នៅព្រឹកថ្ងៃទី១២ ខែតុលា ឆ្នាំ២០១៩នេះ រាជរដ្ឋាភិបាលកម្ពុជា សម្រេចផ្ដល់ស្រូវពូជចំនួន២០តោន ដែលជាពូជស្រូវសែនក្រអូប មិនប្រកាន់រដូវ មានរយៈពេល១១៥ថ្ងៃ ជូនប្រជាកសិកររងគ្រោះដោយគ្រោះរាំងស្ងួតជិត៤០៦នាក់ នៅឃុំ២ក្នុងស្រុកសូទ្រនិគម គឺឃុំដានរុន និង ឃុំខ្ចាស់ សម្រាប់ស្តារឡើងវិញនូវការងារបង្កបង្កើនផលស្រូវនៅរដូវប្រាំង ក្រោមអធិបតីភាព ឯកឧត្តមអ្នកឧកញ៉ា សៀង ណាំំ អ្នកតំណាងរាស្ត្រមណ្ឌលសៀមរាប និងជាតំណាងដ៏ខ្ពង់ខ្ពស់ឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និង លោក ង៉ាន់ ភិរុណ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាប្រតិភូអមដំណើរ , ថ្នាក់ដឹកនាំមន្ទីរអង្គភាពនានាក្នុងខេត្ត អាជ្ញាធរស្រុក និង អាជ្ញាធរឃុំទាំងពីរ នៃស្រុកសូទ្រនិគម ។
លោក ម៉ក់ ប្រុស អភិបាលស្រុកសូទ្រនិគម បានឲ្យដឹងថា រយៈពេល៩ខែ ក្នុងឆ្នាំ២០១៩នេះ ស្រុកសូទ្រនិគមទទួលរងនូវគ្រោះមហន្តរាយកើតឡើង ក្នុងនោះរួមមាន ៖ ករណីខ្យល់កន្ត្រាក់ កើតឡើងចំនួន ៩លើក ស្មើនឹង៦ឃុំ បណ្តាលឲ្យរលំផ្ទះទាំងស្រុងចំនួន ៩ខ្នង របើកដំបូល១៨ខ្នង , ករណីរន្ទះបាញ់ កើតឡើងចំនួន៣លើក នៅឃុំពពេល២លើក និង ឃុំដានរុន១លើក បណ្តាលឲ្យរបួសមនុស្ស១នាក់ និងងាប់សត្វគោ២ក្បាល , ករណីអគ្គីភ័យ កើតឡើងចំនួន៤លើក នៅឃុំដំដែក២លើក , ឃុំតាយ៉ែក១លើក និង ឃុំខ្នារពោធិ៍១លើក បណ្តាលឲ្យខូចខាតផ្ទះទាំងស្រុង៣ខ្នង និងឆេះផ្ទះបាយ១ខ្នង , ករណីលង់ទឹកស្លាប់ កើតឡើងចំនួន២លើក នៅឃុំដានរុន១លើក និងឃុំកំពង់ឃ្លាំង ១លើក បណ្តាលឲ្យមនុស្សស្លាប់ចំនួន ២នាក់ , ករណីជីកអណ្តូងបាក់ដីសង្កត់ស្លាប់ កើតឡើង១លើក នៅឃុំដានរុន បណ្តាលឲ្យមនុស្សស្លាប់១នាក់ , ករណីធ្វើអត្តឃាតខ្លួនឯង កើតឡើងចំនួន ១លើក នៅឃុំដានរុន , ករណីគ្រោះទឹកជំនន់ ទឹកហូររំលងផ្លូវបណ្តាលឲ្យចេះខូចផ្លូវមួយចំហៀង មានប្រវែង ៧០ម៉ែត្រ ស្ថិតនៅភូមិសំរោង ឃុំខ្នារពោធិ៍ ត្រង់ចំណុចខាងក្រោមត្រពាំងឈូក និង ករណីគ្រោះរាំងស្ងួត បណ្ដាលធ្វើឲ្យខូចខាតស្រូវប្រជាពលរដ្ឋទាំងស្រុង សរុបចំនួន ២០០ហិកតា នៅឃុំដានរុន ១៥០ហិកតា និងឃុំខ្ចាស់ ៥០ហិកតា ។
