យ៉ាងហោចណាស់ មនុស្ស១៤នាក់ ក្នុងនោះមានជនបរទេស២នាក់ បានរងរបួសធ្ងន់-ស្រាល ក្នុងហេតុការណ៍គ្រោះថ្នាក់ចរាចរណ៍មួយ រវាងរថយន្តក្រុងវីរៈប៊ុនថាំ និងរថយន្តធុនដ្រា ស្ថិតនៅចំណុច សាលាកកោះ ឃុំគៀនសង្កែ ស្រុកសូទ្រនិគម ខេត្តសៀមរាប វេលាម៉ោងប្រមាណ៨យប់ ថ្ងៃទី២៩ ខែកញ្ញា ឆ្នាំ២០១៩ ។
តាមការបញ្ជាក់របស់លោក ទេព ចាន់ណា អធិការនគរបាលស្រុកសូទ្រនិគម បានឲ្យដឹងថា នៅក្នុងរថយន្តក្រុង វីរៈប៊ុនថាំ មានផ្ទុកអ្នកដំណើរសរុបចំនួន ៤០នាក់ និង ក្នុងរថយន្តធុនដ្រា មានមនុស្ស២នាក់ បើកបរស្របទិសគ្នាពីខេត្តសៀមរាប ទៅរាជធានីភ្នំពេញ ដោយសាររថយន្តក្រុង វីរៈប៊ុនថាំ ឡើងវ៉ាជែងមិនផុត បានទៅបុកគូទរថយន្តធុនដ្រា ពីក្រោយ បណ្ដាលឲ្យរថយន្តក្រុង វីរៈប៊ុនថាំ ធ្លាក់ផ្លូវ និងក្រឡាប់មួយចំហៀងរថយន្ត។
លោក អធិការនគរបាលស្រុកសូទ្រនិគម បានបន្ថែមថា ក្នុងហេតុការណ៍គ្រោះថ្នាក់ចរាចរណ៍រវាងរថយន្តទាំងពីរ មានអ្នករងរបួសសរុប ចំនួន ១៤នាក់ ក្នុងនោះស្រី៤នាក់ ដោយនៅក្នុងរថយន្តក្រុង វីរៈប៊ុនថាំ មានអ្នករងរបួសធ្ងន់បាក់ជើងម្នាក់ និងរងរបួសស្រាល ១១នាក់ ក្នុងនោះស្រី ៣នាក់ និងក្នុងនោះដែរ មានជនបរទេស២នាក់ ដោយស្ត្រីម្នាក់ ជាជនជាតិកូឡុំប៊ី និងបុរសម្នាក់ទៀតជនជាតិអាយឡែន។ ដោយឡែក នៅក្នុងរថយន្តធុនដ្រា មានអ្នករងរបួសស្រាល ២នាក់ ក្នុងនោះស្រីម្នាក់។
សូមបញ្ជាក់ថា បុរសដែលបានបាក់ជើងក្នុងហេតុការណ៍គ្រោះថ្នាក់ចរាចរណ៍នេះ ត្រូវបានរថយន្តសង្គ្រោះបន្ទាន់របស់ស្រុកសូទ្រនិគម ដឹកយកទៅមន្ទីរពេទ្យបង្អែកខេត្តសៀមរាប ក្នុងគ្រោះថ្នាក់នេះដែរ ពុំបណ្ដាលឲ្យបាត់បង់ជីវិតមនុស្សឡើយ។
រូបភាព៖ បណ្ដាញសង្គមហ្វេសប៊ុក
អត្ថបទ៖ លោក សេង ផល្លី
