នាព្រឹកថ្ងៃទី២៤ ខែតុលា ឆ្នាំ២០១៩នេះ នៅសាលាខេត្តសៀមរាបមានបើកអង្គសិក្ខាសាលាមួយស្តីពី ការរៀបចំផែនការសកម្មភាព និងថវិកាឆ្នាំ២០២០ ក្នុងក្របខ័ណ្ឌគម្រោងកាត់បន្ថយភាពក្រីក្រ និង អភិវឌ្ឍន៏កសិកម្មខ្នាតតូច តំបន់ទន្លេសាប ជំហាន២ ក្រោមអធិបតីភាពលោក លី សំរឹទ្ធ អភិបាលរងនៃគណៈអភិបាលខេត្ត ដោយមានការចូលរួម ពីអគ្គនាយកដ្ឋានកសិកម្ម មន្ត្រីហិរញ្ញវត្ថុ រួមទាំងអស់លោក លោកស្រី ក្រុមការងារគម្រោងថ្នាក់ជាតិ ទីប្រឹក្សាគម្រោង សេវាករទី៦ ,សេវាករទី៧ និងទី៨ ខេត្ត ក្រុង ស្រុក និង ឃុំ សង្គាត់គោលដៅចូលរួមផងដែរ ។
លោក លី សំរឹទ្ធ មានប្រសាសន៍ថា អង្គសិក្ខាសាលានាពេលនេះ គឺមានគោលបំណងសំខាន់ ដើម្បីធ្វើការពិភាក្សា និង ឈានទៅដល់ការព្រមព្រៀងមួយ ជាមួយអ្នកពាក់ព័ន្ធ សមខាន់ៗ ដែលក្រុមការងារគម្រោងខេត្ត ក្រុង ស្រុក មេឃុំ ចៅសង្កាត់គោលដៅទាំងអស់របស់គម្រោង ទីប្រឹក្សា គម្រោង សេវាករទី៦ ,សេវាករទី៧ និង សមាគមកែលម្អជីវភាពកសិករ ទៅលើវិសាលភាព សកម្មភាពការងារដែលនឹង ត្រូវអនុវត្តបន្ត សម្រាប់ឆ្នាំ២០២០ក្នុងខេត្តសៀមរាប ។
លោក លី សំរិទ្ធ មានប្រសាសន៍បន្តទៀតថា ក្នុងនោះដែរ អង្គសិក្ខាធ្វើឡើងដើម្បីធ្វើការបូកសរុប សេចក្តីព្រាងផែនការការងារ ដែលបានរៀបចំថ្នាក់ខេត្ត បង្កើតផែនការសកម្មភាព និង ថវិកាគម្រោងរួមមួយ សម្រាប់ឆ្នាំ២០២០ ដែលនឹងត្រូវបានពិនិត្យ ពិភាក្សានិងព្រមព្រៀងគ្នា ។ ហើយក្នុងនោះដែរ ដើម្បីឆ្លើយតបទៅនឹងគោលបំណងរបស់អង្គសិក្ខាសាលានេះ គឺសិក្ខាកាមទាំងមូលត្រូវចាំបាច់ធ្វើការពិនិត្យមើលឡើងវិញ ពីវឌ្ឍនភាពការងារ ដែលបានអនុវត្តនៅក្នុង កំឡុងឆ្នាំ២០១៩ ដោយធៀបជាមួយផែនការដែលបានគ្រោងទុក ។ ម្យ៉ាងទៀតក៏ត្រូវលើពីបញ្ហាប្រឈមនានា និងធ្វើការ ពិនិត្យ ពិភាក្សាគ្នាឲ្យបានស៊ីជម្រៅ ដើម្បីឈានទៅដល់ការព្រមព្រៀង ឯកភាពគ្នាលើកទៅក្នុងផែនការសកម្មភាព សម្រាប់អនុវត្តឆ្នាំ២០២០បន្ត ។
