សមិទ្ឋផលជាគរុភ័ណ្ឌវត្ត ឬហៅថាទីសំណាក់សង្ឃរស្មីប្រាសាទសង្កែសឹង្ហ ស្ថិតក្នុងភូមិត្រពាំងខ្ទះ ឃុំស្វាយលើ ស្រុកស្វាយលើ រួមមាន ៖ សាលាបុណ្យ ឬសាលាឆាន់ ១ខ្នង , សាឡុម ឬបោត ១ខ្នង , កុដិតូចៗសរុបចំនួន១០ខ្នង ប៉ុន្តែបានសាងសង់រួចជាស្ថាពរចំនួន៦ខ្នង ដោយក្នុង១ខ្នង មានតម្លៃ ៨០០ដុល្លារ និង កុដិបាយ ឬផ្ទះបាយ ១ខ្នងដែលសមិទ្ឋផលទាំងនេះ បានមកពីសទ្ឋាជ្រះថ្លាជួយឧបត្ថម្ភ របស់ពុទ្ធបរិស័ទ ជិតឆ្ងាយទាំងក្នុងនិងក្រៅប្រទេស ក្នុងនោះមានអ៊ំប្រុស ម៉ន បឿន និងអ៊ំស្រី លឹម គាត់ ព្រមទាំងបងប្អូនកូនចៅ ដែលរស់នៅឯនាយសមុទ្រ និងខេត្តព្រះសីហនុ បានកសាងកុដិថ្មថ្មី១ខ្នង ទុកជាសម្បត្តិសង្ឃ ព្រមទាំងចំណាយថ្លៃសម្ភារនិងថវិកា សរុបចំនួន២៥.១១២,៤៩ ដុល្លារអាមេរិក ត្រូវបានរៀបចំពិធីកាត់ខ្សែបូរឆ្លង និង សម្ពោធសមិទ្ឋផលមួយចំនួនទៀត កាលពីថ្ងៃទី២១ ខែតុលា ឆ្នាំ២០១៩ នេះក្រោមព្រះអធិបតីភាព ព្រះធម្មសេរី ជុំ គឹមឡេង ព្រះសុមង្គលសិលាចារ្យ អាភាករោ ព្រះមេគណខេត្ត និង វត្តមានលោក អៀង ពិសិដ្ឋ អភិបាលស្រុកស្វាយលើ ព្រមទាំងប្រជាពុទ្ឋបរិស័ទចំណុះជើងវត្ត និងសប្បុរសជនជិតឆ្ងាយជាច្រើនរូបផងដែរ។
ព្រះតេជគុណ ឆន្ទៈរក្ខិត្តោ សំ ង៉ែត ចៅអធិការស្តីទីវត្តរស្មីប្រាសាទសង្កែសឹង្ហ មានសង្ឃដីកាថា វត្តនេះ ត្រូវបានរៀបចំកសាងឡើង នៅដើមឆ្នាំ២០១៨ តាមសំណើសុំរបស់ប្រជាពលរដ្ឋនៅមូលដ្ឋាននេះ ដែលកាលពីមុនប្រជាពលរដ្ឋនៅមូលដ្ឋាននេះ មានចំនួនជិត ៨០០គ្រួសារ ក្នុងពេលមានបុណ្យទានម្តងៗ ពួកគាត់ត្រូវធ្វើដំណើរទៅកាន់វត្តផ្សេងៗមានចម្ងាយឆ្ងាយប្រមាណជា៨ទៅ ១២គីឡូម៉ែត្រ បានធ្វើឲ្យមនុស្សចាស់គាត់ខ្វះលទ្ឋភាព និងពិបាកក្នុងការធ្វើដំណើរដើម្បីទៅសមាទានសិល និងបុណ្យទានផ្សេងៗផងដែរ ខណៈបច្ចុប្បន្ន វត្តអារាមនេះ មិនទាន់ក្លាយជាវត្តពេញសិទ្ឋិនៅឡើយទេ ប៉ុន្តែបានរៀបចំសំណុំឯកសារសុំបង្កើតវត្តបញ្ជូនទៅថ្នាក់លើបន្តបន្ទាប់រួចរាល់ហើយដែរ ។
