លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានឲ្យដឹងថា នៅវេលាម៉ោង ១៤ និង១០នាទី ថ្ងៃទី ១០ ខែតុលា ឆ្នាំ ២០១៩នេះ កម្លាំងនគរបាលរដ្ឋបាលស្វាយដង្គុំ បានធ្វើការឃាត់ខ្លួន ជនសង្ស័យចំនួន ០៣ នាក់ ជាប់ពាក់ព័ន្ធករណី លួចទ្វាររបងផ្ទះរបស់ប្រជាពលរដ្ឋ នៅចំនុចដីឡូតិ៍មួយកន្លែង ស្ថិតនៅភូមិកន្ត្រក សង្កាត់ស្វាយដង្គំ ក្រុង/ខេត្តសៀមរាប ។
លោកវរសេនីយ៍ឯក បានបញ្ជាក់បន្ថែមថា ជនសង្ស័យទាំង ០៣នាក់រួមមាន៖ ទី១. ឈ្មោះ វុធ វ៉ាន់ ភេទប្រុស អាយុ 30 ឆ្នាំ មុខរបរដាំបន្លែលក់, ទី0២. ឈ្មោះវ៉ុន សារ៉ាត់ ហៅវ៉ាត់ ភេទប្រុស អាយុ 20 ឆ្នាំ មុខរបរមិនពិតប្រាកដ និងទី0៣. ឈ្មោះ បូ សំណាង ភេទប្រុស អាយុ 11 ឆ្នាំ មុខរបរសិស្ស ជនសង្ស័យទាំង ០៣នាក់រស់នៅក្នុងមូលដ្លានជាមួយគ្នា ស្ថិតក្នុងភូមិអារញ្ញ សង្កាត់សៀមរាប ក្រុង-ខេត្តសៀមរាប ។
បើតាមការសារភាពរបស់ជនសង្ស័យទាំង ០៣នាក់ បានប្រាប់សមត្ថកិច្ចថា មុនពេលកើតហេតុពួកគេទាំង ០៣នាក់ បាននាំគ្នាបើករ៉ឺម៉កម៉ូតូ មួយគ្រឿង មកធ្វើសកម្មភាពលួចទ្វាររបងធ្វើអំពីដែកចំនួនពីរផ្ទាំង មានប្រវែងប្រហែលជាង៣ម៉ែត្រ ជាទ្វាររបស់ម្ចាស់ ដីឈ្មោះ ទូច រាសី ភេទប្រុសអាយុ ២៣ ឆ្នាំ មុខរបរ អ្នកគ្រប់គ្រង ដីឡូតិ៍ មានទីលំនៅបច្ចុប្បន្នភូមិទក្សិណខាងត្បូង សង្កាត់គោកចក ក្រុង-ខេត្តសៀមរាប ។ ពេលមកដល់កន្លែងកើតហេតុ ពួកគេទាំង ៣នាក់ បានធ្វើសកម្មភាពលួចទ្វារដែកខាងលើបានហើយបាន ហើយដាក់លើរឺម៉កបើកចេញ បន្ទាប់មកបើកម៉ូតូចេញនោះ ក៏មានប្រជាពលរដ្ឋដែលរស់នៅក្បែរនោះ បានឃើញសកម្មភាពរបស់គេ ប្រាប់ទៅម្ចាស់ ដីឡូតិ៍ ហើយម្ចាស់ដីឡតិ៍ក៏បានរាយការណ៍ឲ្យកម្លាំងសមត្ថកិច្ចនគរបាលប៉ុស្តិ៍ រួមទាំងប្រជាការពារចុះទៅអន្តរាគមន៍ និងឃាត់ខ្លួនជនសង្ស័យទាំងបីនាក់ រួមទាំងរ៉ឺម៉កដែលដឹកទ្វារដែកខាងលើ យកមកធ្វើការសាកសួរតែម្ដង ។ ហើយក្នុងនោះដែរ ជនសង្ស័យទាំងបីនាក់ ក៏បានឆ្លើយសារភាពថា ពួកគេពិតជាបានធ្វើសកម្មភាពលួច ទ្វាររបងខាងលើពិតប្រាកដមែន ដោយក្នុងគោលបំណងយកទៅលក់ ។ ហើយក្នុងនោះដែរ ជនសង្ស័យឈ្មោះ វុធ វ៉ាន់ ក៏បានឆ្លើយសារភាពដែរថា កន្លងមកកាលពីដើមខែ កញ្ញា ឆ្នាំ២០១៩កន្លងមក រូបគេក៏ធ្លាប់បានធ្វើសកម្មភាព លួចទ្វារដែកនៅចំណុចខាងលើ តែម្នាក់ឯងរួចមកហើយ ដោយក្នុងនោះលួចបានចំនួន ទ្វាចំនួន ០៥ផ្ទាំងនៅកន្លែងដដែល ហើយរូបគេបានយកទៅលក់ នៅកន្លែងទិញ-លក់ អេតចាយបានចំនួន ៥ម៉ឺនរៀល ។
ក្រោយធ្វើការសួរនាំរួចរាល់ សមត្ថកិច្ចក៏បានរៀបចំណុំរឿងបញ្ជូនខ្លូនជនសង្ស័យចំនួន ពីរនាក់ទៅកាន់តុលាការ ដើម្បីដោះស្រាយទោតាមផ្លូវច្បាប់បន្ត រីឯជនសង្ស័យម្នាក់ទៀត ដែលមានឈ្មោះ បូ សំណាង ដែលមានអាយុ ១១ឆ្នាំ ត្រូវបានសមត្ថកិច្ចសុំគោលការណ៍បន្ត ដើម្បីឲ្យអាណាព្យាបាលមកធ្វើការធានាខ្លួនរូបគេផងដែរ ៕
អត្ថបទ និង រូបភាព ៖ ខេង ឧត្តម
កែសម្រួល ៖ អ៊ុន ណារាជ្យ
