យោងតាមសេចក្ដីជូនដំណឹងរបស់រដ្ឋបាលខេត្តសៀមរាប ចុះផ្សាយថ្ងៃទី១១ខែតុលាឆ្នាំ២០១៩ បានឲ្យដឹងថា ព្រះរាជពិធីបុណ្យអំទូក បណ្តែតប្រទីប និងសំពះព្រះខែ អកអំបុក គឺជាបុណ្យប្រពៃណីជាតិខ្មែរ ដែលតែងតែប្រារព្ធធ្វើឡើងតាំងពីបរមបុរាណយូរលង់ណាស់មកហើយ ដែលព្រះរាជពិធីនេះ ធ្វើឡើងដើម្បីចូលរួមលើកកម្ពស់វប្បធម៌ ទំនៀមទម្លាប់និងប្រពៃណីជាតិ ក៏ដូចជាផ្តល់ឱកាសជូនប្រជាពលរដ្ឋ ព្រមទាំងទាក់ទាញភ្ញៀវទេសចរជាតិ និងអន្តរជាតិបានចូលរួមទស្សនាកម្សាន្តសប្បាយ នៅក្នុងតំបន់ទេសចរណ៍អង្គរខេត្ដសៀមរាប ដែលមានរយៈពេល៤ថ្ងៃ ដោយចាប់ពីថ្ងៃទី០៩ដល់ថ្ងៃទី១២ ខែវិច្ឆិកាឆ្នាំ២០១៩ នៅតាមបណ្តោយដងស្ទឹងសៀមរាប ចាប់ពីស្ពានអតីតមន្ទីរទេសចរណ៍ចាស់ រហូតដល់ស្ពានវត្តដំណាក់ ។
សេចក្ដីជូនដំណឹង បានបញ្ជាក់បន្ថែមថា សម្រាប់កម្មវិធីថ្ងៃទី១- គឺនៅថ្ងៃទី៩ ខែវិច្ឆិកា ពិធីទទួលទានអំបុកខ្មែរ ការពារជាតិ សាសនា ព្រះមហាក្សត្រ , ថ្ងៃទី២- គឺនៅថ្ងៃទី១០ ខែវិច្ឆិកា ឆ្នាំ២០១៩ វេលាម៉ោង១៥៖០០នាទី ជាពិធីបើកការប្រណាំងទូក-ង- ចាប់ដំណើរការ , ថ្ងៃទី៣- គឺនៅថ្ងៃទី១១ ខែវិច្ឆិកា ឆ្នាំ២០១៩ ម៉ោង១៥៖០០នាទី ជាការប្រណាំងទូក-ង- ហើយនៅម៉ោង២៣៖០០នាទី មានរៀបចំពិធីដង្ហែ និងបណ្ដែតប្រទីប ពិធីសំពះព្រះខែ អកអំបុក និង ថ្ងៃទី៤- គឺនៅថ្ងៃទី១២ ខែវិច្ឆិកា ឆ្នាំ២០១៩ វេលាម៉ោង១៥៖០០នាទី ជាការប្រណាំងទូក-ង- វគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ ។
សេចក្ដីជូនដំណឹងក៏បានឲ្យដឹងទៀតថា ព្រឹត្តិការណ៍នេះ ក៏មានការរៀបចំការដាក់តាំងពិព័រណ៍ម្ហូបអាហារ ការប្រគុំតន្ត្រី សិល្បៈកម្សាន្ត ដើម្បីញ៉ាំងឱ្យព្រះរាជពិធីបុណ្យកាន់តែមានភាពអធិកអធមថែមទៀត ដោយបានអំពាវនាវដល់ព្រះថេរានុត្ថេរៈគ្រប់ព្រះអង្គ សម្តេច ទ្រង់ឯកឧត្តម លោកជំទាវ លោកឧកញ៉ា លោក លោកស្រី អ្នកនាងកញ្ញា និមន្ត យាង និងអញ្ជើញចូលរួមទស្សនាកម្សាន្តសប្បាយឱ្យបានច្រើនកុះករ ៕
ព័ត៌មានជាតិ ថ្មីៗ
អត្ថបទ និង រូបភាព ៖ លោក បូ សាវី
កែសម្រួលអត្ថបទ ៖ លោក លីវ សាន្ត
