បច្ចុប្បន្ន កម្ពុជាត្រូវការធនធានមនុស្ស ប្រមាណជិតពីរសែននាក់បន្ថែមទៀត ដើម្បីឆ្លើយតបទៅនឹងតម្រូវការក្នុងវិស័យទេសចរណ៍ ខណៈវិស័យដ៏សំខាន់មួយនេះ គិតទាំងវិស័យដឹកជញ្ជូន បាននិងកំពុងស្រូបយកកម្លាំងពលកម្ម ប្រមាណជាង១លាននាក់រួចមកហើយ នេះបើតាមប្រសាសន៍របស់លោក ពិន ប្រាកដ អភិបាលរង ខេត្តសៀមរាប ក្នុងពិធីបើកកម្មវិធីពិព័រណ៍ ANGKOR FOOD HOTEL ២០១៩ នៅសណ្ឋាគារ សុខាសៀមរាប ថ្ងៃទី១០ ខែតុលា ឆ្នាំ២០១៩នេះ។
ព្រឹត្តិការណ៍ពិព័រណ៌ ពាណិជ្ជកម្មផ្នែកម្ហូបអាហារ ភេសជ្ជ: សណ្ឋាគារ និងបដិសណ្ឋារកិច្ចខ្នាតអន្តរជាតិលំដាប់អន្តរជាតិចំណាត់ថ្នាក់លេខមួយ នៅខេត្តសៀមរាបនេះ មានការចូលរួមពីក្រុមហ៊ុនចំនួន១៥០ក្រុមហ៊ុន ដែលមកពីជាង១០ប្រទេស។
លោក ពិន ប្រាកដ បានវាយតម្លៃខ្ពស់ ចំពោះកម្មវិធីពិព័រណ៍ ANGKOR FOOD HOTEL ២០១៩នេះ ថាមិនត្រឹមតែអាចបង្កើនគុណភាព នៃការបណ្តុះបណ្តាលធនធានមនុស្សក្នុងវិស័យសេវាកម្ម សម្រាប់សណ្ឋាគារ និងផ្នែកទេសចរណ៍ប៉ុណ្ណោះទេ ប៉ុន្តែថែមទាំងផ្តល់ឱកាសការងារលើជំនាញទេសចរណ៍ និងបដិសណ្ឋារកិច្ចដល់ប្រជាជនកម្ពុជា ដែលជាកត្តាមួយជួយជំរុញដល់កំណើនសេដ្ឋកិច្ចកម្ពុជាផងដែរ។
ព័ត៌មានជាតិ ថ្មីៗ
លោក ឡុង ប៊ុនហោ ប្រធានសមាគមចុងភៅកម្ពុជាលើកឡើងថា ក្នុងនាមសមាគមចុងភៅកម្ពុជា បានត្រៀមរួចជាស្រេច ផ្សព្វផ្សាយមុខម្ហូបខ្មែរ ឱ្យភ្ញៀវទេសចរណ៍ជាតិ និងអន្តរជាតិបានស្គាល់ តាមរយៈការធ្វើបទបង្ហាញអំពិម្ហូបខ្មែរ ការរៀបចំសោភណ្ឌភាព និងអនាម័យម្ហូបអាហារ។
សូមជំរាបថា ព្រឹត្តិការណ៍ពិព័រណ៌ ANGKORFOOD+HOTEL និង ANGKOR BUILD 2019 EXPO ពាណិជ្ជកម្មផ្នែកម្ហូបអាហារ ភេសជ្ជ: សណ្ឋាគារ និងបដិសណ្ឋារកិច្ចខ្នាតអន្តរជាតិលំដាប់អន្តរជាតិចំណាត់ថ្នាក់លេខមួយនៅខេត្តសៀមរាប បានរៀបចំ និងកាត់ខ្សែបូរ ក្រោមអធិបតីភាពឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៌ នៅព្រឹកថ្ងៃទី១០ ខែតុលា ឆ្នាំ២០១៩ នៅសណ្ឋាគារសុខាសៀមរាប។ ក្រៅពីការតាំងបង្ហាញនូវសមិទ្ឋផលផ្សេងៗក៍មានកម្មវិធីបង្ហាញពីជំនាញចំអិនម្ហូប១១មុខពីចុងភៅកំពូល និងអ្នកជំនាញផ្នែកបដិសណ្ឋាកិច្ចតាមរយ:ការប្រកួត ដើម្បីដណ្តើមពាន “CAMBODIA’S BEST” ។ ការប្រកួតនេះរួមមានការប្រកួត Gourmet Challenge ការចំអិនអាម៉ុកត្រី ការធ្វើនំបុ័ង ការរចនាម៉ូតសូកូឡា និងម្ហូបដទៃទៀត។ ការចូលរួមទស្សនាពិព័រណ៌គឺមិនត្រូវបានគិតថ្លៃនោះទេ។ ពិព័រណ៌នេះចាប់ផ្តើមបើកចាប់ពីម៉ោង១០:០០ព្រឹក – ០៥:០០ល្ងាចពីថ្ងៃទី១០ដល់ថ្ងៃទី១២ខែតុលាឆ្នាំ២០១៩។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ សេង ផល្លី
