នាព្រឹកថ្ងៃទី៣០ ខែកញ្ញា ឆ្នាំ២០១៩នេះ អាជ្ញាធរជាតិអប្សរា បានរៀបចំពិធីក្រុងពលី ដើម្បីសុំការអនុញ្ញាតពីម្ចាស់ទឹកម្ចាស់ដី វត្ថុស័ក្តិសិទ្ធិដែលថែរក្សាតំបន់អង្គរ ក្នុងការជួសជុលប្រាសាទកណ្តាលស្រះស្រង់ឱ្យរួចផុតពីហានីភ័យទុកជាកេរតំណែលសម្រាប់កូនចៅជំនាន់ក្រោយ ក្រោមអធិបតីភាពលោក យិត ចាន់ដារដ្ឋ អគ្គនាយករង នៃអាជ្ញាធរជាតិអប្សរា , លោកជំទាវបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ , ព្រះវិជ័យរង្សីបណ្ឌិត ឡាច លាង ព្រះគ្រូអនុគណក្រុងសៀមរាប និង ព្រះសម្មទ្ធប្បកាសនីបណ្ឌិត តាត មហាទី ព្រះចៅអធិការវត្តព្រះឥន្ទកោសា រួមទាំងឯកឧត្តម លោកជំទាវ លោក លោកស្រី ជាមន្ត្រីនៃអាជ្ញាធរជាតិអប្សរាជាច្រើន ។
តាមប្រសាសន៍លោក យិត ចាន់ដារដ្ឋ បានឱ្យដឹងថា គម្រោងជួសជុលប្រាសាទកណ្តាលស្រះស្រង់ គឺជាសមិទ្ធផលទី២ បន្ទាប់ពីរហាត់ទឹកដែលជាអំណោយដ៏ថ្លៃថ្លារបស់លោកជំទាវបណ្ឌិត សៀង ចាន់ហេង ដែលបានរួមចំណែកក្នុងការជួសជុលបេតិកភណ្ឌជាមួយអាជ្ញាធរជាតិអប្សរា ដូច្នេះក្នុងនាមឱ្យថ្នាក់ដឹកនាំអាជ្ញាធរជាតិអប្សរា សូមថ្លែងអំណរគុណដល់លោកជំទាវ និងក្រុមការងារ ដែលជាអ្នកវិនិយោគទុនក្នុងវិស័យឯកជន តែងបានគិតគូរដល់វិស័យបេតិកភណ្ឌដែលកំពុងត្រូវការការរួមចំណែកពីសប្បុរសជនគ្រប់ទិសទី ដើម្បីជួសជុលមរតកវប្បធម៌ជាតិ ជាមួយស្ថាប័នរដ្ឋទាំងសំណង់បុរាណនិងការដាំកូនឈើ ដើម្បីលើកកម្ពស់ភាពបៃតងក្នុងតំបន់អង្គរ ដែលកិច្ចការនេះដែរ គឺលោកជំទាវពិតជាគំរូមួយដែលបានបំពេញកាតព្វកិច្ចយ៉ាងល្អក្នុងនាមជាកូនខ្មែរមួយរូប ដែលត្រូវតែមានចំណែកក្នុងការការពារ ថែរក្សាមរតកដូនតាដោយខានពុំបាន។
ក្នុងនាមសប្បុរសជនជួយជួសជុលប្រាសាទកណ្តាលស្រះស្រង់ លោកជំទាវបណ្ឌិត សៀង ចាន់ហេង បានសម្តែងនូវសេចក្តីរីករាយដែលបានចូលរួមក្នុងពិធីក្រុងពលីសុំម្ចាស់ទឹកម្ចាស់ដី ទសបារមីនៃតំបន់អង្គរ ក្នុងការជួសជុលប្រាសាទកណ្តាលស្រះស្រង់ឱ្យមានភាពរូបរាងឡើងវិញរួចចាកផុតពីភាពខ្ទេចខ្ទាំ និង បានថ្លែងអំណរគុណដល់អាជ្ញាធរជាតិអប្សរាដែលបានឱ្យវិស័យឯកជន រួមចំណែកក្នុងកិច្ចការពារ ថែរក្សា កសាង និង អភិរក្សនូវសមិទ្ធផលមរតកបេតិកភណ្ឌដែលដូនតាបន្សល់ទុកឱ្យ ហើយលោកជំទាវសន្យាថានឹងបន្តកិច្ចការនេះជាបន្តបន្ទាប់ទៅតាមលទ្ធភាព និងឱកាសដែលអាចធ្វើទៅបាន។
សូមបញ្ជាក់ដែរថា ប្រាសាទកណ្តាលស្រះស្រង់បានកសាងឡើងក្នុងរាជ្យព្រះបាទជ័យវរ្ម័នទី៧ សតវត្សទី១២ ជាតំណាងឱ្យភ្នំព្រះសុមេរុ ខណៈបច្ចុប្បន្នប្រាសាទនេះ បានរងការបាក់បែកជាខ្លាំងដោយសារកត្តាធម្មជាតិ ហើយដើម្បីលើកតម្លៃប្រវត្តិសាស្ត្រ សំណង់ប្រាសាទ និងទេសភាពវប្បធម៌នៃស្រះស្រង់ឡើងវិញនោះ អាជ្ញាធរជាតិអប្សរានិងវិស័យឯកជនបានរួមដៃគ្នាជួសជុលប្រាសាទនេះឡើងវិញ។
ដំណើរការជួសជុល គ្រោងនឹងចាប់ផ្តើមឡើងនៅរដូវប្រាំង ព្រោះទឹករីងងាយស្រួលក្នុងការធ្វើកំណាយស្រាវជ្រាវ និងជួសជុល ហើយបច្ចុប្បន្ននេះ អាជ្ញាធរជាតិអប្សរានឹងធ្វើការសិក្សាលម្អិតទាក់ទងនឹងប្រាសាទ រួមទាំងផ្នែកបុរាណវិទ្យា ហើយឆ្លងយោបល់ក្នុងកិច្ចប្រជុំអាយស៊ីស៊ី-អង្គរ ដែលនឹងប្រព្រឹត្តិទៅនាខែធ្នូខាងមុខនេះ ទើបដំណើរការជួសជុលបាន ៕
អត្ថបទ និង រូបថត ៖ លោក ឃុត សៅ និង លោក យូ វង្ស
កែសម្រួលអត្ថបទ ៖ លោក លីវ សាន្ត
