កាលពីថ្ងៃចុងសប្ដាហ៍កន្លងទៅថ្មីៗនេះ បន្ទាប់ពីបញ្ចប់នៃពិធីបុណ្យភ្ជុំបិណ្យ ព្រះសង្ឃនិងពុទ្ឋបរិស័ទក្នុងក្រុងសៀមរាប ខេត្តសៀមរាប ដឹកនាំដោយព្រះគ្រូវិជ័យរង្សី ឡាច លាង សាសនធរោ ព្រះគ្រូអនុក្រុងសៀមរាប និង ជាព្រះគ្រូចៅអធិការវត្តទេពពោធិ៍វង្ស ហៅវត្តថ្មីរួម ជាមួយព្រះគ្រូចៅអធិការបណ្តាវត្តមួយចំនួន និងប្រជាពុទ្ឋបរិស័ទក្នុងក្រុងសៀមរាប បានប្រមូលនិងនាំយកម្ហូបអាហារ នំអន្សម គ្រឿងឧបភោគបរិភោគ ព្រមទាំងថវិកាមួយចំនួនទៅជូនដល់អង្គភាពទ័ពកំពុងឈរជើងនៅតាមបណ្តោយព្រំដែនកម្ពុជា ថៃ ក្នុងស្រុកអន្លុងវែង និងស្រុកត្រពាំងប្រាសាទ នៃខេត្តឧត្តរមានជ័យ។
ថវិកាដែលទទួលបានពីការចូលរួមរបស់ប្រជាពុទ្ឋបរិស័ទក្នុងឱកាសបុណ្យភ្ជុំបិណ្ឌនោះ ត្រូវបានឧបត្ថម្ភជូនទីបញ្ជាការកងការពារព្រំដែនគោកលេខ៤០៣ ចំនួន២លានរៀល , ជូនទៅកងអនុសេនាធំលេខ២ ប្រចាំស្រុកត្រពាំងប្រាសាទថវិកា១លានរៀល , ជូនទៅកងទ័ពឈរជើងនៅចំណុចភូមិផ្ទោល ស្ថិតក្នុងឃុំស្រែណូយ ស្រុកវ៉ារិន ខេត្តសៀមរាប ថវិកា ៣០០ដុល្លារអាមេរិក ហើយអង្គភាពទ័ពទាំងបីនេះ ក៏បានទទួលបន្ថែមនូវគ្រឿងបរិភោគជាច្រើនទៀត រួមមាន នំអន្សម ទឹកត្រី ទឹកស៊ីអីវ ត្រីខកំប៉ុង ទឹកក្រូច ទឹកសុទ្ឋ និងបានការចែកជូនដោយផ្ទាល់នូវថវិកាផ្ទាល់ខ្លួនរបស់ប្រជាពុទ្ឋបរិស័ទរួមដំណើរដល់យោធិនម្នាក់ៗថែមទៀតផងដែរ ។
ព្រះតេជគុណ ឡាច លាង បានមានសង្ឃដីកាថា នេះមិនមែនជាលើកទីមួយទេ ដែលព្រះសង្ឃនិងប្រជាពុទ្ឋបរិស័ទក្នុងក្រុងសៀមរាប សហការមូលមតិគ្នានាំយកគ្រឿងឧបភោគ បរិភោគយកទៅជូនដល់កងទ័ព និងអង្គភាពទ័ពកំពុងបំពេញភារកិច្ចឈរជើងនៅតាមបន្ទាត់ព្រំដែន កម្ពុជា ថៃ ដែលសកម្មភាពនេះ សម្តែងឱ្យឃើញពីការយកចិត្តទុកដាក់គិតគូពីសុខទុក្ខដល់កងទ័ព ពីសំណាក់ព្រះសង្ឃនិងប្រជាពុទ្ឋបរិស័ទជួរក្រោយ និងមិនដែលភ្លេចសោះឡើយពីការលំបាក និងការលះបង់កម្លាំងកាយចិត្តរបស់វីរៈកងទ័ពខ្មែរ ដែលកំពុងបំពេញភារកិច្ចក្នុងបុព្វហេតុការពារ និងកសាងមាតុប្រទេសកម្ពុជាឡើយ។
ព្រះតេជគុណ ឡាច លាង បានមានសង្ឃដីកាបន្ថែមថា គ្រឿងឧបភោគបរិភោគ និងនំទាំងនេះ គែបានមកពីការកៀរគរចូលរួមពីតាមបណ្តាវត្តនានាក្នុងក្រុងសៀមរាប ដែលទទួលបានពីការប្រគេនរបស់ប្រជាពុទ្ឋបរិស័ទក្នុងឱកាសបុណ្យកាន់បិណ្ឌនិងភ្ជុំបិណ្យ ដោយវត្តខ្លះបានបែងចែកយកទៅជូនដល់អ្នកទោសនៅក្នុងពន្ឋនាគារខេត្ត នៅមន្ទីរពេទ្យ និងខ្លះទៀត ចែករំលែកទៅកងកម្លាំងប្រដាប់អាវុធ និងប្រជាការពារក្នុងមូលដ្ឋានក្បែរវត្ត ដែលពួកគាត់បានជួយរៀបចំសណ្តាប់ធ្នាប់ និងការពារសុវត្ថិភាព ជូនក្នុងឱកាសពិធីបុណ្យភ្ជុំបិណ្ឌនេះផងដែរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
