លំហាត់សមយុទ្ធទ្រង់ទ្រាយធំអន្តរជាតិសៀមរាបឆ្នាំ២០១៩ លើប្រធានបទ គ្រោះថ្នាក់យន្តហោះ ធ្លាក់ក្នុងបរិវេណ អាកាសយានដ្ឋាន គ្រោងនឹងរៀបចំ នៅថ្ងៃទី១៨ ខែធ្នូ ឆ្នាំ២០១៩ ខាងមុខ នេះបើតាម ការឲ្យដឹងពី ឯកឧត្តម ខាន់ វណ្ណា អគ្គនាយកនៃអគ្គនាយកដ្ឋានបច្ចេកទេស នៃរដ្ឋលេខាធិការដ្ឋានអាកាសចរស៊ីវិល ក្នុងកិច្ចប្រជុំ សម្របសម្រួល និងត្រៀមរៀបចំការធ្វើលំហាត់សមយុទ្ធទ្រង់ទ្រាយធំអន្តរជាតិសៀមរាបឆ្នាំ២០១៩ នៅអាកាសយានដ្ឋានអន្តរជាតិខេត្តសៀមរាប នាព្រឹកថ្ងៃទី១១ ខែតុលា ឆ្នាំ២០១៩។
ឯកឧត្តម ខាន់ វណ្ណា បានឲ្យដឹងថា ការរៀបចំធ្វើសមយុទ្ធទ្រង់ទ្រាយធំនេះ ធ្វើឡើងតាមសារាចរណែនាំរបស់ រាជរដ្ឋាភិបាលកម្ពុជា និងរៀបចំក្នុងអំឡុងពេល ២ឆ្នាំម្ដង ដើម្បីធ្វើការហ្វឹកហ្វឺន ក្នុងការលើកកម្ពស់កិច្ចសហប្រតិបត្តិការរវាងស្ថាប័នពាក់ព័ន្ធក្នុងការគ្រប់គ្រងនិងត្រៀមលក្ខណ:ជួយសង្គ្រោះបន្ទាន់ចំពោះគ្រោះអាសន្ន ដែលអាចកើតមានឡើងជាយថាហេតុនៅក្នុង និងក្បែរអាកាសយានដ្ឋាន។
ឯកឧត្តមអគ្គនាយក បានបញ្ជាក់ថា លំហាត់សមយុទ្ធទ្រង់ទ្រាយធំនេះដែរ នឹងវាយតម្លៃ លើសមត្ថភាពក្នុងការអនុវត្តនៃប្រព័ន្ធដឹកនាំបញ្ជាគ្រោះអាសន្ន ក្នុងការឆ្លើយតបឧប្បត្តិហេតុគ្រោះថ្នាក់យន្តហោះ និងប្រសិទ្ធភាព នៃការសហការគ្នា ដើម្បីដឹកនាំបញ្ជាអនុវត្តលើការសម្របសម្រួល និងការរួមបញ្ចូលគ្នារវាងប្រពន្ធ័ដឹកនាំបញ្ហាគ្រោះអាសន្ន នៃស្ថាប័នអន្តរាគមន៍ទាំងអស់។ ពិនិត្យវាយតម្លៃលើសមត្ថភាព នៃការបែងចែកជនរងគ្រោះ ការសង្គ្រោះបឋមលើជនរងគ្រោះ នៅកន្លែងកើតហេតុ មុនពេលបញ្ជូនទៅកាន់មន្ទីរពេទ្យ និង ការដឹកជញ្ជូនទៅកាន់មន្ទីពេទ្យ។ វាយតម្លៃផែនការ នៃការបញ្ចេញព័ត៌មានជាសាធារណៈ បញ្ហាប្រឈម និង ការប្រើប្រាស់សម្រាប់ធនធានសារព័ត៌មាន។
លោក ង៉ាន់ ភិរុណ អភិបាលរងខេត្តសៀមរាប មានប្រសាសន៍ថា ក្នុងនាមអាជ្ញាធរខេត្ត សូមសម្តែងការគាំទ្រយ៉ាងពេញទំហឹងចំពោះការរៀបចំសមយុទ្ធនេះ ដើម្បីជាផលប្រយោជន៍សន្តិសុខ សុវត្ថិភាពរបស់អ្នកធ្វើដំណើរទេសចរណ៍ ប្រជាពលរដ្ឋ និងអាកាសយានដ្ឋានអន្តរជាតិសៀមរាប ។
លោកអភិបាលរងខេត្ត បន្តថា ទោះបីបច្ចុប្បន្ននេះ នៅលើពិភពលោក គ្រោះមហន្ដរាយ នៅតាមអាកាសយានដ្ឋាន នៅ មានកម្រិតទាប ក៏ដោយ ក៏ឧបទ្ទវហេតុ ដែលបានកើតមាន នាពេលកន្លងមក ជាពិសេសអំពើភេរវកម្ម ដ៏គ្រោះថ្នាក់ គឺ កំពុងគំរាមកំហែង និង ក្លាយជាក្ដីកង្វល់ របស់មនុស្សជាតិទាំងមូល ព្រមទាំងទាមទារ ឱ្យមានការយកចិត្ដទុកដាក់ និង ការប្ដេជ្ញាចិត្ដខ្ពស់ ក្នុងការចាត់វិធានការទប់ស្កាត់ និង ដោះស្រាយឱ្យបានទាន់ពេលវេលា ។
ក្នុងឱកាសនោះដែរ លោកអភិបាលរងខេត្ត ក៏បានសំណូមពរដល់ អគ្គនាយកនៃអគ្គនាយកដ្ឋានបច្ចេកទេស នៃរដ្ឋលេខាធិការដ្ឋានអាកាសចរស៊ីវិល សូមរៀបចំសមយុទ្ធឱ្យបានជាប់ជាប្រចាំគឺ៦ខែម្ដង ឬ ១ឆ្នាំម្ដង និង២ឆ្នាំម្ដង ចំពោះអង្គភាព ស្ថាប័នពាក់ព័ន្ធ សូមគិតគូរអំពីគ្រឿងសម្ភារ:បរិក្ខារ និងឧបករណ៍សម្រាប់ប្រតិបត្តិការ ជួយសង្គ្រោះនៅពេលមានហានិភ័យកើតឡើង ព្រមទាំងស្នើឱ្យអង្គភាពស៊ីម៉ាក់ ធ្វើការពិនិត្យ និងដោះគ្រាប់យុទ្ធភណ្ឌមិនទាន់ផ្ទុះជុំវិញអាកាសយានដ្ឋានអន្តរជាតិខេត្តសៀមរាបផងដែរ ៕
អត្ថបទ និងរូបភាព៖ លោក ទ្រា ពន្លឺ
កែសម្រួលអត្ថបទ៖ សេង ផល្លី
