នៅព្រឹកថ្ងៃទី២៤ ខែតុលា ឆ្នាំ២០១៩នេះ លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំក្រុមការងារចម្រុះអាជ្ញាធរខេត្តចុះពិនិត្យផ្លូវ និងបណ្ដាញលូទឹកចំនួន ៣ខ្សែ ក្នុងចំណោមផ្លូវ និងបណ្ដាញលូទឹកចំនួន ១៧ខ្សែដែលត្រូវសាងសង់ចាក់បេតុង និងដាក់លូបង្ហូរទឹកចេញពីក្រុង ដែលគម្រោងនេះនឹងបើកការដ្ឋានសាងសង់ក្នុងរយៈពេលឆាប់ៗ ខាងមុខ និងដោយមានការចូលរួមពីលោកប្រធានមន្ទីរ-អង្គភាពពាក់ព័ន្ធ ចៅសង្កាត់ មេភូមិ និងប្រជាពលរដ្ឋក្នុងមូលដ្ឋានផងដែរ ។
លោក ពិន ប្រាកដ បានលើកឡើងថា ប្រព័ន្ធហេដ្ឋារចនាសម្ព័ន្ធ គឺវិស័យអាទិភាពមួយ ក្នុងចំណោមវិស័យអាទិភាពធំៗ និងជាសរសៃឈាមសេដ្ឋកិច្ចដ៏ចម្បងរបស់ជាតិ ដើម្បីការងារអភិវឌ្ឍន៍ឲ្យមានការរីកចម្រើនលើគ្រប់វិស័យ ជាពិសេសដើម្បីធ្វើឲ្យរាជធានី ខេត្ត នីមួយៗតភ្ជាប់បណ្ដាញហេដ្ឋារចនាសម្ព័ន្ធកាន់តែប្រសើរឡើង ក្នុងនោះដើម្បីរៀបចំក្រុងសៀមរាបឲ្យមានសោភ័ណ្ឌភាព សណ្ដាប់ធ្នាប់ របៀបរៀបរយ បញ្ជៀសការកកស្ទះចរាចរណ៍ និងចៀសផុតពីការកកស្ទះប្រព័ន្ធលូរបង្ហូរទឹក ទឹកភ្លៀង ទឹកជំនន់ និងដើម្បីបង្ហូរទឹកចេញពីក្រុង និងធ្វើឲ្យទីក្រុងស្រស់ស្អាតសមជាទីក្រុងវៃឆ្លាត (Siem Reap Smart City )ស្រមតាមយុទ្ធសាស្ដ្រទីក្រុងវៃឆ្លាតកម្ពុជា ។
លោក ពិន ប្រាកដ បានឲ្យដឹងទៀតថា ក្នុងឆ្នាំ២០១៩នេះ រដ្ឋបាលខេត្តមានគម្រោងសាងសង់ និងជួសជុលហេដ្ឋារចនាសម្ព័ន្ធចំនួន ១៧ខ្សែ ហើយគម្រោងនេះទទួលម៉ៅការសាងសង់ និងជួសជុលដោយ កម្លាំងកងវិស្វកម្ម ឯកឧត្តម សៀង ណាំ តំណាងរាស្ដ្រមណ្ឌលសៀមរាប ។
សូមបញ្ជាក់ ផ្លូវ និងបណ្ដាញលូទឹកចំនួន ០៣ខ្សែ ក្នុងចំណោមផ្លូវ និងបណ្ដាញលូចំនួន ១៧ខ្សែ ដែលត្រូវសាងសង់ និងជួសជុលក្នុងឆ្នាំ២០១៩នេះដែរ រួមមាន ១-សាងសង់ផ្លូវបេតុង និងដាក់លូបណ្ដោយផ្លូវមុខកាត់ ០១ម៉ែត្រ ភូមិតាវៀន សង្កាត់សាលាកំរើក ពីផ្លូវក្រោយផ្សារលើ កាត់ផ្ទះតាអុច ដល់ផ្លូវវាងក្រុង មានប្រវែង ១២៥០ម៉ែត្រ ទទឹង ១០ម៉ែត្រ។ ផ្លូវទី២-សាងសង់ផ្លូវបេតុង និងដាក់លូបណ្ដោយផ្លូវមុខកាត់ ០១ម៉ែត្រ ភូមិចុងកៅស៊ូ សង្កាត់ស្លក្រាម ពីផ្លូវជាតិលេខ ៦ ចំណុចភ្លើងស្តុប ស្មាយលីង ដល់ផ្លូវផ្ទះតាអុច ប្រវែង ៣៥០ម៉ែត្រ ទទឹង ០៨ម៉ែត្រ និងទី៣-សាងសង់ផ្លូវបេតុង និងដាក់លូបណ្ដោយផ្លូវមុខកាត់ ០.៨ម៉ែត្រ ភូមិតាវៀន សង្កាត់សាលាកំរើក ពីភោជនីយដ្ឋានស្វាយមាស ដល់ផ្លូវវាងក្រុង ប្រវែង ៨៨៥ម៉ែត្រ ទទឹង០៧ម៉ែត្រ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
