នៅព្រឹកថ្ងៃទី១២ ខែតុលា ឆ្នាំ២០១៩នេះ រាជរដ្ឋាភិបាលកម្ពុជា សម្រេចផ្ដល់ស្រូវពូជចំនួន៤០តោន ដែលជាពូជស្រូវសែនក្រអូប មិនប្រកាន់រដូវ មានរយៈពេល១១៥ថ្ងៃ ជូនប្រជាកសិកររងគ្រោះដោយគ្រោះរាំងស្ងួតជិត៤៩២នាក់ នៅឃុំ២ក្នុងស្រុកជីក្រែង គឺឃុំជីក្រែង និង ឃុំអន្លង់សំណរ សម្រាប់ស្តារឡើងវិញនូវការងារបង្កបង្កើនផលស្រូវនៅរដូវប្រាំង ក្រោមអធិបតីភាពឯកឧត្តម នាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ , ឯកឧត្តម សៀង ណាំំ អ្នកតំណាងរាស្ត្រមណ្ឌលសៀមរាប និង លោក ង៉ាន់ ភិរុណ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាថ្នាក់ដឹកនាំក្រសួងកសិកម្ម រុក្ខាប្រមាញ់និងនេសាទ , ប្រតិភូអមដំណើរគណៈអធិបតី , ថ្នាក់ដឹកនាំមន្ទីរអង្គភាពនានាក្នុងខេត្ត អាជ្ញាធរស្រុក និង អាជ្ញាធរឃុំទាំងពីរ នៃស្រុកជីក្រែង ។
មានមតិស្វាគមន៍ក្នុងឱកាសនោះ លោក ង៉ាន់ ភិរុណ អភិបាលរងខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា គណៈកម្មាធិការជាតិគ្រប់គ្រងគ្រោះមហន្តរាយ និងក្រសួងកសិកម្ម រុក្ខាប្រមាញ់ និងនេសាទ ដែលបានយកចិត្តទុកដាក់ខ្ពស់ ក្នុងផ្តល់ជូនគ្រាប់ពូជស្រូវនាពេលកន្លងមក និងគ្រាប់ពូជស្រូវនាពេលនេះ បើទោះបីជាការផ្តល់ជូនគ្រាប់ពូជស្រូវនេះ ពុំបានគ្រប់គ្រាន់ តាមតម្រូវការរបស់បងប្អូនប្រជាកសិករក៏ពិតមែន តែនេះជាការចូលរួមចំណែកដល់បងប្អូនប្រជាកសិករបានមួយកម្រិត ដែរ ហើយខ្ញុំសង្ឃឹមថា បងប្អូនប្រជាពលរដ្ឋ នឹងយកពូជស្រូវដែលចែកជូននាពេលបន្តិចទៀតនេះ ដើម្បីធ្វើការស្តារឡើងវិញ នាពេលទឹកស្រកទៅវិញ និងបានពូជគ្រាប់ស្រូវសម្រាប់បង្កបង្កើនផលនៅឆ្នាំក្រោយទៀត ។
លោក ង៉ាន់ ភិរុណ មានប្រសាសន៍ទៀតថា ដោយនាពេលបច្ចុប្បន្ននេះមានការបម្រែបម្រួលអាកាសធាតុទូទាំងពិភពលោក និងនៅក្នុងតំបន់បានធ្វើឱ្យប្រទេសនីមួយៗ ជួបប្រទះនឹងគ្រោះមហន្តរាយផ្សេងៗកើតឡើង ជាក់ស្តែងនៅក្នុងប្រទេសកម្ពុជាយើង មានបណ្តាខេត្តមួយចំនួនទៀតបានជួបប្រទះនឹងគ្រោះមហន្តរាយផ្សេងៗពីគ្នា ក្នុងនោះនៅក្នុងខេត្តសៀមរាបរបស់យើង រយៈពេល ០៩ខែ ក្នុងឆ្នាំ២០១៩នេះ មានគ្រោះមហន្តរាយកើតជាច្រើន ប៉ុន្តែនាពេលនេះសូមលើកយកតែគ្រោះរាំងស្ងួត និងគ្រោះជំនន់ទឹកភ្លៀងតែប៉ុណ្ណោះ ដែលមានផលប៉ះពាល់ និងខូចខាត គឺគិតត្រឹមថ្ងៃទី៣០ ខែសីហា ឆ្នាំ២០១៩ ប្រជាកសិករទូទាំងខេត្តសៀមរាបធ្វើការបង្កបង្កើនផលដំណាំស្រូវរដូវវស្សាបានចំនួន ១៤៧.