ក្នុងឱកាសអញ្ជើញជាអធិបតីក្នុងពិធីចែកវិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈគរុកោសល្យ និងនិស្សិតបញ្ចប់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់សរុប ១.១៨៣នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី០២ ខែតុលា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានមានប្រសាសន៍ថា៖ «ខ្ញុំសូមបញ្ជាក់ថា កាលមុនទឹកធំពេកក៏យើងមិនអុំ ទឹកតូចពេកក៏យើងមិនអុំ ប៉ុន្តែឆ្នាំនេះ បើទោះបីជាទឹកនៅតែ១ម៉ែត្រ ក៏ត្រូវតែអុំដែរ ព្រោះខ្ញុំក៏ចង់ស្គាល់រស់ជាតិរបស់ដែលហៅថា ” មកផ្តួលរំលំ ហ៊ុន សែន ” នៅថ្ងៃទី០៩ (វិច្ឆិកា) ” ព្រោះយើង ថ្ងៃទី១០-១១-១២ យើងអុំទូក បើយើងមិនអុំទូក វាថាយើងហ្នឹងចាញ់» ។
សម្តេចតេជោ ហ៊ុន សែន មានប្រសាសន៍បន្ថែមថា « មានតែ១ ម៉ែត្រ ក៏អុំដែរ ដើម្បីសំពងក្បាលអ្នកឯង ខ្ញុំបន់ឱ្យតែដល់ថ្ងៃនោះទេ» ដែលកាលមុនទឹកនៅសល់៣ម៉ែត្រ រាជរដ្ឋាភិបាលអត់រៀបចំពិធីបុណ្យអុំទូកទេ ឆ្នាំទៅមុននេះទឹកមានកម្ពស់៥ម៉ែត្រ ដែលអាចរៀបចំពិធីបុណ្យអុំទូកបាន តែឆ្នាំនេះ បើធ្លាក់នៅត្រឹម១ម៉ែត្រ ក៏ត្រូវតែអុំដោយយកទូកតូចទៅអុំ ។
សូមបញ្ជាក់ថា រាជរដ្ឋាភិបាលកម្ពុជា ធ្លាប់បានផ្អាកការរៀបចំព្រះរាជពិធីបុណ្យអុំទូករយៈពេល ៣ឆ្នាំជាប់ៗគ្នា កាលពីឆ្នាំ២០១១ ដល់ឆ្នាំ២០១៣។ ការផ្អាកនេះ ដោយសារមូលហេតុធំៗមួយចំនួន ដូចជាទឹកជំនន់ ការសោយទិវង្គត់របស់អតីតព្រះមហាក្សត្រ និងភាពវឹកវរក្រោយការបោះឆ្នោតជាដើម ។ ទោះជាយ៉ាងនេះក្តី ព្រះរាជពិធីបុណ្យ ដែលជាបុណ្យប្រពៃណីជាតិ ក៏ត្រូវបានរៀបចំឡើងវិញជាធម្មតាឡើងវិញ ជាបន្តបន្ទាប់ផងដែរ៕
ប្រភព ៖ Fresh News