មានប្រសាសន៍ក្នុងឱកាសនោះ លោក ង៉ាន់ ភិរុណ អភិបាលរងខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា គណៈកម្មាធិការជាតិគ្រប់គ្រងគ្រោះមហន្តរាយ និងក្រសួងកសិកម្ម រុក្ខាប្រមាញ់ និងនេសាទ ដែលបានយកចិត្តទុកដាក់ខ្ពស់ ក្នុងផ្តល់ជូនគ្រាប់ពូជស្រូវនាពេលកន្លងមក និងគ្រាប់ពូជស្រូវនាពេលនេះ បើទោះបីជាការផ្តល់ជូនគ្រាប់ពូជស្រូវនេះ ពុំបានគ្រប់គ្រាន់ តាមតម្រូវការរបស់បងប្អូនប្រជាកសិករក៏ពិតមែន តែនេះជាការចូលរួមចំណែកដល់បងប្អូនប្រជាកសិករបានមួយកម្រិត ដែរ ហើយខ្ញុំសង្ឃឹមថា បងប្អូនប្រជាពលរដ្ឋ នឹងយកពូជស្រូវដែលចែកជូននាពេលបន្តិចទៀតនេះ ដើម្បីធ្វើការស្តារឡើងវិញ នាពេលទឹកស្រកទៅវិញ និងបានពូជគ្រាប់ស្រូវសម្រាប់បង្កបង្កើនផលនៅឆ្នាំក្រោយទៀត ។
លោក ង៉ាន់ ភិរុណ មានប្រសាសន៍ទៀតថា ដោយនាពេលបច្ចុប្បន្ននេះមានការបម្រែបម្រួលអាកាសធាតុទូទាំងពិភពលោក និងនៅក្នុងតំបន់បានធ្វើឱ្យប្រទេសនីមួយៗ ជួបប្រទះនឹងគ្រោះមហន្តរាយផ្សេងៗកើតឡើង ជាក់ស្តែងនៅក្នុងប្រទេសកម្ពុជាយើង មានបណ្តាខេត្តមួយចំនួនទៀតបានជួបប្រទះនឹងគ្រោះមហន្តរាយផ្សេងៗពីគ្នា ក្នុងនោះនៅក្នុងខេត្តសៀមរាបរបស់យើង រយៈពេល ០៩ខែ ក្នុងឆ្នាំ២០១៩នេះ មានគ្រោះមហន្តរាយកើតជាច្រើន ប៉ុន្តែនាពេលនេះសូមលើកយកតែគ្រោះរាំងស្ងួត និងគ្រោះជំនន់ទឹកភ្លៀងតែប៉ុណ្ណោះ ដែលមានផលប៉ះពាល់ និងខូចខាត គឺគិតត្រឹមថ្ងៃទី៣០ ខែសីហា ឆ្នាំ២០១៩ ប្រជាកសិករទូទាំងខេត្តសៀមរាបធ្វើការបង្កបង្កើនផលដំណាំស្រូវរដូវវស្សាបានចំនួន ១៤៧.៩៨០ ហិកតា នៃផែនការ ១៨៦.៥៦៥ ហិកតា ហើយជាមួយនឹងការបង្កបង្កើនផលនេះ ដោយពុំមានភ្លៀងធ្លាក់គ្រប់គ្រាន់បានធ្វើឱ្យដំណាំស្រូវរបស់ប្រជាកសិករទទួលរងនូវគ្រោះរាំងស្ងួតមានសរុបចំនួន ៣៦.៤១០ ហិកតា លើ១១ក្រុង-ស្រុក ស្មើនឹង៧៤ឃុំ និង៥៨៥ភូមិ មានគ្រួសាររងគ្រោះសរុបចំនួន ៤៣.៨៩៣ គ្រួសារ ក្នុងនោះដំណាំស្រូវខូចខាតចំនួន ៤.៦៥៧ ហិកតា លើ៦ស្រុក ស្មើ៣២ឃុំ និង២២២ភូមិ ដែលមានគ្រួសាររងការខូចខាតចំនួន ៦.២៣៩ គ្រួសារ។
