ថ្លែងនៅក្នុងពិធីប្រគល់ទោចក្រយានយន្ត និងកុំព្យូទ័របន្ទះ(Tablet) ដល់មន្ត្រីអនុវត្តកម្មនិងភ្នាក់ងារផ្សព្វផ្សាយឃុំ នៃគម្រោងASPIRE នៅមន្ទីរកសិកម្មរុក្ខាប្រមាញ់និងនេសាទខេត្តសៀមរាប កាលពីរសៀលថ្ងៃទី១១ ខែតុលា ឆ្នាំ២០១៩នេះ លោក ង៉ាន់ ភិរុណ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានណែនាំដល់ថ្នាក់ដឹកនាំ មន្ត្រីរាជការ នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ព្រមទាំងមន្ត្រីក្នុងគម្រោងផ្សេងៗ ត្រូវយកចិត្តទុកដាក់បន្ថែមទៀត ក្នុងការអនុវត្ត និងបំពេញការងារតាមតួនាទី ភារកិច្ចទៅតាមជំនាញរបស់ខ្លួន ដោយឈរលើជំហរទទួលខុសត្រូវលើការងារ រក្សាសាមគ្គីឯកភាពផ្ទៃក្នុង ដាស់តឿនក្រើនរំលឹកគ្នាទៅវិញទៅមក ព្រោះថាក្នុងនាមជាមន្ត្រីរាជការ ត្រូវប្រកាន់ឱ្យបានក្រមសីលធម៌ វិជ្ជាជីវៈរបស់ខ្លួន និងត្រូវផ្លាស់ប្តូរចេញនូវឥរិយាបទនិងអាកប្បកិរិយាមិនសមរម្យ និងជម្រុះចោលនូវគំនិតទស្សនៈអស់សង្ឃឹម ដោយសារមិនបានតំឡើងតួនាទីមុខដំណែងដូចគេអ្នកមានលុយ និងមានបក្សពួក ព្រោះគំនិតនិងទស្សនៈនេះ ជាទស្សនៈមិនជឿនលឿន នាំឱ្យយើងខ្វះភាពតស៊ូ និងអត់ធ្មត់ក្នុងការងារ សំខាន់ឱ្យតែមានសមត្ថភាព និងតស៊ូប្រឹងប្រែង យើងនឹងទទួលបានលទ្ឋផលល្អនៅថ្ងៃណាមួយមិនឡើយ ។
ក្នុងឱកាសនោះដែរ លោក ង៉ាន់ ភិរុណ បានថ្លែងនូវការកោតសរសើរដល់សកម្មភាពការងាររបស់មន្ទីរកសិកម្មរុក្ខាប្រមាញ់ខេត្ត លើសកម្មក្នុងការងារជំនាញរបស់ខ្លួន ដោយបានសហការល្អជាមួយអាជ្ញាធរមូលដ្ឋាននានាក្នុងទូទាំងខេត្ត ពាក់ព័ន្ឋទៅនឹងវិស័យកសិកម្ម ពិសេសជាសសរស្តម្ភក្នុងការជំរុញ និងគាំទ្រសកម្មភាពទីផ្សារកសិកម្មយើង ដល់បងប្អូនប្រជាកសិករក្នុងខេត្តសៀមរាប ដើម្បីស្វែង និងផ្សារភ្ជាប់កសិផលរបស់ពួកគាត់ឆ្ពោះទៅកាន់ទីផ្សារប្រកបដោយនិរន្តរភាព ស្របតាមគោលនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រ ។
លោក ង៉ាន់ ភិរុណ ក៏បានសំណូមពរដល់លោកលោកស្រីទាំងអស់ សូមយកចិត្តទុកដាក់ក្នុងការថែរក្សាម៉ូតូ និងកុំព្យូទ័របន្ទះ ដែលបានប្រគល់ឲ្យនាពេលនេះឲ្យបានល្អ និងប្រើប្រាស់ឲ្យបានត្រឹមត្រូវតាមគោលបំណងរបស់កម្មវិធី ដែលបានគ្រោងទុក និងសូមគោរពច្បាប់ស្តីពីចរាចរណ៍ផ្លូវគោក្នុងពេលបើកបរយាន្តយន្តរបស់ខ្លួនឱ្យបានគ្រប់ៗគ្នា។
ព័ត៌មានជាតិ ថ្មីៗ
បើតាមរបាយការណ៍របស់លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានឱ្យដឹងថា៖ម៉ូតូចំនួន៧៦គ្រឿង ត្រូវបានប្រគល់ជូនទៅមន្ត្រីខេត្តចំនួន៨រូប ស្មើ៨គ្រឿង , មន្ត្រីស្រុកចំនួន៤៤រូប ស្មើនឹង៤៤គ្រឿង និងភ្នាក់ងារផ្សព្វផ្សាយឃុំនៃកម្មវិធី CEW ចំនួន២៤រូប ស្មើនឹង២៤គ្រឿង និងកុំព្យូទ័របន្ទះ (Tablet) ចំនួន៣៧គ្រឿង សម្រាប់ចែកជូនដល់ថ្នាក់ដឹកនាំកម្មវិធីផ្សព្វផ្សាយបច្ចេកទេសកសិកម្មថ្មី ធន់នឹងបម្រែបម្រួលអាកាសធាតុហៅកាត់ កម្មវិធី ASPIRE ក្នុងនោះផ្តល់ដល់មន្ត្រីថ្នាក់ស្រុកចំនួន១៣គ្រឿង និងភ្នាក់ងារផ្សព្វផ្សាយឃុំ CEW ចំនួន២៤នាក់ស្មើនឹង២៤គ្រឿង ខណៈដែលម៉ូតូ និងកុំព្យូទ័រ ដែលបានប្រគល់ឲ្យនាពេលនេះ គឺជាកម្មសិទ្ធរបស់កម្មវិធី ASPIRE សម្រាប់បម្រើឲ្យការអនុវត្តតាមគោលបំណងរបស់កម្មវិធី ៕
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
