លោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្តសៀមរាប ទទួលបន្ទុកផ្នែកព្រហ្មទណ្ឌ បានបញ្ជាក់ថា : កាលពីវេលាម៉ោង ០៩ព្រឹក នាថ្ងៃទី០១ ខែតុលា ឆ្នាំ២០១៩នេះ កម្លាំងប៉ុស្តិ៍នគរ បាលរដ្ឋបាលសង្កាត់ស្លក្រាម សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់សាលាកំរើក និងកម្លាំងប៉ុស្តិ៍នគរបាលរដ្ឋបាលសង្កាត់ ជ្រាវ បានឃាត់ខ្លួនបុរសម្នាក់ឈ្មោះ ហួ ខួច អាយុ ៣៥ឆ្នាំ មុខរបរបុគ្គលិកលក់ភេសជ្ជៈខារ៉ាបាវ មានទីលំនៅជួលបន្ទប់ស្នាក់នៅ ភូមិជន្លង់ សង្កាត់សាលាកំរើក ក្រុងសៀមរាប ជាប់សង្ស័យពាក់ព័ន្ធនឹងករណីអំពើលួចមានស្ថានទម្ងន់ទោស គឺ ឆក់កាបូប បន្ទាប់ ពីការស្រាវជ្រាវរបស់សមត្ថកិច្ច ដែលជនសង្ស័យធ្វើសកម្មភាពឆក់កាបូប កាលពីថ្ងៃទី២៨ ខែកញ្ញា ឆ្នាំ២០១៩ កន្លងទៅនេះ ។
លោកឧត្តមសេនីយ៍ត្រី ភឹង ចិន្តារ៉េត បានបញ្ជាក់បន្ថែមថា កាលពីវេលាម៉ោង១៥និង៣០នាទី ថ្ងៃទី២៨ ខែកញ្ញា ឆ្នាំ២០១៩ ជនរងគ្រោះឈ្មោះ សុខ ជីលីញ ភេទស្រី អាយុ១៩ឆ្នាំ មុខរបរបុគ្គលិកខារ៉ាអូខេកាឡាក់ស៊ី បានចេញពីធ្វើការមកផ្ទះ ស្រាប់តែមានជនសង្ស័យម្នាក់មិនស្គាល់ឈ្មោះ ជិះម៉ូតូម៉ាកហុងដាឌ្រីម ពណ៌ខ្មៅ បិទតែមពណ៌មាស ជិះតាមពីក្រោយមកដល់ចំណុចមុខផ្ទះឈ្មោះ ប៉ាអាដូង ស្ថិតនៅក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប បានឈប់ម៉ូតូលើផ្លូវ ហើយធ្វើសកម្មភាពឆក់យកកាបូបពីជនរងគ្រោះ តែត្រូវជនរងគ្រោះបានទាញយកកាបូបពីជនសង្ស័យបានវិញ ហើយស្រែកឲ្យអ្នកជិតខាងមកជួយ ពេលនោះឈ្មោះ ប៉ាអាដូង បាន មកជួយចាប់តែត្រូវបានជនសង្ស័យរើបម្រាស់រត់គេចខ្លួនបាត់។
លោកឧត្តមសេនីយ៍ត្រី ភឹង ចិន្តារ៉េត បានបញ្ជាក់បន្ថែមទៀតថា លុះថ្ងៃទី០១ ខែតុលា ឆ្នាំ២០១៩ នេះ សមត្ថកិច្ចបានឃាត់ខ្លួនជនសង្ស័យ នៅចំណុចក្រុមហ៊ុនខារ៉ាបាវ ស្ថិតនៅភូមិខ្នារ សង្កាត់ជ្រាវ ក្រុងសៀមរាប នាំខ្លួនមកធ្វើការសាកសួរនៅប៉ុស្តិ៍នគរបាលរដ្ឋបាលសង្កាត់ជ្រាវ ហើយនៅចំពោះមុខសមត្ថកិច្ច ជនសង្ស័យបានឆ្លើយសារភាពថា រូបគេរូបពិតជាបានធ្វើសកម្មភាពឆក់យក កាបូប ជនរងគ្រោះពិតប្រាកដមែន និង ក្រោយពីការសាកសួរ សមត្ថកិច្ចបានកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តតាមនីតិវិធី ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
