នៅព្រឹកថ្ងៃទី២៦ ខែកញ្ញា ឆ្នាំ២០១៩នេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានដឹកនាំក្រុមគ្រូពេទ្យ ដែលអមដំណើរដោយលោកស្រីវេជ្ជបណ្ឌិត ឡាក់ មួយស៊ាង អនុប្រធាននាយកដ្ឋានការពារសុខភាព នៃក្រសួងសុខាភិបាល លោកវេជ្ជបណ្ឌិត មួង ណារិន អនុប្រធានមន្ទីរសុខាភិបាលខេត្តសៀមរាប លោកអភិបាលស្រុកអង្គរជុំ ថ្នាក់ដឹកនាំនិងមន្ត្រីរាជការនៃមន្ទីរសុខាភិបាលខេត្តសៀមរាប ដោយនាំយកទៅជាមួយឱសថនិងបរិក្ខាពេទ្យ ឱសថប្រឆាំងពិសពស់ (ទាំង២មុខ) ឱសថគ្លរ៉ាមីន កញ្ចប់អនាម័យគ្រួសារ ដែលសរុបទាំងអស់មានចំនួន៣៣មុខ សម្រាប់ព្យាបាលជំងឺ និងមុងជ្រលក់ថ្នាំសម្រាប់ចែកជូនគ្រួសារប្រជាពលរដ្ឋដែលរងគ្រោះដោយសារទឹកជំនន់ប្រមាណ ជាង ៣០០គ្រួសារ និង សម្រាប់មន្ទីរសុខាភិបាលប្រើប្រាស់ក្នុងការផ្តល់សេវាសុខភាពជូនពួកគាត់ផងដែរ ។
មានប្រសាសន៍ក្នុងឱកាសនោះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចទាំងទ្វេតែងតែមានការគិតគូរយកចិត្តទុកដាក់ដល់សុខទុក្ខប្រជាជនទូទៅ ជាពិសេសកំឡុងពេលមានទឹកជំនន់នេះ និងការផ្តាំផ្ញើលើការរក្សាសុខភាពព្រមទាំងការជូនពរសុខភាពល្អពីសំណាក់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ជូនដល់បងប្អូនប្រជាពលរដ្ឋទាំងអស់ ។
លោកជំទាវវេជ្ជបណ្ឌិត ឱ វណ្ណឌីន បានណែនាំដល់ប្រជាពលរដ្ឋទាំងឱ្យចេះប្រុងប្រយ័ត្នមុនពេល ក្នុងកំឡុងពេល ក្រោយពេលទឹកជំនន់ដូចជា ការហូបស្អាត ផឹកស្អាត រស់នៅស្អាត ដើម្បីចៀសវាងជំងឺផ្សេងៗដូចជា ជំងឺរាករូស ជំងឺរាកមួល ផ្តាសាយ ជំងឺគ្រុនចាញ់ ជំងឺគ្រុនឈាម ពុលចំណីអាហារ ជំងឺរលាកផ្លូវដង្ហើមស្រួចស្រាវ និងជំងឺដទៃផ្សេង ទៀត ដោយត្រូវសំរាន្តក្នុងមុងគ្រប់ពេលដើម្បីការពារជំងឺគ្រុនឈាម គ្រុនចាញ់ និងជំងឺផ្សេងៗ ជាពិសេសត្រូវប្រុងប្រយ័ត្ននូវគ្រោះថ្នាក់លង់ទឹក ពស់ចឹក ខ្សែភ្លើងឆក់ ដែលបណ្តាលឱ្យបាត់បង់ដល់អាយុជីវិត ហើយចំពោះស្ត្រីមានផ្ទៃពោះត្រូវតាមដាននិងពិនិត្យផ្ទៃពោះតាមការកំណត់របស់មណ្ឌលសុខភាព ឬមន្ទីរពេទ្យ ហើយត្រូវយកកូនទៅទទួលថ្នាំបង្ការឱ្យបានទៀងទាត់ទាំងមុនពេល ក្នុងពេល និងក្រោយពេលទឹកជំនន់ ប្រសិនបើលោកអ្នកមានបញ្ហាសុខភាពសូមស្វែងរក ការពិគ្រោះ ពិនិត្យ និងព្យាបាលជំងឺជាបន្ទាន់នៅប៉ុស្តិ៍សុខភាពក្បែរទីទួលសុវត្ថិភាព ឬមណ្ឌលសុខភាព ឬមន្ទីរពេទ្យ ដែលនៅជិតលោក អ្នកបំផុត។
ព័ត៌មានជាតិ ថ្មីៗ
សូមបញ្ជាក់ថា ទឹកជំនន់នៅក្នុងស្រុកអង្គរជុំនេះ គឺបន្ទាប់ពីមានភ្លៀងធ្លាក់ខ្លាំងជាប់ៗគ្នាប៉ុន្មានថ្ងៃកន្លងមកនេះ បានបង្កឱ្យមានទឹកជំនន់កើតឡើងចាប់តាំងពីម៉ោង៨យប់ថ្ងៃទី២៣ ខែកញ្ញា ឆ្នាំ ២០១៩ ដោយបានធ្វើឱ្យលិច សាលារៀន មន្ទីរពេទ្យ ផ្សារ ផ្ទះប្រជាពលរដ្ឋ និងផ្លូវ ពិសេសបានធ្វើឱ្យផ្ទះប្រជាពលរដ្ឋចំនួន៤២០ខ្នងនៅក្នុងឃុំដូនពេង ទទួលរងគ្រោះលិចទឹកនេះ ក្នុងនោះមាន ផ្ទះប្រមាណ៣០០ខ្នង នៅក្នុងភូមិបេង និងភូមិខ្ចាស់ មានការលិចខ្លាំងជាងគេ ខណៈអ្នកជំងឺចំនួន៤២នាក់ដែលស្នាក់នៅព្យាបាលនៅក្នុងមន្ទីរពេទ្យបង្អែកអង្គរជុំ ត្រូវបានបញ្ជូនចេញទៅកាន់មន្ទីរពេទ្យស្រុកពួក ហើយនៅព្រឹកថ្ងៃទី២៤ ខែកញ្ញា ឆ្នាំ២០១៩នេះ លោក ពិន ប្រាកដ អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណ:អភិបាលខេត្តសៀមរាប បានដឹកនាំកម្លាំងចម្រុះមានអនុប្រធានមន្ទីរសុខាភិបាលខេត្ត គណៈអភិបាលស្រុក កងរាជអាវុធហត្ថស្រុក ប្រធានមន្ទីរបង្អែកអង្គរជុំ បានចុះពិនិត្យស្ថានភាពទឹកជំនន់ផ្ទាល់នៅតំបន់មួយចំនួនក្នុងស្រុកអង្គរជុំ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
