នៅព្រឹកថ្ងៃទី 15 ខែតុលាឆ្នាំ 2019 នេះ សមត្ថកិច្ច នៃស្នងការដ្ឋានខេត្តសៀមរាបបាន អញ្ជើញម្ចាស់គណនីហ្វេសប៊ុកមួយមកបំភ្លឺ ជុំវិញករណីបានផ្សព្វផ្សាយ និងបង្ហោះព័ត៌មានមិនពិត អំពីគម្រោងលក់ដីឡូតិ៍ របស់ខ្លួនស្ថិតនៅទីតាំងភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប។
ការអញ្ជើញភាគីក្រុមហ៊ុន ដីឡូតិ៍រាជសីក្រុងអង្គររៀលអ៊ីស្ទេត នេះ តបតាមលិខិតរបស់រដ្ឋបាលខេត្តសៀមរាបលេខ ៥៣៤/១៩ លស ចុះនៅថ្ងៃទី 3 ខែតុលាឆ្នាំ 2019។
ខ្លឹមសារដែលបានផ្សព្វផ្សាយ តាមបណ្តាញសង្គម Facebook ដោយក្រុមហ៊ុនដីឡូតិ៍រាជសីក្រុងអង្គររៀលអ៊ីស្ទេត នៅទីតាំងខាងលើនេះ បានបង្ហាញថា គម្រោងដីឡូតិ៍របស់ខ្លួនទាំងនោះស្ថិតនៅក្បែរសួនសត្វបាតសមុទ្រសិប្បនិមិ្មតិ កាស៊ីណូចិនម៉ាកាវ និងព្រលានយន្តហោះទេសចរណ៍ទី២ បន្ទាប់ពីក្រុងអង្គរ ។
ពាក់ព័ន្ធនឹងការផ្សព្វផ្សាយព័ត៌មានមិនពិតនេះរដ្ឋបាលខេត្តសៀមរាបបានប្រកាសក្នុងផេកផ្លូវការ របស់រដ្ឋបាលខេត្តថា ពុំមានការអនុញ្ញាតច្បាប់ ឲ្យបើកកាស៊ីណូក្នុងខេត្តសៀមរាបឡើយ។
លោក ហ៊ិន ផាន្នី ប្រធានក្រុមប្រឹក្សាភិបាលរបស់ក្រុមហ៊ុនរាជសីក្រុងអង្គររៀលអ៊ីស្ទេត ក៏បានទទួលស្គាល់កំហុស និងសុំទោសដល់ធារណៈជន ចំពោះកំហុសរបស់បុគ្គលិក ដែលភ័ន្តច្រលំ និងផ្សព្វផ្សាយព័ត៌មានខុសពីពិតនេះ។
បន្ទាប់ពីមិនបានស្គាល់នូវកំហុស លោកឧត្តមសេនីយ៍ត្រី ហួត សុធី ស្នងការរង នៃស្នងកាដ្ឋាននគរបាលខេត្តសៀមរាប បានធ្វើកិច្ចសន្យា ដើម្បីឱ្យក្រុមហ៊ុនខាងលើបញ្ឈប់សកម្មភាពផ្សព្វផ្សាយព័ត៌មានមិនពិតនេះបន្តទៀត ព្រោះអាចប្រឈម និងការជាប់ទោសព្រហ្មទណ្ឌ ។
