កាលពីថ្ងៃទី២៦ ខែកញ្ញា ឆ្នាំ២០១៩កន្លងទៅនេះ ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានចេញលិខិតមួយ ជម្រាបជូនឯកឧត្តម លោកជំទាវ លោកឧកញ៉ា លោក លោកស្រី ម្ចាស់ស្ថានីយវិទ្យុ ទូរទស្សន៍ ចាងហ្វាងកាសែត ទស្សនាវដ្ដី និងម្ចាស់ប្រព័ន្ធផ្សព្វផ្សាយតាមអនឡាញទាំងអស់ ចូលរួមផ្សព្វផ្សាយខ្លឹមសារសកម្មភាពក្នុងឱកាសទិវាមនុស្សចាស់កម្ពុជា និងទិវាមនុស្សចាស់អន្តរជាតិ ដែលនឹងប្រព្រឹត្តទៅនាថ្ងៃទី០១ ខែតុលា ឆ្នាំ២០១៩នេះ ។
តាមខ្លឹមសារនៃលិខិត ឯកឧត្ដម ខៀវ កាញារីទ្ធ បានបញ្ជាក់ថា រាជរដ្ឋាភិបាលកម្ពុជា នឹងរៀបចំទិវាមនុស្សចាស់កម្ពុជា និង ទិវាមនុស្សចាស់អន្តរជាតិ នាថ្ងៃទី០១ ខែតុលា ឆ្នាំ២០១៩ ស្របតាមគោលនយោបាយជាតិ ស្តីពីមនុស្សវ័យចាស់ នៃព្រះរាជាណាចក្រកម្ពុជា និងសេចក្តីសម្រេចរបស់អង្គការសហប្រជាជាតិ ក្នុងគោលបំណងលើកស្ទួយសុខមាលភាពរបស់មនុស្សវ័យចាស់ឱ្យកាន់តែប្រសើរឡើងថែមទៀត និង ជាការរំលឹកដល់គុណូបការៈរបស់មនុស្សវ័យចាស់កម្ពុជា បុព្វការីជន ដែលបានផ្តល់នូវចំណេះដឹង ចំណេះធ្វើ បទពិសោធន៍ និងបានកសាង ព្រមទាំងបន្សល់ទុកនូវមរតកដ៏ថ្លៃថ្លាសម្រាប់កូនចៅជំនាន់ក្រោយយ៉ាងច្រើនឥតគណនា ។
ឯកឧត្ដម ខៀវ កាញារីទ្ធ បានបញ្ជាក់បន្ថែមថា ក្នុងឱកាសដ៏មានសារសំខាន់នេះ សង្ឃឹមថា ឯកឧត្តម លោកជំទាវ លោក លោកស្រីម្ចាស់ប្រព័ន្ធផ្សព្វផ្សាយទាំងអស់ ចូលរួមផ្សព្វផ្សាយឱ្យបានទូលំទូលាយ នូវខ្លឹមសារសកម្មភាពទិវាមនុស្សចាស់កម្ពុជា និងទិវាមនុស្សចាស់អន្តរជាតិ នាថ្ងៃទី០១ខែតុលាឆ្នាំ២០១៩នេះ ដើម្បីបំផុសស្មារតីបងប្អូនប្រជាពលរដ្ឋទាំងអស់ បានយល់ដឹងកាន់តែច្បាស់អំពីអត្តន័យ នៃទិវាមនុស្សចាស់កម្ពុជា និងទិវាមនុស្សចាស់អន្តរជាតិ៕
ព័ត៌មានជាតិ ថ្មីៗ
សម្រួលអត្ថបទ ៖ លោក លីវ សាន្ត
