សមត្ថកិច្ចនគរបាលស្រុកស្រីស្នំ បានឲ្យដឹងថា បុរសម្នាក់ឈ្មោះ សាន គង់ ភេទប្រុស អាយុ៣៧ឆ្នាំ រស់នៅភូមិភ្នំដី ឃុំស្លែងស្ពាន ស្រុកស្រីស្នំ មានមុខរបរកសិករ ត្រូវសមត្ថកិច្ចនគរបាលស្រុកស្រីស្នំ ចាប់ឃាត់ខ្លួន ដោយជាប់សង្ស័យសម្លាប់ឪពុកបង្កើតរបស់ខ្លួន ដោយបានយកកាំបិតខ្វែវដងឈើ កាប់ទៅលើឪពុកបង្កើតឈ្មោះ រៀល វឿង ភេទ ប្រុស អាយុ៦៦ឆ្នាំ រស់នៅភូមិភ្នំដី ឃុំស្លែងស្ពាន មានមុខរបរ អនុប្រធានភូមិ បណ្តាលឲ្យដាច់-កស្លាប់តែម្តង កាលពីវេលាម៉ោង៣និង៣០នាទីរសៀល ថ្ងៃទី២៥ ខែកញ្ញា ឆ្នាំ ២០១៩ ។
សមត្ថកិច្ចនគរបាលស្រុកស្រីស្នំ បានឲ្យដឹងថា បន្ទាប់ពីទទួលបានព័ត៌មានភ្លាម កម្លាំងសមត្ថកិច្ចបានចុះទៅកន្លែងកើតហេតុ ព្រមទាំងបានធ្វើការហ៊ុពទ្ធ័ចាប់ និង ធ្វើការឃាត់ខ្លួនជនសង្ស័យនៅកន្លែងកើតហេតុបានភ្លាមៗផងដែរ ហើយបើតាមការបំភ្លឺរបស់ប្រពន្ធជនរងគ្រោះ ដែលត្រូវជាម្តាយបង្កើតជនសង្ស័យ បានបំភ្លឺឲ្យដឹងថា កូនគាត់ជាជនវិកលចរិក ប៉ុន្តែគ្មានឯកសារបញ្ជាក់នោះទេ ខណៈបច្ចុប្បន្នសមត្ថកិច្ចបានកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាក់ការទៅតាមផ្លូវច្បាប់ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
