ភ្ញៀវទេសចរសរុប ជាង២៤ម៉ឺននាក់ បានធ្វើដំណើរមកកាន់ខេត្តសៀមរាប នៅអំឡុងថ្ងៃពិធីបុណ្យភ្ជុំបិណ្ឌរយ:ពេល៣ថ្ងៃ នេះបើតាមរបាយការណ៍ របស់មន្ទីរទេសចរណ៍ខេត្តសៀមរាប នៅថ្ងៃទី៣០ខែកញ្ញាឆ្នាំ២០១៩ នេះ។
នៅក្នុងរបាយការណ៍នេះបានបញ្ជាក់ថា គិតចាប់ពីថ្ងៃទី២៧ ដល់ ២៩ ខែកញ្ញា ឆ្នាំ២០១៩ តួលេខភ្ញៀវទេសចរសរុប មានចំនួន២៤៤,០៧៥នាក់ កើនឡើង៥.០១ភាគរយ បើប្រៀបធៀប ទៅនឹងរយ:ពេលនៃពិធីបុណ្យភ្ជុំបិណ្ឌឆ្នាំ២០១៨។ ក្នុងនោះ ភ្ញៀវទេសចរជាតិ មានចំនួនប្រមាណជាង ២៣ម៉ឺននាក់ កើនឡើង៩.៥២ភាគរយ បើប្រៀបធៀបទៅនឹងឆ្នាំ២០១៨ ដែលមានចំនួន ២១ម៉ឺននាក់។
រីឯ ភ្ញៀវទេសចរអន្តរជាតិ របាយការណ៍ដដែលនេះបានបង្ហាញថាមានការថយចុះ ៣៧.២៣ភាគរយ គឺចំនួន១៤,០៧៥នាក់ បើប្រៀបធៀបនឹងឆ្នាំ២០១៨មានចំនួនរហូតដល់ ២២,៤២២នាក់។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
