កាលពីរាត្រីថ្ងៃទី០៥ ខែតុលា ឆ្នាំ២០១៩នេះ ដែលជាថ្ងៃនៃទិវាគ្រូបង្រៀនពិភពលោក អតីតនិស្សិតនៃសាកលវិទ្យាល័យបៀលប្រាយ សាខាខេត្តសៀមរាប បានរៀបចំកម្មវិធីជួបជុំមិត្តជាលើកដំបូងរបស់ខ្លួន ដោយមានការអញ្ជើញចូលរួមពីសំណាក់ អស់លោក លោកស្រី ជាសាស្ត្រាចារ្យផងដែរ សរុបប្រមាណជា ៣៥០នាក់ ដោយបានចាត់ទុកថា ទិវា០៥តុលា ជាទិវាដ៏សំខាន់ និងមានអត្ថន័យបំផុតសម្រាប់ពួកគាត់ ដើម្បីផ្តល់បទពិសោធន៍សម្រាប់ធនធានមនុស្សជំនាន់ក្រោយ ។
លោកបណ្ឌិត ម៉ឹក គឹមស្រឿន នាយកសាខានៃសាកលវិទ្យាល័យបៀលប្រាយ (BBU) ខេត្តសៀមរាប បានឲ្យដឹងថា ៖ នៅក្នុងកម្មវិធីជួបជុំគ្នានេះ វាបានបង្កើតឡើងនូវអត្ថប្រយោជន៍ជាច្រើន ដោយសារតែអតីតនិស្សិតទាំងនោះ បច្ចុប្បន្នបានក្លាយជាកោសិកាសង្គមដ៏ពេញលេញ មួយចំនួនមានមុខតំណែងកំពុងបំរើការងារជាមន្ត្រីរាជការក្នុងជួររាជរដ្ឋាភិបាល មួយចំនួនជាអាជីវករ ពាណិជ្ជករ សហគ្រិន បុគ្គលិកបំរើការងារក្នុងក្រុមហ៊ុននានា ជាដើម ។ល។ ដូច្នេះកម្មវិធីជួបជុំមិត្តអតីតនិស្សិតនៃសាកលវិទ្យាល័យមួយនេះ វាត្រូវបានបង្កើតឡើងជាវេទិកាមួយ ដែលមិនត្រឹមតែជាការផ្តល់ឲ្យគ្នានូវសេចក្តីនឹករលឹកប៉ុណ្ណោះទេ តែកាន់តែប្រសើរជាងនេះ គឺជាវេទិកានៃការដកស្រង់ពិសោធន៍ឲ្យគ្នាទៅវិញទៅមក ដែលជាពិសេសនោះ គឺជាឱកាសដែលពួកគេបានផ្តល់នូវភាពកត្តញ្ញូ ដឹងគុណមួយជីវិត ចំពោះគ្រូបង្រៀន ដែលជាឱពុកម្តាយទី២របស់ខ្លួន ។
លោកបណ្ឌិត ម៉ឹក គឹមស្រឿន បានឲ្យដឹងទៀតថា ៖ សម្រាប់កម្មវិធីនេះ គឺបានបង្កើតឱកាសនៃការភ្ជាប់ទំនាក់ទំនង សហការជ្រោម ជ្រែងចាប់ដៃគូមុខរបរនិងការងារ ចែករំលែកព័ត៌មាន បទពិសោធន៍ជោគជ័យ ដើម្បីការអភិវឌ្ឍធនធានមនុស្សជំនាន់ក្រោយ ហើយអ្វីដែលជាគោលបំណងធំរបស់កម្មវិធីជួបជុំគ្នានេះផងដែរ គឺការរួបរួមសាមគ្គីគ្នាបង្កើតគំនិតដើម្បីការងារសង្គមនិងសប្បរសធម៌ ដូចជាការចូលរួមការងារការពារបរិស្ថាន បង្កើតមូលនិធិសប្បុរសធម៌ជួយដល់មន្ទីរពេទ្យកុមារគន្ធបុប្ផា មន្ទីរពេទ្យកុមារអង្គរ ជួយដល់ មនុស្សចាស់ជរាទុរគត និងកុមារដែលខ្វះខាតក្នុងជីវភាពសិក្សា ។
ព័ត៌មានជាតិ ថ្មីៗ
លោក ឈន សាំងសានុត អតីតនិស្សិតសាកលវិទ្យាល័យបៀលប្រាយសាខាខេត្តសៀមរាប បច្ចុប្បន្នជាម្ចាស់ដេប៉ូលក់ជីសរីរាង្គមួយកន្លែងនៅក្រុងសៀមរាប មានចំណាប់អារម្មណ៍ថា លោករីករាយជាមួយ នឹងការចូលរួមក្នុងកម្មវិធីនេះ ពិតជារំភើបខ្លាំងណាស់ ជាឱកាសដ៏ប្រសើរដល់ការផ្ញើជូននូវការដឹងគុណគ្រូបង្រៀន និងបានចូលរួមក្នុងកិច្ចការសង្គម ដែលជាកាតព្វកិច្ចរបស់ពលរដ្ឋល្អនៃកម្ពុជា ។
សូមបញ្ជាក់ថា នៅក្នុងកម្មវិធីជួបជុំមិត្តអតីតនិស្សិតលើកទី១នេះ មានការប្រមូលមូលនិធិសប្បុរស ដើម្បីការងារសង្គម ដោយទទួលបានថវិកាចំនួន ១.៦០០ដុល្លារអាមេរិក ក្នុងនេះ ថវិកាចំនួន ៥០០ដុល្លារត្រូវបានបែងចែកផ្តល់ជូនមន្ទីរពេទ្យកុមាគន្ធបុប្ផា , ថវិកា៥០០ ដុល្លារទៀត សម្រាប់ឧបត្ថម្ភជូនមន្ទីរពេទ្យកុមារអង្គរ , ថវិកា ៣០០ ដុល្លារទៀត សម្រាប់គោលដៅជួយដល់មនុស្សចាស់ជរាទុរគត និង ថវិកា៣០០ ដុល្លារផ្សេងទៀត សម្រាប់ការឧបត្ថម្ភដល់សិស្សកុមារ ដែលមានកង្វះខាតក្នុងជីវភាពសិក្សា ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
