កម្ពូជាគ្រោងនឹងបោសសំអាតមីននិងសំណល់គ្រឿងផ្ទុះពីសង្គ្រាមឱ្យអស់នៅឆ្នាំ២០២៥ដើម្បីរំដោះផ្ទៃដីដែលមានមីននិងគ្រាប់សំណល់ពីសង្គ្រាមជូនប្រជាពលរដ្ឋ ប៉ុន្តែបច្ចុប្បន្ន អាជ្ញាធរមីនជួបបញ្ហាប្រឈមពីរយ៉ាងគឺកង្វះប្រតិបត្តិករបោសសំអាតមីន ព្រោះមន្ត្រីបោសសំអាតមីនក្នុងរយៈពេលជាង២០ឆ្នាំមកនេះ ពួកគាត់មានវ័យកាន់តែចាស់ហើយ និងដោយសារការងារបោសសំអាតមីនត្រូវការអ្នដែលមានសុខភាព ស្មារតីរឹងមាំល្អ និងបញ្ហាទីពីរគឺកង្វះថវិកា។ នេះបើតាមប្រសាសន៍ ឯកឧត្តម ទេសរដ្ឋមន្ត្រី លី ធុជ អនុប្រធានទី១ នៃអាជ្ញាធរមីនកម្ពុជានៅព្រឹកថ្ងៃទី១៧ ខែតុលា ឆ្នាំ២០១៩នេះ ក្នុងឱកាសដែរឯកឧត្តម បានដឹកនាំក្រុមម្ចាស់ជំនួយគម្រោងបោសសម្អាតមីន ដើម្បីស្តាប់លទ្ធផលដំណាក់កាលទី៣ រួមមាន តំណាងប្រទេសអូស្ត្រាលី Department of Foreign Affairs and Trade (DFAT) អង្គការយូអិនឌីភី (UNDP) ថ្នាក់ដឹកនាំអាជ្ញាធរមីននិងអាជ្ញាធរមូលដ្ឋាន ចុះពិនិត្យសកម្មភាពបោសសម្អាតមីនជាក់ស្តែងនៅស្រុកស្វាយចេកខេត្តបន្ទាយមានជ័យនិងសំណេះសំណាលជាមួយប្រជាពលរដ្ឋដែលជាអ្នកទទួលផលពីដីបោសសម្អាតមីនរួច ដើម្បីស្វែងយល់ពីបញ្ហាប្រឈមនានា មុនពេលបោសសម្អាតមីន និងភាពប្រសើឡើងបន្ទាប់ពីបោសសម្អាតមីន និងសំណល់ជាតិផ្ទុះពីសង្គ្រាមរួច។
ឯកឧត្តម មានប្រសាសន៍ទៀតថា រាជរដ្ឋាភិបាលកម្ពុជាបានជួយគាំទ្រថវិកាលើវិស័យមីនក្នុងមួយឆ្នាំៗ ពី ៧ទៅ១០លានដុល្លារ ហើយក្រៅពីនេះរាជរដ្ឋាភិបាល ក៏បានការផ្តល់ជំនួយថវិកាជាបន្តបន្ទាប់ពីបណ្តាអង្គការដៃគូនិងបណ្តាប្រទេសជាមិត្តមួយចំនួនដែលសហប្រតិបត្តិការលើការងារបោសសំអាតមីននៅកម្ពុជាជាង៤០០លានដុល្លារក្នុងរយៈពេលជាង២០ឆ្នាំកន្លងមក។
ឯកឧត្តម មានប្រសាសន៍បន្តថា ទោះជាយ៉ាងនេះក្តី ក៍យើងនៅតែបន្តខិតខំកៀគរធនធានថវិកាពីបណ្តាប្រទេសជាមិត្តបន្ថែមទៀតដើម្បចូលរួមក្នុងការងារមនុស្សធម៌បោសសំអាតមីនឱ្យបានចប់ជាស្ថាពរជូនមាតុភូមិកម្ពុជាធ្វើឱ្យកម្ពុជាគ្មានមីននិងសំណល់គ្រឿងផ្ទុះពីសម័យសង្គ្រាមឱ្យអស់នៅឆ្នាំ២០២៥ ។
ក្នុងឱកាសនោះផងដែរ តំណាងប្រទេសអូស្ត្រាលី និងអង្គការ UNDP ក៏បានសំដែងនៅការពេញចិត្តចំពោះក្នុងការប្រើប្រាស់ជំនួយសម្រាប់បោសសម្អាតមីនមនុស្សធម៌បានចំគោលដៅដែលបានចូលរួមចំណែកជាមួយរាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោនាយករដ្ឋមន្ត្រីក្នុងការកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងការកាត់បន្ថយភាពក្រីក្រនៅតាមតំបន់ជនបទ ព្រមទាំងបានប្តេជ្ញាបន្តគាំទ្រនិងជួយដល់កម្ពុជាលើវិស័យបោសសម្អាតមីនរហូតដល់ឆ្នាំ២០២៥ ស្របតាមផែនការយុទ្ធសាស្ត្រជាតិសកកម្មភាពមីន ដែលរាជរដ្ឋាភិបាលកម្ពុជាបានកំណត់។
អត្ថបទ និង រូបភាព៖ យូ វង្ស
កែសម្រួល ៖អ៊ុន ណារាជ្យ
