នៅព្រឹកថ្ងៃទី១១ ខែតុលា ឆ្នាំ២០១៩ ឯ.ឧ នាយឧត្តមសេនីយ សាស្ត្រាចារ្យ សេង ផល្លី ប្រធានបណ្ឌិតសភានគរបាលកម្ពុជា តំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីបិទវគ្គបណ្តុះបណ្ដាលកម្រិតបឋមវិជ្ជាជីវៈនគរបាលជំនាន់ទី១៣ លើកទី៣ ដល់សិក្ខាកាម នៃសាលានគរបាលជាតិភូមិភាគ៤ ខេត្តសៀមរាប ស្ថិតក្នុងភូមិសាស្ត្រស្រុកប្រាសាទបាគង ខេត្តសៀមរាប។
ឯកឧត្តម នាយឧត្តមសេនីយ៍ សេង ផល្លី បានក្រើនរំលឹកដល់ សិក្ខាកាមទាំង ១២៧នាក់ ក្នុងនោះស្រី២៤នាក់ ដែលទើបតែបញ្ចប់វគ្គបណ្តុះបណ្ដាលនៅទីនេះ ត្រូវអនុវត្តន៍ឲ្យបានម៉ឺងម៉ាត់នូវខ្លឹមសារ ដែលខ្លួនបានធ្វើការសច្ចាប្រណិធាន នៅចំពោះមុខថ្នាក់ដឹកនាំ និងប្រកាន់ខ្ជាប់នូវពាក្យសម្បថ។ នៅពេលចុះទៅអនុវត្តការងារ ត្រូវធ្វើតាមចំណេះដឹងដែលបានសិក្សានៅក្នុងសាលា ដោយត្រូវប្រកាន់ខ្ជាប់ និងប្រកបដោយវិជ្ជាជីវៈ ត្រូវមានវិន័យល្អ សីលធម៌ល្អ ឥរិយាបថល្អ និងអាកប្បកិរិយាល្អ ចំពោះប្រជាពលរដ្ឋ ត្រូវខិតខំត្រងត្រាប់ស្ដាប់តាមការណែនាំពីថ្នាក់ដឹកនាំ និងត្រូវមានទំនួលខុសត្រូវលើភារកិច្ចរបស់ខ្លួន និងត្រូវមានសាមគ្គីភាពផ្ទៃក្នុង ។ មួយវិញទៀត នៅពេលចុះទៅអនុវត្តការងារ ត្រូវតែប្រកាន់ខ្ជាប់នូវគោលការណ៍ ០៣យ៉ាង សមធម៌ មិនលម្អៀង និង គុណភាព។
ឯកឧត្តមនាយឧត្តមសេនីយ៍ បានសង្កត់ធ្ងន់បន្ថែមទៀតថា៖ គុណភាព គឺមិនអាចសម្របសម្រួលបានទេ ហើយអ្នកសិក្សាក៏ត្រូវរៀនឲ្យចេះ?មិនមែនរៀនឲ្យចប់? ហើយក៏ត្រូវប្រកាន់ខ្ជាប់នូវគុណតម្លៃទាំង៦ ក្នុងនោះត្រូវមាន វិន័យ គុណភាព ក្រមសីលធម៌វិជ្ជាជីវៈ ការទទួលខុសត្រូវ ការប្ដេជ្ញាចិត្ត និងនវានុ វត្តន៍ ក្រោមទិសស្លោក“ យើងរួមគ្នាកសាងវប្បធម៌គុណភាព ” ។
ក្នុងឱកាសនោះដែរ លោកឧត្តមសេនីយ៍ត្រី សាយ រិទ្ធីសក្កិ នាយកសាលានគរបាលជាតិភូមិភាគ៤ បានគូសបញ្ជាក់ ថា វគ្គបណ្ដុះបណ្ដាលកម្រិតបឋមវិជ្ជាជីវៈនគរបាល ជំនាន់ទី១៣ លើកទី៣ នឹងជ្រើសតាំងស៊ប់ក្នុងក្របខណ្ឌមន្ត្រីនគរបាលជាតិកម្ពុជា នៅសាលនគរបាលជាតិភូមិភាគ៤ ខេត្តសៀមរាប ចំនួន ១២៧ នាក់ ស្រី២៤នាក់។
អត្ថបទ និងរូបភាព៖ លោក អ៊ិន សីហរិទ្ធ
កែសម្រួលអត្ថបទ៖ សេង ផល្លី
