នាព្រឹកថ្ងៃទី១២ខែតុលា ឆ្នាំ២០១៩ សាលាវេសហ្គេតអន្តរជាតិ ដែលស្ថិតនៅក្នុងក្រុងសៀមរាប ចាប់ផ្ដើមប្រកាសបើកបវេសនកាលឆ្នាំសិក្សាថ្មី ឆ្នាំ២០១៩ -២០២០ ជាផ្លូវការ ព្រមទាំងបានចែកសញ្ញាបត្រ និងលិខិតសរសើរជូនដល់សិស្សឆ្នើមក្នុងឆ្នាំសិក្សា២០១៨-២០១៩ ដែលពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ដោយមានការចូលរួមពីណាក់ឯកឧត្តម លោកជំំទាវ លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលក្រុង , គណ:គ្រប់គ្រងសាលា លោកគ្រូអ្នកគ្រូសាលាវេសហ្គេត មាតាបិតាសិស្ស និងសិស្សានុសិស្សជាច្រើនរយនាក់ ។
លោកសាស្ត្រាចារ្យ រ័ត្ន រស្មី នាយកគ្រប់គ្រងសាលា បានឲ្យដឹងថា សាលាវេសហ្គេតអន្តរជាតិ ជាគ្រឹះស្ថានសិក្សាឯកជនតែមួយគត់នៅខេត្តសៀមរាប ដែលបានផ្ដល់សេវាអប់រំចំណេះទូទៅ ៣ភាសាគឺ ភាសាខ្មែរ ភាសាអង់គ្លេស និងភាសាចិន ខណៈដែលចំណេះដឹងទូទៅភាសាខ្មែរ និងភាសាអង់គ្លេស បានចាប់ពីមត្តេយ្យដល់ថ្នាក់មធ្យមសិក្សា ហើយជាលទ្ធផលក្នុងឆ្នាំសិក្សា២០២៨ -២០១៩ សិស្សបានប្រឡងជាប់មធ្យមភាគឡើងថ្នាក់បឋមសិក្សា មានចំនួន ៩៤.៥៥ភាគរយ , សិស្សមមធ្យមសិក្សាបឋមភូមិ មានចំនួន ៩២,២៥ភាគរយ និង សិស្សមមធ្យមសិក្សាទុតិយភូមិចំនួន ៩៣,៨៧ភាគរយ ក្នុងនោះសិស្សប្រឡងសញ្ញាបត្រមធ្យមសិក្សាទុតិយភូមិ ជាប់ជិត១០០ភាគយ ដែលទទួលបានចាប់ពីនិទ្ទេស A រហូតដល់និទ្ទេស E ។
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានកត់សម្គាល់ឃើញថា វិស័យអប់រំផ្នែកឯកជន មិនមែនជាការសាមញ្ញពេកនោះទេ ហើយនៅក្នុងបរិបទវិស័យអប់រំរបស់យើង ក៏មិនអាចខ្វះការចូលរួមពីវិស័យអប់រំផ្នែកឯកជនបានឡើយ ដូច្នេះដើម្បីទទួលបាននូវកំរិតអប់រំខ្ពស់មួយ ទាមទារនូវលក្ខ័ណ្ឌជាច្រើន ហេតុនេះជាការចាំបាច់ណាស់ដែលត្រូវការដៃគូអភិវឌ្ឍន៍ល្អៗ មានលទ្ឋភាពគ្រប់គ្រាន់ និងមានសមត្ថភាពខ្ពស់ ព្រមទាំងមានមនសិការផងដែរ ដើម្បីជួយឱ្យការងារអប់រំសម្រេចទៅបានក្នុងកម្រិតស្តង់ដារអន្តរជាតិមួយ។
