នៅក្នុងដំណើរទស្សនកិច្ចរយៈពេល២ថ្ងៃទៅកាន់ខេត្ត សៀមរាប ឯកឧត្តម W.Patrick Murply ឯកអគ្គរដ្ឋទូតតែងតាំងរបស់សហរដ្ឋអាមេរិកប្រចាំនៅកម្ពុជា បានអញ្ជើញទៅទស្សកកិច្ចនៅមជ្ឈមណ្ឌលផ្តល់ឈាម នៃមន្ទីរពេទ្យបង្អែកខេត្តសៀមរាប ដោយទទួលបដិសណ្ឋារកិច្ចស្វាគមន៍ និងជួបសម្តែងការគួរសម ពីសំណាក់លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប និងលោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប ។
ដំណើរទស្សនកិច្ចទៅកាន់មជ្ឈមណ្ឌលផ្តល់ឈាម នៃមន្ទីរពេទ្យបង្អែកខេត្តសៀមរាបនាពេលនេះ គឺជាគោលដៅមួយក្នុងចំណោមគោលដៅផ្សេងៗទៀត ដែលឯកឧត្តមអគ្គរដ្ឋទូតអាមេរិក ត្រូវបានបំពេញទស្សនកិច្ច និងបំពេញ ការងារ ព្រោះថាមជ្ឈមណ្ឌលផ្តល់ឈាមនេះ ជាជំនួយគាំទ្រដោយរដ្ឋាភិបាលសហរដ្ឋអាមេរិក មានលទ្ធភាពប្រមូលឈាមកើនឡើង៣ដង បើធៀបទៅនិងលទ្ធផលប្រមូលឈាមមុនមានវត្តមានមជ្ឈមណ្ឌលនេះ ដែលធ្វើឲ្យស្ថានភាពស្តុកឈាមបច្ចុប្បន្នមានភាពរឹងមាំ មិនមានបញ្ហាដាច់ស្តុកនោះទេ បើទោះជាមានចំនួនអ្នកជម្ងឺ ដែលមានតម្រូវការឈាមកើនឡើងក៏ដោយ ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានឲ្យដឹងថា មជ្ឈមណ្ឌលផ្តល់ឈាមនេះ គឺជាជំនួយរបស់រដ្ឋាភិបាលអាមេរិក បានបើកសម្ពោធដាក់ឲ្យដំណើរការនៅថ្ងៃទី០៣ ខែមិនា ឆ្នាំ២០១៦ ហើយលទ្ធផលដែលសម្រេចបាន ក្រោយមានវត្តមានអាគារ និងសម្ភារៈឧបករណ៍ទំនើបៗ មានលក្ខណៈស្តង់ដារងាយស្រួលប្រើប្រាស់ មានការកើនឡើងយ៉ាងខ្លាំងទាំងកំរឹតសមត្ថភាព គុណភាពមន្ទីរពិសោធន៍ និងបរិមាណឈាមដែលប្រមូលបាន ខណៈដែលមជ្ឈមណ្ឌលផ្តល់ឈាមនេះ ទើបបានបញ្ចប់ថ្មីៗក្នុងខែកន្លងទៅ នូវការវាយតម្លៃគុណភាពដើម្បីទទួលបាន Accreditation level 1 ដែលគាំទ្រដោយ CDC អាមេរិកាំង ។
សូមបញ្ជាក់ថា សកម្មភាពការងាររបស់មជ្ឈមណ្ឌលមានការកើនឡើងរហូតដល់ទៅ៣ដង បើធៀបនឹងបរិមាណឈាមដែលប្រមូលបានមុនមានដំណើរការមជ្ឈមណ្ឌលនេះ ដោយឆ្នាំ២០១៥ មុនដំណើរការមជ្ឈមណ្ឌល ប្រមូលឈាមបានត្រឹមតែ ១.៣៩៨ប្លោក ហើយឆ្នាំ២០១៨ ប្រមូលបាន ៣.១៤៦ប្លោក និង ៩ខែដើមឆ្នាំ២០១៩ ប្រមូលបាន ៣.៣១២ប្លោក ដែលធ្វើឲ្យស្ថានភាពស្តុកឈាមបច្ចុប្បន្នមានភាពរឹងមាំ មិនមានបញ្ហាដាច់ស្តុកនោះទេ បើទោះជាមានចំនួនអ្នកជម្ងឺ ដែលមានតម្រូវការឈាមកើនឡើងក៏ដោយ ។
នៅក្នុងកម្មវិធីទស្សនកិច្ចនៅមជ្ឈមណ្ឌលផ្តល់ឈាមនេះដែរ ឯកឧត្តម W.Patrick Murply បានបរិច្ចាគឈាមជូនមជ្ឈមណ្ឌលផងដែរ ហើយឯកឧត្តម មានប្រសាសន៍ថា នេះគឺជាការចូលរួម ថ្ងៃនេះដែរនៅស្ថានទូតសហរដ្ឋអាមេរិក មានការបរិច្ចាគឈាមដោយបុគ្គលិកស្ថានទូតអាមេរិកទាំងអស់គ្នា ដូច្នេះក្នុងដំណើរទស្សនកិច្ចមកកាន់មជ្ឈមណ្ឌលផ្តល់ឈាមនៅមន្ទីរពេទ្យបង្អែកខេត្តសៀមរាប ដែលគាំទ្រដោយរដ្ឋាភិបាលអាមេរិក គឺមានបំណងគិតរួចហើយថាត្រូវបរិច្ចាគឈាម ដើម្បីលើកទឹកចិត្ត និងអំពាវនាវដល់សាធារណជនគ្រប់គ្នាចូលរួមជួយផ្តល់ឈាម និងបន្តផ្តល់ឈាម ដែលជាចលនាមនុស្សធម៌ ក្នុងការជួយសង្គ្រោះជីវិតមនុស្ស ហើយការផ្តល់ឈាម វាងាយស្រួលបំផុត មិនបណ្តាលឲ្យមានផលប៉ះពាល់សុខភាពនៃអ្នកបរិច្ចាគនោះទេ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
