យោងតាមអនុក្រឹត្យលេខ ១៥៣ អនក្រ.បក ចុះថ្ងៃទី០៧ ខែតុលា ឆ្នាំ២០១៩នេះ ដែលចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឲ្យចេញផ្សាយ ធ្វើចរាចរ និង ប្រើប្រាស់ក្នុងទូទាំងព្រះរាជាណាចក្រកម្ពុជា នូវធនប័ត្រអនុស្សាវរីយ៍ ប្រភេទ១៥០០០រៀល ទន្ទឹមនឹងបណ្ដាប្រភេទប្រាក់ដែលត្រូវបានចេញផ្សាយរួចហើយ ។
គួររំលឹកថា រាជរដ្ឋាភិបាលកម្ពុជា បានបោះពុម្ពចេញផ្សាយនូវក្រដាសប្រាក់រៀលគំរូថ្មី ដែលរៀបចំឡើងដើម្បីអបអរសាទរក្នុងឱកាសដ៏មហានក្ខត្តឫក្សវិសេសវិសាល នៃព្រះរាជពិធីបុណ្យគម្រប់ខួប ១៥ព្រះវស្សា ការយាងគ្រងព្រះបរមសិរីរាជ្យសម្បត្តិ នៃព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលនឹងប្រារព្ធឡើងនៅថ្ងៃទី២៩ ខែតុលា ឆ្នាំ២០១៩ខាងមុខនេះ និង ដើម្បីឲ្យសាធារណជនបានជ្រួតជ្រាបកាន់តែច្បាស់ អំពីក្រដាសប្រាក់គំរូថ្មី ១៥០០០រៀលនេះ ធនាគារជាតិនៃកម្ពុជា ក៏បានចេញប្រកាសពន្យល់ពីលក្ខណៈសម្គាល់នៃក្រដាសប្រាក់ថ្មីនេះផងដែរ ។
សូមបញ្ជាក់ថា មានប្រទេសជាច្រើនទៀតដែលបានបោះពុម្ពក្រដាសប្រាក់ថ្មី ដើម្បីរំលឹកពីព្រឹត្តការណ៍សំខាន់ៗរបស់ជាតិនៃប្រទេសនិមួយៗ រួមមាន ៖
– ក្រុងហុងកុង ឆ្នាំ២០១៥ បានផលិតក្រដាសប្រាក់ ១៥០ដុល្លារ ហុងកុង ដើម្បីរំលឹកខួប១៥០ឆ្នាំ នៃធនាគារ HSBC របស់ខ្លួន ,
– ប្រទេសថៃ ខែកក្កដា ឆ្នាំ២០១២ ក្រដាសប្រាក់ ៨០បាត បានបោះពុម្ពនិងប្រើប្រាស់ដើម្បីអបអរពិធីចម្រើនព្រះជន្មគម្រប់៨០ព្រះវស្សាព្រះមហាក្សត្រព្រះចៅភូមិវិបុល និង ក្រដាស ៦០បាត អបអរពិធីជម្រើនព្រះជន្មគម្រប់៦០ព្រះវស្សានៃមហាក្សត្រីយានី Mohavajira longkorn ,
– ប្រទេសម៉ាឡេស៊ី នៅឆ្នាំ២០១៨ បានបោះពុម្ពក្រដាសប្រាក់ ៦០ និង ៦០០ Ringgit សម្រាប់អបអរខួប៦០ឆ្នាំនៃការទទួលបានឯករាជ្យ ,
– សហភាពមីយ៉ាន់ម៉ា នៅឆ្នាំ១៩៨៧ បានបោះពុម្ពក្រដាសប្រាក់ ៩០ Kyats ,
– ប្រទេសអ៊ីតាលីបានបោះពុម្ពក្រដាសប្រាក់ ៦០ Lire នៅឆ្នាំ២០១៦ , សាធារណរដ្ឋឆេក បានបោះពុម្ពក្រដាសប្រាក់ ១៥០០០ CAT នៅឆ្នាំ១៩៩៣ ,
– ប្រទេសរ៉ូម៉ានី បានបោះពុម្ពក្រដាសប្រាក់ ១៥០០០ Ron នៅឆ្នាំ២០០៩ ,
– ធនាគារបង់ក្លាដែស បានបោះពុម្ពក្រដាសប្រាក់ថ្មី ៧០ kata នៅខែមីនា ឆ្នាំ២០១៨ ដើម្បីរំលឹកដល់ការអភិវឌ្ឍរបស់ប្រទេស និង
– ប្រទេសហ្សកហ្ស៊ី បានបោះពុម្ពក្រដាសប្រាក់ ១៥០០០០ Laris នៅឆ្នាំ១៩៩៤ ៕
សម្រួលអត្ថបទ ៖ លោក លីវ សាន្ត