៩៨០ ហិកតា នៃផែនការ ១៨៦.៥៦៥ ហិកតា ហើយជាមួយនឹងការបង្កបង្កើនផលនេះ ដោយពុំមានភ្លៀងធ្លាក់គ្រប់គ្រាន់បានធ្វើឱ្យដំណាំស្រូវរបស់ប្រជាកសិករទទួលរងនូវគ្រោះរាំងស្ងួតមានសរុបចំនួន ៣៦.៤១០ ហិកតា លើ១១ក្រុង-ស្រុក ស្មើនឹង៧៤ឃុំ និង៥៨៥ភូមិ មានគ្រួសាររងគ្រោះសរុបចំនួន ៤៣.៨៩៣ គ្រួសារ ក្នុងនោះដំណាំស្រូវខូចខាតចំនួន ៤.៦៥៧ ហិកតា លើ៦ស្រុក ស្មើ៣២ឃុំ និង២២២ភូមិ ដែលមានគ្រួសាររងការខូចខាតចំនួន ៦.២៣៩ គ្រួសារ។
លោក ង៉ាន់ ភិរុណ មានប្រសាសន៍បន្ថែមទៀតថា នៅក្នុងកំឡុងខែកញ្ញា ឆ្នាំ២០១៩នេះ ក៏មានភ្លៀងធ្លាក់ជាប់ៗគ្នា បណ្តាលឱ្យមានគ្រោះជំនន់ទឹកភ្លៀង ចំនួន១០ស្រុក នៃខេត្តសៀមរាប ក្នុងនោះមានស្រុកក្រឡាញ់, ស្រុកអង្គរជុំ, ស្រុកវ៉ារិន, ស្រុកស្វាយលើ, ស្រុកស្រីស្នំ, ស្រុកប្រាសាទបាគង, ស្រុកអង្គរធំ ស្រុកពួក, ស្រុកសូទ្រនិគម ស្រុកជីក្រែង ដែលរងផលប៉ះពាល់ឃុំចំនួន៣៩ ស្មើនឹង ១២២ភូមិ ហើយបង្កឱ្យមានផលប៉ះពាល់ និងការខូចខាត ដោយលិចបរិវេណមន្ទីរពេទ្យបង្អែកស្រុក និងមណ្ឌល សុខភាព ២កន្លែង, លិចបរិវេណសាលារៀន ២១ កន្លែង , ទឹកហូរចូលផ្សារ ១ កន្លែង , ទឹកលិចក្រោមផ្ទះប្រជាពលរដ្ឋកម្រិតធ្ងន់ ចំនួន ៥ ខ្នង , ទឹកលិចក្រោមផ្ទះប្រជាពលរដ្ឋកម្រិតស្រាល ចំនួន ៩១០ ខ្នង , លិចស្រូវពង្រោះពលរដ្ឋ ចំនួន ៦.៤៥២ ហិកតា , ដាច់ស្ពាន ២ កន្លែង ប្រវែង ២៧ ម៉ែត្រ , ប្រព័ន្ធធារាស្ត្រ ចំនួន ១២ ក្នុងនោះ ទំនប់ទឹកប្រវែង ៦៥៣ម៉ែត្រ ប្រឡាយមេប្រវែង ១.៣៤០ម៉ែត្រ ប្រឡាយរងប្រវែង ៣.៤០០ម៉ែត្រ ប្រឡាយស្រោចស្រពប្រវែង ៦០០ម៉ែត្រ និងសំណង់សិល្បការចំនួន ៥កន្លែង , ផ្លូវដែលគ្រប់គ្រងដោយមន្ទីរអភិវឌ្ឍន៍ជនបទ និងក្រសួងអភិវឌ្ឍន៍ជនបទ ប៉ះពាល់ និងខូចខាត ចំនួន១៥ខ្សែ ប្រវែង ១៥៣.៩០០ម៉ែត្រ និង ផ្លូវដែលគ្រប់គ្រងដោយមន្ទីរសាធារណការ និងដឹកជញ្ជូនខេត្ត និងរដ្ឋបាលខេត្ត ប៉ះពាល់ និងខូចខាត ចំនួន ១១ខ្សែ ប្រវែងចំនួន ១៥ ២៥០ម៉ែត្រ។