ឯកឧត្តម ទៀ សីហា មានប្រសាសន៍បន្ថែមថា រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងក្នុងការបន្តកសាង និងអភិវឌ្ឍធនធានមនុស្ស លើគ្រប់ផ្នែកប្រកបដោយគុណភាព និងគុណធម៌ល្អប្រពៃ ដែលឆ្លើយតបទៅនឹងសំណូមពរនៃការអភិវឌ្ឍន៍សង្គម សេដ្ឋកិច្ច ដើម្បីកសាងកម្ពុជាឱ្យក្លាយជាសង្គមរីកចម្រើន ជឿនលឿន ដោយផ្អែកលើមូលដ្ឋានចំណេះដឹង លើគ្រប់វិស័យ រួមទាំងវិទ្យាសាស្ត្របច្ចេកទេស និងចំណេះធ្វើ ហើយដើរស្របជាមួយនឹងការរីកចម្រើន នៃបណ្តាប្រទេសនៅក្នុងតំបន់ និងពិភពលោក ដោយឈរលើការអប់រំសម្រាប់ទាំងអស់គ្នា ជាគោលការណ៍មួយដោយត្រូវធានាលទ្ធភាពទទួលបានសេវាអប់រំ ប្រកបដោយសមធម៌ ដែលផ្តល់ឱកាសស្មើៗគ្នាដល់កុមារ និងយុវជនកម្ពុជាទាំងអស់ បានទទួលការអប់រំមូលដ្ឋានក្នុងប្រព័ន្ឋ និងការអប់រំក្រៅប្រព័ន្ធ ។
ឯកឧត្តម ទៀ សីហា មានប្រសាសន៍ទៀតថា សាលាវេសហ្គេតអន្តរជាតិខេត្តសៀមរាបនេះ បានអនុវត្តន៍ទៅតាមស្តង់ដារអប់រំត្រឹមត្រូវ ដោយឈរលើធនធាន និងចក្ខុវិស័យ និងមានកម្មវិធីអប់រំច្បាស់លាស់គ្រប់ជ្រុងជ្រោយ ទៅតាមគោលការណ៍ណែនាំរបស់ក្រសួងអប់រំយុវជននិងកីឡា និងរួមផ្សំជាមួយកត្តាគ្រូបង្រៀន មានជំនាញច្បាស់លាស់ និងការគ្រប់គ្រង ព្រមទាំងអង្គការវិន័យរបស់សាលាបានល្អផង ទើបធ្វើឱ្យចក្ខុវិស័យរបស់សាលាឯកជន និងសាលារដ្ឋទទួលបានជោគជ័យ ដូច្នេះការអនុវត្តគោលការណ៍នេះ ត្រូវផ្សារភ្ជាប់នឹងការអប់រំមនសិកាស្នេហាជាតិ ការអប់រំអំពីប្រវត្តិសាស្ត្រ ការអប់រំវប្បធម៌សន្តិភាព ការគោរពសិទ្ឋិនិងសេចក្តីថ្លៃថ្នូររបស់មនុស្សជាតិ ការគោរពតាមគោលការណ៍សេរីភាពប្រជាធិបតេយ្យនិងយុត្តិធម៌សង្គម ការប្រឆាំងនឹងអំពើហិង្សា ការប្រយុទ្ធប្រឆាំងនឹងការប្រើប្រាស់គ្រឿងញៀន និង ការរើសអើងគ្រប់ប្រភេទ។
ក្នុងឱកាសនោះដែរ ឯកឧត្តមអភិបាលខេត្តសៀមរាប បានជំរុញដល់គណ:គ្រប់គ្រងសាលា ត្រូវបានខិតខំបន្ត បង្កើនគុណភាពនិងប្រសិទ្ធភាពនៃការអប់រំនៅគ្រប់កំរឹតសិក្សា ការបណ្តុះបណ្តាលបច្ចេកទេសនិងមុខជំនាញទាំងក្នុងគ្រឹះស្ថានរដ្ឋនិងឯកជន ឲ្យស្របតាមកំរឹតស្តង់ដារអន្តរជាតិ និងស្របតាមតម្រូវការអភិវឌ្ឍប្រទេស តាមរយៈនៃការពង្រឹងការងារបណ្តុះបណ្តាលនិងវិក្រឹតការគ្រូបង្រៀន កែលម្អកម្មវិធីសិក្សា ការធ្វើអធិការកិច្ច និងពង្រឹងសមត្ថភាពគ្រប់គ្រង ការលើកទឹកចិត្តគ្រូង្រៀន បង្កើនសមត្ថភាពបង្រៀន ពង្រឹងគុណភាពក្នុងការប្រឡងបញ្ចប់កំរឹតសិក្សានីមួយៗ ហើយការសិក្សាភាសាបរទេសក៏ត្រូវបានយកចិត្តទុកដាក់ផងដែរ ៕
អត្ថបទ និង រូបថត ៖ លោក ងិន គិមឡេង , លោក យូ វង្ស និង លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