លោកអភិបាលរងខេត្ត ក៏បានលើកឡើងនូវអនុសាសន៍ និង បទពិសោធន៍មួយចំនួន ដែលក្រុមការងារខេត្ត បានអនុវត្តកន្លងមក ទៅលើគម្រោងកាត់បន្ថយភាពក្រីក្រ និង អភិវឌ្ឍន៏កសិកម្មខ្នាតតូច តំបន់ទន្លេសាប ក្នុងខេត្ត ដោយមួយចំនួនទទួលបានលទ្ធផលល្អ និង មួយចំនួនក៏ជួបនូវបញ្ហាប្រឈម ។ ហើយលោកក៏ បានធ្វើការថ្លែងអំណរគុណចំពោះរាជរដ្ឋាភិបាលកម្ពុជា ធនាគារអភិវឌ្ឍន៍អាស៊ី និង មូលនិធិអន្តរជាតិ សម្រាប់អភិវឌ្ឍន៍កសិកម្ម ដែលបានផ្តល់ហិរញ្ញប្បទានកម្ចីដ៏ធំធេង តាមរយៈ គម្រោងកាត់បន្ថយភាពក្រីក្រ និង អភិវឌ្ឍន៍កសិកម្មខ្នាតតូត តំបន់ទន្លេសាប ។
លោកអភិបាលរងខេត្ត ក៏សង្ឃឹមផងដែរថា តាមរយៈការបង្ហាញនូវប្រធានបទខាងលើ និង ផ្តល់ឲ្យសិក្ខាកាមទាំងអស់បានយល់ច្បាស់ពីផែនការ សកម្មភាពការងារ និង ផែនការថវិកា ដែលត្រូវលើកយកទៅអនុវត្តសម្រាប់ឆ្នាំ២០២០ ព្រមទាំងបានជម្រុញ និង ណែនាំដល់ក្រុមការងារថ្នាក់ខេត្ត ក្រុង ស្រុក និង ឃុំសង្កាត់ និង ទីប្រឹក្សាបច្ចេកទេសគម្រោង ទាំងអស់ ត្រូវមានកិច្ចសហការគ្នាល្អ ជាមួយភ្នាក់ងារអនុវត្តគម្រោងគ្រប់ជាន់ថ្នាក់ ដោយធានាការអនុវត្តគម្រោងប្រកប ដោយតម្លាភាព គណនេយ្យភាព និង ទទួលបានលទ្ធផលផ្លែផ្កា ស្របទៅតាមផែនការបានគ្រផងទុក ដើម្បីបង្កើនកម្រិត ជីវភាពរស់នៅរបស់ប្រជាពលរដ្ឋឲ្យកាន់តែល្អប្រសើរទ្វេរឡើង និង ដើម្បីជម្រុញការអនុវត្តគម្រោងឲ្យទទួលបានលទ្ធផលជាផ្លែផ្កា ក្នុងការឆ្លើយតបបានទាន់ពេលទៅតម្រូវការរបស់ប្រជាពលរដ្ឋក្នុងមូលដ្ឋាន ។
គួរឲ្យដឹងដែរថា អង្គសិក្ខាសាលានាពេលនេះ ក៏មានការធ្វើបទបង្ហាញ ដោយផ្តោតលើប្រធានបទសំខាន់ៗ គឺពិនិត្យឡើងវិញពីវឌ្ឍនភាពដែល បានអនុវត្តក្នុងឆ្នាំ២០១៩ ធៀបនឹងផែនការ , បង្ហាញពីគម្រោងថវិកាប្រចាំឆ្នាំ សម្រាប់សមាសភាពនីមួយៗ, ពិភាក្សាសកម្មភាពនានា និង គោលដៅតាមសមាសភាព ក្នុងផែនការប្រចាំឆ្នាំ២០២០ និង ពិភាក្សាពីសេចក្តីព្រាងថវិកា សម្រាប់ឆ្នាំ២០២០ ដោយផ្អែកលើសកម្មភាពខេត្តបានឯកភាពគ្នា ៕
អត្ថបទ និង រូបភាព ៖ ម៉ី សុខារិទ្ធ
កែសម្រួល៖ អ៊ុន ណារាជ្យ