មានប្រសាសន៍ក្នុងឱកាសនោះ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្ដេចទាំងពីរ តែងតែគិតគូរពីសុខទុក្ខរបស់ប្រជាពលរដ្ឋយើងនៅទូទាំងប្រទេស និង សម្ដែងការសោកស្ដាយចំពោះការខូចខាតដំណាំស្រូវរបស់បងប្អូនប្រជាកសិករយើងកន្លងមក និង បានសម្ដែងនូវការអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ដែលបានផ្តល់គ្រាប់ពូជស្រូវជូនដល់ប្រជាពលរដ្ឋយើងបានទាន់ពេលវេលា និង អរគុណដល់បងប្អូនប្រជាពលរដ្ឋទាំងអស់ ដែលបានបោះឆ្នោតគាំទ្រសម្ដេចតេជោ ហ៊ុន សែន ឲ្យធ្វើជានាយករដ្ឋមន្ត្រីនៃកម្ពុជា អាណត្តិទី៦បន្តទៀត ហើយសង្ឃឹមជឿជាក់ថា នឹងបន្តគាំទ្របេក្ខភាព ។
ឯកឧត្តមនាយឧត្តមសេនីយ៍ គន់ គីម មានប្រសាសន៍ទៀតថា គ្រាប់ពូជស្រូវដែលរាជរដ្ឋាភិបាលកម្ពុជា បានផ្ដល់ជូនដល់បងប្អូនប្រជាពលរដ្ឋយើងនាពេលនេះ គឺជាពូជស្រូវមានគុណភាពដុះបានជិត១០០ភាគរយ និង មានទិន្នផលខ្ពស់ ដែលជំនាញកសិកម្មបានសំរិតសំរាំងច្បាស់លាស់ ប៉ុន្តែសុំកុំយកទៅកិនដើម្បីដាំបាយបរិភោគ ហើយសុំឲ្យអាជ្ញាធរឃុំទាំងពីរ ត្រូវបែងចែកជូនដល់ប្រជាពលរដ្ឋទៅតាមចំនួនតម្រូវការដែលពួកគាត់បានស្នើសុំ ជាពិសេស អាជ្ញាធរឃុំ ត្រូវយកចិត្តទុកដាក់បម្រើសេវាសាធារណៈជូនប្រជាពលរដ្ឋឲ្យបានល្អប្រសើរថែមទៀត និង ត្រូវយកចិត្តទុកដាក់ពីសុខទុក្ខរបស់ប្រជាពលរដ្ឋ ក្នុងករណីដែលពួកគាត់សុំការពឹងពាក់ពីយើង ។
សូមបញ្ជាក់ថា ចំពោះផលប៉ះពាល់ និងការខូចខាតដោយគ្រោះរាំងស្ងួត ដោយមានការយកចិត្តទុកដាក់ពីរាជរដ្ឋាភិបាលកម្ពុជា តាមរយៈគណៈកម្មាធិការជាតិគ្រប់គ្រងគ្រោះមហន្តរាយ ក្រសួងកសិកម្ម រុក្ខាប្រមាញ់ និងនេសាទ គណៈកម្មាធិការគ្រប់គ្រងគ្រោះមហន្តរាយខេត្ត សាខាកាកបាទក្រហមកម្ពុជាខេត្តសៀមរាប ក្រុង-ស្រុក មន្ទីរ-អង្គភាពជំនាញ យើងបានផ្តល់គ្រាប់ពូជស្រូវ ចំនួន២៩តោន ជូនប្រជាកសិករចំនួន ៥៤០គ្រួសារ រួចមកហើយ គឺនៅស្រុកពួក និងស្រុកក្រឡាញ់ ៕
អត្ថបទ ៖ លោក លីវ សាន្ត
រូបថត ៖ លោក អ៊ុន ណារាជ្យ