មានប្រសាសន៍ក្នុងឱកាសនោះ លោក អៀង ពិសិដ្ឋ អភិបាលស្រុកស្វាយលើ បានសាទរនូវសមិទ្ឋផលដែលវត្តទទួលបាននាពេលនេះ ដែលបង្ហាញឱ្យឃើញពីការគោរពស្រឡាញ់វិស័យព្រះពុទ្ឋសាសនា ដែលជាសានារបស់រដ្ឋ និងបង្ហាញពីការយកចិត្តទុកដាក់ចូលរួមអភិវឌ្ឍសង្គម របស់បងប្អូនប្រជាពុទ្ឋបរិស័ទទាំងផ្នែកពុទ្ឋចក្រ និងអាណាចក្រ ខណៈវិស័យទាំងពីរនេះ គឺមានទំនាក់ទំនងគ្នាយ៉ាងស្អិតរមួត ជាកញ្ចក់ឆ្លុះបង្ហាញជាសត្យានុម័តឲ្យឃើញអំពីការវិវឌ្ឍន៍រីកចម្រើននៃសង្គមជាតិ ដូច្នេះតាមរយៈនេះ សូមឱ្យព្រះសង្ឃនិងគណៈកម្មការវត្ត បន្តកៀរគររកជំនួយដើម្បីកសាងសមិទ្ឋផលថ្មីៗបន្ថែមទៀត ។
ព្រះតេជគុណ ព្រះធម្មសេរី ជុំ គឹមឡេង ព្រះមេគណខេត្តសៀមរាប មានថេរដីកាថា៖ សមិទ្ឋផលទាំងនេះកើតឡើងដោយសារប្រទេសជាតិយើងមានសន្តិភាពគ្រប់គ្រាន់ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបាននាំឱ្យប្រទេសជាតិយើងមានសុខសន្តិភាព ស្ថេរភាព និងភាពរីកចម្រើនសម្បូរសប្បាយលើគ្រប់វិស័យ ខណៈដែលព្រះពុទ្ឋសាសនា ត្រូវបានចែងនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជាថា ជាសាសនារបស់រដ្ឋ ហើយវត្តអារាមដែលមានការរីកចម្រើន គឺជាកត្តាឆ្លុះបង្ហាញឲ្យឃើញអំពីជីវភាពប្រសើរឡើងនៃប្រជាពុទ្ធបរិស័ទនៅក្នុងតំបន់ចំណុះជើងវត្តនោះ ។
ព្រះធម្មសេរី ជុំ គឹមឡេង មានថេរដីកាបន្ថែមថា យើងមានឱកាសធ្វើបុណ្យទានផ្សេងៗ រួមគ្នាកសាងសមិទ្ឋផលនានាទោះនៅទីជនបទដាច់ស្រយាលក្តី បានដោយគ្មានក្តីបារម្ភ ក៏អាស្រ័យដោយប្រទេសយើងមានសុខសន្តិភាពពេញលេញ ហេតុនេះសូមប្រជាពុទ្ឋបរិស័ទ ត្រូវរួមគ្នារក្សាសុខសន្តិភាពនេះឱ្យស្ថិតនៅជានិរន្ត កុំឱ្យបាត់បង់ដោយប្រការដទៃឡើយ ទុកសម្រាប់កូនចៅរបស់យើងជំនាន់ក្រោយៗ ទៀត ពីព្រោះប្រទេសយើងធ្លាប់ទទួលរងនូវភាពល្វីងជូរចត់ កំសត់អត់ឃ្លាន ទុក្ខសោកវេទនារាប់សិបឆ្នាំរកអ្វីមករៀបរាប់ពុំបានអស់ទេ ជាពិសេសអនុស្សាវរីយ៍ដ៍សែនជូរចត់ក្នុងរបបកម្ពុជាប្រជាធិបតេយ្យ ៣ឆ្នាំ៨ខែ២០ថ្ងៃ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
