉ះពាល់ធ្ងន់ធ្ងរនោះទេ ។
ឯកឧត្តមអ្នកឧកញ៉ា សៀង ណាំ បានបញ្ជាក់បន្ថែមថា ៖ ស្ពានឈើដែលត្រូវទឹកជំនន់បំផ្លាញនេះ នឹងត្រូវកសាងស្ពានបេតុងជំនួសវិញ ហើយផ្លូវដីក្រហមចម្ងាយ២៤គីឡូម៉ែត្រ តភ្ជាប់ពីឃុំក្រូចគរ ក្នុងស្រុកក្រឡាញ់ ទៅកាន់ស្រុកអង្គរជុំ នឹងត្រូវកសាងបន្ថែម នៅក្នុងរដូវប្រាំងខាងមុខ ដែលនេះគឺជាការសម្រេចចិត្តផ្តល់អំណោយភ្លាមៗ នៃប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី ប៉ុន្តែសូមឲ្យបងប្អូនប្រជាពលរដ្ឋទាំងអស់ ខិតខំប្រកបការងារបង្កបង្កើនផល ដាំដំណាំរួមផ្សំដើម្បីទ្រទ្រង់ជីវភាពគ្រួសារនិងប្រុងប្រយត្ន័ចំពោះសុខភាពផ្ទាល់ខ្លួន សុខភាពគ្រួសារនិង ប្រយត្ន័ចំពោះកុមារតូចៗកុំឱ្យទៅលេងទឹកថ្លុក ប្រឡាយ បឹងបួរ ខ្លាចក្រែងគ្រោះថ្នាក់កើតឡើងជាយថាហេតុ ។
សូមបញ្ជាក់ថា តាមរបាយការណ៍របស់លេខាធិការដ្ឋានគ្រប់គ្រងគ្រោះមហន្តរាយខេត្តសៀមរាប បានឲ្យដឹងថា បន្ទាប់ពីមានភ្លៀងធ្លាក់នៅប៉ែកខាងលើខ្លាំងជាប់ៗគ្នាប៉ុន្មានថ្ងៃកន្លងមកនេះ បានបង្កឱ្យមានទឹកជំនន់បានជន់លិចមន្ទីរពេទ្យ សាលារៀន ផ្សារ និងផ្ទះប្រជាពលរដ្ឋមួយចំនួន នៅតាមបណ្ដាឃុំខ្លះៗ ក្នុងស្រុកចំនួន០៥ របស់ខេត្តសៀមរាប រួមមាន ៖ ស្រុកអង្គរជុំ , ក្រឡាញ់ , ពួក , ប្រាសាទបាគង និង ស្រុកជីក្រែង ប៉ុន្តែមិនបណ្ដាលធ្វើឲ្យមានគ្រោះថ្នាក់ដល់អាយុជីវិតមនុស្សទេ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
