នាព្រឹកថ្ងៃទី១២ ខែតុលា ឆ្នាំ២០១៩នេះ កូនឈើចម្រុះចំនួន៦០០ដើម ត្រូវបានរៀបចំដាំលើផ្ទៃដីទំហំ១ហិកតា នៅក្នុងបរិវេណវត្តពុទ្ធស្ថាននគររាជ ធម្មមេត្តា ស្ថិតនៅក្នុងភូមិកសិកម្ម សង្កាត់ស្រង៉ែ ក្រុងសៀមរាប ក្រោមព្រះអធិបតីភាព និង អធិបតីភាពសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និង លោក ពិន ប្រាកដ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប ដោយមានការនិមន្ត និង អញ្ជើញចូលរួមពីសំណាក់ព្រះសង្ឃ មន្ត្រីរាជការ អាជ្ញាធរមូលដ្ឋាន លោកគ្រូ-អ្នកគ្រូ សិស្សានុសិស្ស និងបងប្អូនប្រជាពលរដ្ឋក្នុងសង្កាត់ស្រង៉ែជាច្រើនរូប ។
លោក ពិន ប្រាកដ អភិបាលរងខេត្តសៀមរាប បានមានប្រសាសន៍ថា ពិធីដែលយើង បាននិងកំពុងតែប្រារព្ធធ្វើនាពេលនេះមានអត្ថន័យដ៏ជ្រាលជ្រៅខ្លាំងណាស់ សម្រាប់ចលនាបំផុសស្មារតីព្រះសង្ឃ ប្រជាពលរដ្ឋ មន្ត្រីរាជការ អាជ្ញាធរមូលដ្ឋាន លោកគ្រូ-អ្នកគ្រូ សិស្សានុសិស្ស កងកម្លាំងប្រដាប់អាវុធ ប្អូនៗ ក្មួយៗ និងបងប្អូនប្រជាពលរដ្ឋ យើងទាំងអស់ឱ្យចេះស្រឡាញ់ព្រៃឈើ ចូលរួមដាំដុះ និងការពារព្រៃឈើ កុំបំភ្លេចបំផ្លាញ កាប់ឆ្ការ ដុត ហ៊ុព័ទ្ធដីព្រៃជាដើម ពិសេសគឺជាការដង្ហែតាមព្រះរាជតំរិះដ៏ខ្ពង់ខ្ពស់របស់ ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រ នៃព្រះរាជាណាចកម្ពុជា ជាទីគោរព សក្ការៈដ៏ខ្ពង់ខ្ពស់ ដែលព្រះអង្គតែងតែយកព្រះទ័យទុកដាក់ដល់បញ្ហាព្រៃឈើ បរិស្ថាន និងការដាំដើមឈើជាអាទិភាពចំបង ហើយព្រះអង្គតែងតែយាង ចូលរួមជាព្រះរាជាអធិបតីដ៏ខ្ពង់ខ្ពស់ក្នុងពិធីបុណ្យរុក្ខទិវាជាតិ ជារៀងរាល់ឆ្នាំ។
លោក ពិន ប្រាកដ មានប្រសាសន៍បន្ថែមថា ការសហការរៀបចំឱ្យមានកម្មវិធីដាំកូនឈើនាឱកាសនេះ គឺបានឆ្លុះបញ្ចាំងឱ្យឃើញ ពីការខិតខំប្រឹងប្រែងយ៉ាងសកម្មរបស់រាជរដ្ឋាភិបាល ក្នុងការគ្រប់គ្រង ការអភិរក្សធនធានព្រៃឈើ គឺជាអាទិភាព ចំបងរបស់រាជរដ្ឋាភិបាល ក្នុងគោលដៅយូរអង្វែងរបស់ប្រទេសជាតិយើង គឺការអភិរក្ស និងការគ្រប់គ្រង ធនធានធម្មជាតិ ជីវចំរុះ និងប្រព័ន្ធអេកូឡូស៊ី ប្រកបដោយប្រសិទ្ធភាព និងបានរួមចំណែកក្នុងការកាត់ បន្ថយភាពក្រីក្ររបស់ប្រជាជន និងការអភិវឌ្ឍន៍សេដ្ឋកិច្ចសង្គមឱ្យបានប្រសើរឡើង ព្រោះថាធនធានធម្មជាតិ គឺជាប្រភពធនធានមួយដ៏រស់រវើក និងមិនចេះរីងស្ងួត ប្រសិនបើយើង ទាំងអស់គ្នាចេះគ្រប់គ្រង ការពារ និងអភិរក្សឱ្យបានសមស្រប។ មួយវិញទៀត ធម្មជាតិទាំងឡាយអាចរស់នៅលើភពផែនដីយើងនេះបាន ដោយ មិនចាំបាច់មានមនុស្ស តែមនុស្ស សត្វទាំងឡាយ មិនអាចរស់នៅដោយខ្វះធម្មជាតិបានទេ។
ព័ត៌មានជាតិ ថ្មីៗ
លោក ពិន ប្រាកដ មានប្រសាសន៍បន្ថែមទៀតថា ប្រការសំខាន់គឺបានឆ្លុះបញ្ចាំងសារជាថ្មីម្តងទៀត នូវការភ្ញាក់រលឹករបស់ប្រជាជាតិយើងទាំងមូល ក្នុងការប្រឈមមុខដោះស្រាយគ្រោះមហន្តរាយបាត់បង់ព្រៃឈើ និងស្មារតីម្ចាស់ការទទួលខុសត្រូវលើជោគវាសនាអនាគតមាតុភូមិយើង សម្រាប់យើងជំនាន់នេះ ក៏ដូចជាជំនាន់ក្រោយ យើងត្រូវចាប់ផ្តើមដោយឥតបង្អែរបង្អង់នូវផែនការស្តារព្រៃឈើ និងការដាំកូនឈើឡើងវិញ ជាខ្សែចង្វាក់គ្រប់ទិសទី ដើម្បីឱ្យខេត្តសៀមរាបរបស់យើង រក្សាបាននូវលំនឹងបរិស្ថានធម្មជាតិ និងមានសម្រស់ស្រស់បំព្រងដោយរុក្ខជាតិ ពណ៌បៃតងឡើងវិញ។
សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី បានមានព្រះរាជបន្ទូលថា ការដាំដើមឈើនាពេលនេះ ហាក់បង្ហាញពីការយកចិត្តទុកដាក់ ក៏ដូចជាបង្ហាញពីសទ្ធាជ្រះថ្លារបស់បងប្អូនប្រជាពលរដ្ឋ ដែលមានការយល់ដឹងទៅលើផ្នែកបរិស្ថាន ព្រោះព្រៃឈើគឺជាជោគវាសនារបស់បងប្អូនប្រជាពលរដ្ឋ ព្រៃឈើបានផ្ដល់នូវសុខដុមរមនាដល់មនុស្សលោកនិងសត្វ អ្នកដែលបានដាំដើមឈើ ហាក់បីដូចជាបានធ្វើបុណ្យប្រគេនព្រះសង្ឃម្ដងដែរ ៕
អត្ថបទ និង រូបថត ៖ លោក ខេង ឧត្តម , លោក បូ សាវី និង លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
