លោក ឃូ ស៊ុយផេង , លោក គង់ ចាំងភើង , លោក តែ គុយហួរ , លោក ឡាវ ម៉ាន់ចុង , លោក យាំ យ៉ាត់កង និង ក្រុមគ្រួសារ ជាសប្បុរសជនអណិកជនរស់នៅសហរដ្ឋអាមេរិក បានផ្តល់អំណោយដ៏សប្បុរសធម៌ តាមរយៈលោក សុខ ថុល នាយករដ្ឋបាលសាលាខេត្តសៀមរាប នូវគ្រឿងឧបភោគ បរិភោគ ជូនដល់បងប្អូនប្រជាពលរដ្ឋ ក្រ១ និង ក្រ២ ចំនួន ៧៤គ្រួសារ ក្នុងឃុំកំពង់ភ្លុក ស្រុកប្រាសាទបាគង ត្រូវបាននាំយកទៅចែកជូនពួកគាត់ កាលពីរសៀលថ្ងៃទី ១១ ខែតុលា ឆ្នាំ២០១៩ នៅបរិវេណវត្តកំពង់ភ្លុក ។
លោក នឹង នី មេឃុំកំពង់ភ្លុក បានបញ្ជាក់ថា ប្រជាពលរដ្ឋទូទាំងឃុំក្រៅពីការនេសាទ មួយចំនួនទៅធ្វើកម្មករសំណង់នៅក្នុងក្រុងសៀមរាប នៅរដូវទឹកសម្រក់បានធ្វើការដាំដុះបន្លែ បង្ការួមផ្សំ គឺពុំមានស្រែធ្វើនឹងគេទេ ។
ក្នុងឱកាសនោះដែរ លោក ឃូ ស៊ុយផេង និង គង់ ចាំងភើង តំណាងសប្បុរសជន បានឲ្យដឹងថា ក្នុងអំឡុងពេលបងប្អូនជាសប្បុរសជនអណិកជនរស់នៅសហរដ្ឋអាមេរិក បានធ្វើដំណើរមកទស្សនាកម្សាន្តរមណីដ្ឋានធម្មជាតិកំពង់ភ្លុកនេះ បានឃើញនូវជីវភាពរបស់នៅរបស់បងប្អូនប្រជាពលរដ្ឋក្នុងតំបន់នេះ ហើយក៏មានក្ដីអាណិតអាសូរចំពោះបងប្អូនមួយចំនួនដែលមានមុខរបរជាប្រជានេសាទមានជីវភាពខ្វះខាត ដោយនៅក្នុងរដូវបិទនេសាទនេះ ដែលធ្វើឲ្យជីវភាពរបស់បងប្អូនប្រចាំថ្ងៃជួបការលំបាក ដូច្នេះហើយទើបក្រុមរបស់លោករួមថវិកា ដើម្បីទិញជាស្បៀងអាហារ ក្នុងគោលបំណង ក្នុងការធ្វើអំណោយទាននេះ ជូនដល់ប្រជាពលរដ្ឋក្រីក្រ ទីទ័ល គឺដើម្បីជួយសម្រាល់នូវទុក្ខលំបាករបស់បងប្អូន ដែលបានកំពុងជួបការខ្វះខាតស្បៀងអាហារក្នុងការរស់នៅប្រចាំថ្ងៃ ហើយក៏ជាការផ្គត់ផ្គង់ដល់បងប្អូនបានមួយរយៈខ្លី ទំរាំដល់រដូវបើកនេសាទនៅពេលខាងមុខ ។
មានប្រសាសន៍នាឱកាសនោះ លោក សុខ ថុល បានថ្លែងនូវអំណរគុណចំពោះទឹកចិត្តដ៏សប្បុរសធម៌របស់លោកពូ អ្នកមីង បងប្រុស បងស្រី ដែលបានឃ្លាតចាកឆ្ងាយពីមាតុប្រទេសខ្លួនក៏ពិតមែន តែដួងចិត្តរបស់អស់លោក គឺមានមនសិកាចំពោះជាតិមាតុភូមិ ហើយតាមរយៈអំណោយសប្បុរសធម៌ទាំងនេះ ក៏ជាការចូលរួមចែករំលែកទុក្ខលំបាករបស់ប្រជាពលរដ្ឋក្នុងឃុំកំពង់ភ្លុកនេះ ជាមួយរាជរដ្ឋាភិបាលកម្ពុជា គឺជាឃុំមួយដែលមានប្រជាពលរដ្ឋស្ថិតនៅក្នុងបន្ទាត់ក្រីក្រខ្ពស់ នៅទូទាំងខេត្តសៀមរាប ។
លោក សុខ ថុល បានបញ្ជាក់ទៀតថា ឃុំកំពង់ភ្លុកនេះ ក៏ជាគោលដៅរបស់គម្រោង លាប ទោះបីតំបន់នេះជារមណីយដ្ឋាន ទេសចរណ៍ធម្មជាតិក៏ពិតមែន តែចំពោះជីវភាពរបស់ប្រជាពលរដ្ឋនៅមានកម្រិត ដូច្នេះក្នុងឱកាសនេះ សូមសំណូមពរដល់ម្ចាស់អំណោយ សូមឲ្យបន្តនូវសិល្បៈចែករំលែកនេះ ទៅតាមបណ្តាភូមិឃុំផ្សេងៗទៀត និង សូមផ្តាំផ្ញើដល់ប្រជាពលរដ្ឋទាំងអស់ ត្រូវយកចិត្តទុកដាក់ចំពោះបញ្ហាសុខភាព អនាម័យ ដោយត្រូវចេះធ្វើអនាម័យ បរិស្ថាននៅក្នុងតំបន់កំពង់ភ្លុក ក្នុងការទទួលស្វាគមន៍ដល់ភ្ញៀវទេសចរណ៍ជាតិ អន្តរជាតិ ដើម្បីជាអត្ថប្រយោជន៍ដល់បងប្អូននៅក្នុងឃុំកំពង់ភ្លុកទាំងមូល សម្រាប់ទៅពេលអនាគត ។
គួររំលឹកថា អំណោយដែលផ្តល់ជូនបងប្អូន ក្រ១ និង ក្រ២ទាំង៧៤គ្រួសារនាឱកាសនោះ គឺក្នុងមួយគ្រួសារ ទទួលបានអង្ករ ២៥គីឡូក្រាម , មី១កេស , ទឹកត្រី ១យូរ , ទឹកស៊ីអ៊ីវ ១យូរ , អំបិល ៥គក្រ និង ថវិកា ២ម៉ឺនរៀល ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
