ជនសង្ស័យ២នាក់ លួចរថយន្តមួយគ្រឿង នៅក្បែរតំបន់ផាប់ស្ទ្រីត ក្នុងក្រុងសៀមរាប ត្រូវសមត្ថកិច្ចឃាត់បាន នៅព្រឹកវេលាម៉ោង ១:៣០នាទីអាធ្រាត្រ ថ្ងៃទី៣០ ខែកញ្ញា ឆ្នាំ២០១៩នេះ បន្ទាប់ពីបានបើករថយន្តរត់ ហើយទៅបុកមនុស្សម្នាក់ស្លាប់ នៅតាមបណ្ដោយផ្លូវជាតិលេខ៦ ស្ថិតនៅភូមិសណ្តាន់ សង្កាត់ទឹកវិល ក្រុងសៀមរាប ។
តាមការឲ្យដឹងពី លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប នៅវេលាម៉ោង ៧ល្ងាច ម្ចាស់រថយន្ត បានបើករថយន្តម៉ាកតូយូតា ព្រៀស ពាក់ស្លាកលេខភ្នំពេញ ២AY-៨១៩៥ មកចតនៅចំណុចមាត់ស្ទឹងខាងកើតផ្សារ អាតស៊ីនធ័រ ភូមិវត្តដំណាក់ សង្កាត់សាលាកំរើក ក្រុងសៀមរាប ដើម្បីមកលេងនៅតំបន់ផាប់ស្ទ្រីត ប៉ុន្តែបានភ្លេច និងទុកកូនសោរនៅជាប់នៅនឹងរថយន្ត។ លុះរហូតដល់ម៉ោង១ រំលងអធ្រាត ឈានចូលថ្ងៃទី៣០ ខែកញ្ញា ឆ្នាំ២០១៩ ជនរងគ្រោះបានត្រលប់មកវិញ ដើម្បីធ្វើដំណើរទៅផ្ទះសំណាក់ ប៉ុន្តែពុំឃើញរថយន្តនៅនឹងកន្លែងឡើយ។
បន្ទាប់ពីទទួលបានពាក្យបណ្ដឹងរបស់ជនរងគ្រោះនៅថ្ងៃដដែលនេះ កម្លាំងអធិការដ្ឋាននគរបាលក្រុង បានសហការជាមួយកម្លាំងអធិការស្រុកពួក ធ្វើការឃាត់រថយន្តមួយគ្រឿង ដែលមានម៉ាក និងភិនភាគដូចខាងលើ នៅវេលាម៉ោង ១:៣០នាទីអាធ្រាត្រ។ ដោយឡែក មុនធ្វើការឃាត់ខ្លួនបានជនសង្ស័យទាំងពីរនាក់នេះ ពួកគេបាន បើករថយន្តរត់គេចខ្លួន បណ្ដាលឲ្យបុកមនុស្សម្នាក់ស្លាប់ នៅតាមបណ្តោយផ្លូវជាតិលេខ៦ ស្ថិតនៅក្នុងភូមិសណ្តាន់ សង្កាត់ទឹកវិល ក្រុងសៀមរាប ចំណែកសាកសព សមត្ថកិច្ចនៅពុំទាន់ស្គាល់អត្តសញ្ញាណនៅឡើយ។
ព័ត៌មានជាតិ ថ្មីៗ
ជនសង្ស័យចំនួន ០២នាក់ ដែលសមត្ថកិច្ចឃាត់ខ្លួនបាន មានទី១ ឈ្មោះ ហួត រស្មី ភេទប្រុស អាយុ៣៧ឆ្នាំ មានទីលំនៅមិនពិតប្រាកដ ស្រុកកំណើត ភូមិផ្សារក្រោម ឃុំផ្សារក្រោម ស្រុកកំពង់ឆ្នាំង ខេត្តកំពង់ឆ្នាំង ទី២ ឈ្មោះ លុន ឡៃហេង ភេទប្រុស អាយុ២៧ឆ្នាំ មុខរបរ ជាងជួសជុលរថយន្ត មានទីលំនៅភូមិជន្លង់ សង្កាត់សាលាកំរើក ក្រុងសៀមរាប ។ រីឯជនរងគ្រោះជាម្ចាស់រថយន្ត មានឈ្មោះ មាន ម៉ីម៉ី ភេទស្រី អាយុ ២២ឆ្នាំ រស់នៅសង្កាត់បឹងកក់ ខណ្ឌទួលគោក រាជធានីភ្នំពេញ។
អត្ថបទ និងរូបភាព៖ លោក ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
