នៅព្រឹកថ្ងៃទី២៤ ខែតុលា ឆ្នាំ២០១៩នេះ ក្រុមការងារកាកបាទក្រហមកម្ពុជាខេត្ត និងអ្នកស្ម័គ្រចិត្ត សហការជាមួយយុវជនកាកបាទក្រហមកម្ពុជាខេត្តសៀមរាប ដឹកនាំដោយលោកស្រី សំ សាវ៉ាង មន្ត្រីគម្រោងសុវត្ថិភាពចរាចរណ៍ សាខាកាកបាទក្រហមកម្ពុជាខេត្តសៀមរាប យុវជនស្ម័គ្រចិត្តរបស់កាកបាទក្រហមកម្ពុជាខេត្ត សរុបចំនួន ២២នាក់ ស្រី ១៦នាក់ បានផ្សព្វផ្សាយស្ដីពី ពិការភាព និងសុវត្ថិភាពចរាចរណ៍នៅក្នុងវិទ្យាល័យ ហ៊ុន សែន ស្វាយធំ ឃុំកណ្ដែក ស្រុកប្រាសាទបាគង ដែលមានសិស្សានុសិស្សអ្នកចូលរួមសរុបចំនួន៣៧៦ នាក់ស្រី២១៥នាក់ (ពិការ៣នាក់) ក្នុងគោលបំណងចូលរួមកាត់បន្ថយអត្រាការស្លាប់ របួស ពិការដោយគ្រោះថ្នាក់ចរាចរណ៍ និងលើកកម្ពស់សិទ្ធជនពិការ ជាពិសេសនៅពេលបើកបវេសនកាលនាពេលខាងមុខនោះ ។
លោកស្រី សំ សាវ៉ាង បានឱ្យដឹងថា បច្ចុប្បន្នគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានសម្លាប់មនុស្សជារៀងរាល់ថ្ងៃ បានធ្វើឱ្យបាត់បង់ធនធានមនុស្ស បន្សល់ទុកនូវកុមារកំព្រា ស្ត្រី មេម៉ាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវ មិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរ ។
ជាមួយគ្នានោះដែរលោកស្រី សំ សាវ៉ាង ក៏បានធ្វើការសំណូមពរដល់អ្នកបើកបរយាយន្តគ្រប់ប្រភេទ ពេលមកដល់ជិតសាលារៀន មន្ទីរពេទ្យ និងទីប្រជុំជននានា សូមមេត្តាបន្ថយល្បឿនផង ដើម្បីរួមគ្នាកាត់បន្ថយ ការស្លាប់និងរបួសដោយសារគ្រោះថ្នាក់ចរាចរណ៍ ព្រមទាំងបានជំរុញដល់ប្រជាពលរដ្ឋដែលបានចូលរួម សូមជួយណែនាំដល់កូនចៅក្នុងសមាជិគ្រួសារ និងអ្នកជិតខាង ឱ្យគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ជាដើម ដើម្បីចៀសវាងនៅការគ្រោះថ្នាក់ជាយថាហេតុណាមួយបានកើតឡើង ។
គួរឲ្យដឹងដែរថា ក្នុងឱកាសនោះដែរ ក្រុមការងារក៏បានធ្វើការបង្រៀនពាក់មួកសុវត្ថិភាពនៅពេលប្រជុំដងទង់ជាតិ និងអប់រំផ្សព្វផ្សាយតាមថ្នាក់រៀន គឺបានបង្រៀនពីរបៀបកុមារឆ្លងផ្លូវដោយសុវត្ថិភាព ហើយមានចែកខិតប័ណ្ណសុវត្ថិភាពចរាចរណ៍ ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ វិធីពាក់មួកសុវត្ថិភាព ឱ្យបានត្រឹមត្រូវ ចែកខិតប័ណ្ណស្តីពីស្លាកសញ្ញាចរាចរណ៍សំខាន់ៗនៃសុវត្ថិភាព និងស្ទិកខ័រចំណាំងផ្លាតជនពិការ ដូចទៅនឹងពាក្យស្លោកលើកឡើងថា ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍ ៕
អត្ថបទ និង រូបភាព ៖ស៊ាន សុផាត
កែសម្រួល៖ អ៊ុន ណារាជ្យ