លោក ង៉ាន់ ភិរុណ មានប្រសាសន៍បន្ថែមទៀតថា នៅក្នុងកំឡុងខែកញ្ញា ឆ្នាំ២០១៩នេះ ក៏មានភ្លៀងធ្លាក់ជាប់ៗគ្នា បណ្តាលឱ្យមានគ្រោះជំនន់ទឹកភ្លៀង ចំនួន១០ស្រុក នៃខេត្តសៀមរាប ក្នុងនោះមានស្រុកក្រឡាញ់, ស្រុកអង្គរជុំ, ស្រុកវ៉ារិន, ស្រុកស្វាយលើ, ស្រុកស្រីស្នំ, ស្រុកប្រាសាទបាគង, ស្រុកអង្គរធំ ស្រុកពួក, ស្រុកសូទ្រនិគម ស្រុកជីក្រែង ដែលរងផលប៉ះពាល់ឃុំចំនួន៣៩ ស្មើនឹង ១២២ភូមិ ហើយបង្កឱ្យមានផលប៉ះពាល់ និងការខូចខាត ដោយលិចបរិវេណមន្ទីរពេទ្យបង្អែកស្រុក និងមណ្ឌលសុខភាព ២កន្លែង, លិចបរិវេណសាលារៀន ២១ កន្លែង , ទឹកហូរចូលផ្សារ ១ កន្លែង , ទឹកលិចក្រោមផ្ទះប្រជាពលរដ្ឋកម្រិតធ្ងន់ ចំនួន ៥ ខ្នង , ទឹកលិចក្រោមផ្ទះប្រជាពលរដ្ឋកម្រិតស្រាល ចំនួន ៩១០ ខ្នង , លិចស្រូវពង្រោះពលរដ្ឋ ចំនួន ៦.៤៥២ ហិកតា , ដាច់ស្ពាន ២ កន្លែង ប្រវែង ២៧ ម៉ែត្រ , ប្រព័ន្ធធារាស្ត្រ ចំនួន ១២ ក្នុងនោះ ទំនប់ទឹកប្រវែង ៦៥៣ម៉ែត្រ ប្រឡាយមេប្រវែង ១.៣៤០ម៉ែត្រ ប្រឡាយរងប្រវែង ៣.៤០០ម៉ែត្រ ប្រឡាយស្រោចស្រពប្រវែង ៦០០ម៉ែត្រ និងសំណង់សិល្បការចំនួន ៥កន្លែង , ផ្លូវដែលគ្រប់គ្រងដោយមន្ទីរអភិវឌ្ឍន៍ជនបទ និងក្រសួងអភិវឌ្ឍន៍ជនបទ ប៉ះពាល់ និងខូចខាត ចំនួន១៥ខ្សែ ប្រវែង ១៥៣.៩០០ម៉ែត្រ និង ផ្លូវដែលគ្រប់គ្រងដោយមន្ទីរសាធារណការ និងដឹកជញ្ជូនខេត្ត និងរដ្ឋបាលខេត្ត ប៉ះពាល់ និងខូចខាត ចំនួន ១១ខ្សែ ប្រវែងចំនួន ១៥ ២៥០ម៉ែត្រ។
មានប្រសាសន៍ក្នុងឱកាសនោះ ឯកឧត្តមអ្នកឧកញ៉ា សៀង ណាំំ អ្នកតំណាងរាស្ត្រមណ្ឌលសៀមរាប បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្ដេចទាំងពីរ តែងតែគិតគូរពីសុខទុក្ខរបស់ប្រជាពលរដ្ឋយើងនៅទូទាំងប្រទេស និង សម្ដែងការសោកស្ដាយចំពោះការខូចខាតដំណាំស្រូវរបស់បងប្អូនប្រជាកសិករយើងកន្លងមក និង បានសម្ដែងនូវការអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ដែលបានផ្តល់គ្រាប់ពូជស្រូវជូនដល់ប្រជាពលរដ្ឋយើងបានទាន់ពេលវេលា និង អរគុណដល់បងប្អូនប្រជាពលរដ្ឋទាំងអស់ ដែលបានបោះឆ្នោតគាំទ្រសម្ដេចតេជោ ហ៊ុន សែន ឲ្យធ្វើជានាយករដ្ឋមន្ត្រីនៃកម្ពុជា អាណត្តិទី៦បន្តទៀត ហើយសង្ឃឹមជឿជាក់ថា នឹងបន្តគាំទ្របេក្ខភាពសម្ដេចតេជោ ហ៊ុន សែន ធ្វើជានាយករដ្ឋមន្ត្រីនៃកម្ពុជា នៅអាណត្តិក្រោយៗទៀត ។
ឯកឧត្តមអ្នកឧកញ៉ា សៀង ណាំំ អ្នកតំណាងរាស្ត្រមណ្ឌលសៀមរាប មានប្រសាសន៍ទៀតថា គ្រាប់ពូជស្រូវដែលរាជរដ្ឋាភិបាលកម្ពុជា បានផ្ដល់ជូនដល់បងប្អូនប្រជាពលរដ្ឋយើងនាពេលនេះ គឺជាពូជស្រូវមានគុណភាពដុះបានជិត១០០ភាគរយ និង មានទិន្នផលខ្ពស់ ដែលជំនាញកសិកម្មបានសំរិតសំរាំងច្បាស់លាស់ ប៉ុន្តែសុំកុំយកទៅកិនដើម្បីដាំបាយបរិភោគ ហើយសុំឲ្យអាជ្ញាធរឃុំទាំងពីរ ត្រូវបែងចែកជូនដល់ប្រជាពលរដ្ឋទៅតាមចំនួនតម្រូវការដែលពួកគាត់បានស្នើសុំ ជាពិសេស អាជ្ញាធរឃុំ ត្រូវយកចិត្តទុកដាក់បម្រើសេវាសាធារណៈជូនប្រជាពលរដ្ឋឲ្យបានល្អប្រសើរថែមទៀត និង ត្រូវយកចិត្តទុកដាក់ពីសុខទុក្ខរបស់ប្រជាពលរដ្ឋ ក្នុងករណីដែលពួកគាត់សុំការពឹងពាក់ពីយើង ។
សូមបញ្ជាក់ថា ចំពោះផលប៉ះពាល់ និងការខូចខាតដោយគ្រោះរាំងស្ងួត ដោយមានការយកចិត្តទុកដាក់ពីរាជរដ្ឋាភិបាលកម្ពុជា តាមរយៈគណៈកម្មាធិការជាតិគ្រប់គ្រងគ្រោះមហន្តរាយ ក្រសួងកសិកម្ម រុក្ខាប្រមាញ់ និងនេសាទ គណៈកម្មាធិការគ្រប់គ្រងគ្រោះមហន្តរាយខេត្ត សាខាកាកបាទក្រហមកម្ពុជាខេត្តសៀមរាប ក្រុង-ស្រុក មន្ទីរ-អង្គភាពជំនាញ យើងបានផ្តល់គ្រាប់ពូជស្រូវ ចំនួន២៩តោន ជូនប្រជាកសិករចំនួន ៥៤០គ្រួសារ រួចមកហើយ គឺនៅស្រុកពួក និងស្រុកក្រឡាញ់ ៕
អត្ថបទ ៖ លោក លីវ សាន្ត
រូបថត ៖ លោក អ៊ុន ណារាជ្យ
