នៅថ្ងៃទី ២៣ ខែ តុលា ឆ្នាំ២០១៨ ក្រុមគណៈកម្មការចម្រុះរបស់ស្រុកប្រាសាទបាគង រួមមានមន្ត្រីជំនាញភូមិបាលស្រុក មេឃុំ មេភូមិ និង កម្លាំងនគរបាលប៉ុស្តិ៍រដ្ឋបាល ដឹកនាំដោយលោក នឹម សុវណ្ណ អភិបាលស្តីទីស្រុកប្រាសាទបាគង ខេត្តសៀមរាប ដោយមានការចូលរួមពីសំណាក់លោកវរៈសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្ត និង លោកឧកញ៉ា ង៉ោ ស្រ៊ុន ម្ចាស់ដីមានទំនាស់ បានចុះធ្វើការត្រួតពិនិត្យជាក់ស្តែង នូវរាល់ទីតាំងផ្លូវទាំង៥ខ្សែ ដែលសាលាខេត្តបានសម្រេចរក្សាទុក និង បើកផ្លូវជាសាធារណៈ គឺស្ថិតនៅភូមិល្អក់ , ភូមិត្រពាំងទឹម , ភូមិឃុនមោឃ និង ភូមិត្រាង ក្នុងឃុំកណ្តែក ស្រុកប្រាសាទបាគង ដែលប្រជាពលរដ្ឋចំនួន១៨៥គ្រួសារ នៅភូមិល្អក់ ភូមិត្រពាំងទឹម ភូមិឃុនមោឃ និងត្រាង ឃុំកណ្តែក បានធ្វើការចោទប្រកាន់ថា អភិបាលខេត្តសៀមរាប កាងឲ្យលោកឧកញ៉ា ង៉ោ ស្រ៊ុន ប្លន់យកផ្លូវសាធារណៈ និង ដីប្រជាពលរដ្ឋ នៅឃុំកណ្តែកធ្វើជាកម្មសិទ្ធិ ។
លោក នឹម សុវណ្ណ អភិបាលស្តីទីស្រុកប្រាសាទបាគង បានមានប្រសាសន៍ថា ឆ្លងតាមការចុះត្រួតពិនិត្យ និង ធ្វើការស្វែងរកនូវការពិត ដើម្បីជាផលប្រយោជន៍ទាំងសង្ខាងនោះ ក្រុមការងារចម្រុះបានចុះធ្វើការអង្កេត និង វាស់វែងរាល់ដីផ្លូវដែលប្រជាពលរដ្ឋទាំង១៨៥គ្រួសារ ធ្វើការចោទប្រកាន់លោកឧកញ៉ា ង៉ោ ស្រ៊ុន ថារំលោភយកដីផ្លូវសាធារណៈ ដែលប្រជាពលរដ្ឋធ្វើដំណើរនោះ ហើយក្រុមការងារបានខិតខំស្វែងរកបងប្អូនប្រជាពលរដ្ឋទាំង ១៨៥គ្រួសារ ដែលបានដាក់ពាក់បណ្តឹងតវ៉ានោះ ប៉ុន្តែរកឃើញប្រជាពលរដ្ឋចំនួនតែ០៧គ្រួសារប៉ុណ្ណោះ ជំទាស់មិនអនុញ្ញាតឲ្យបើកផ្លូវ និង ប្រជាពលរដ្ឋចំនួន០៣គ្រួសារផ្សេងទៀត ដែលមានការប្តឹងផ្តល់ជាមួយលោកឧកញ៉ា ង៉ោ ស្រ៊ុន រឿងទិញដីធ្លីទំហំជាង៣ហិកតា ។
លោក នឹម សុវណ្ណ បានបញ្ជាក់ទៀតថា ក្នុងចំណោមផ្លូវទាំង៥ខ្សែ ដែលសាលាខេត្ត បានសម្រេចរក្សាទុក និង បើកផ្លូវជាសាធារណៈនោះ គឺផ្លូវចំនួន៤ខ្សែ បានដំណើរការជាប្រកតី លើកលែងតែផ្លូវ១ខ្សែ ស្ថិតនៅក្នុងភូមិល្អក់ ត្រូវប្រជាពលរដ្ឋ៧គ្រួសារ ជំទាស់មិនអនុញ្ញាតឲ្យបើកផ្លូវ រួមជាមួយនឹងបណ្ដឹងប្រជាពលរដ្ឋ៣គ្រួសារនៅភូមិត្រពាំងទឹម ដែលមានការប្តឹងផ្តល់ជាមួយលោកឧកញ៉ា ង៉ោ ស្រ៊ុន រឿងទិញដីធ្លីហំជាង៣ហិកតា ខណៈរឿងដីទាំងពីរកន្លែនងនេះ គឺកំពុងស្ថិតនៅក្នុងចំណាត់របស់តុលាការនៅឡើយ ដូច្នេះចំពោះបញ្ហាព័ត៌មាន ដែលបានផ្សព្វផ្សាយនៅតាមបណ្ដាញទំនាក់ទំនងសង្គម ហ្វែសប៊ុក របស់ឈ្មោះ William Guang ដោយបានចោទប្រកាន់ចំពោះអភិបាលខេត្តសៀមរាប កាងឲ្យលោកឧកញ៉ា ង៉ោ ស្រ៊ុន ប្លន់យកផ្លូវសាធារណៈ និង ដីប្រជាពលរដ្ឋ នៅឃុំកណ្តែកធ្វើជាកម្មសិទ្ធិ គឺខុសទៅនឹងការពិតទាំងស្រុង ។
បើតាមការបញ្ជាក់របស់ឈ្មោះ មួក សំ ភេទប្រុស អាយុ ៥៣ឆ្នាំ និង ឈ្មោះ សាន់ សែត ភេទ ប្រុស អាយុ ៤១ឆ្នាំ បានឲ្យដឹងថា ការសុំឲ្យប្រជាពលរដ្ឋផ្តឹតមេដៃនោះ គឺធ្វើឡើងនៅឆ្នាំ២០១៧ ដើម្បីស្នើសុំដល់អាជ្ញាធរធ្វើផ្លូវក្នុងភូមិចំនួន ៣ខ្សែ តែបច្ចុប្បន្នបានធ្វើរួចរាល់បាន២ខ្សែហើយ ហើយស្នាមមេដៃទាំងនេះ ត្រូវបានជនអាណាមិក បានយកទៅធ្វើការ បង្ហោះនៅតាមបណ្ដាញទំនាក់ទំនងសង្គម ដោយបានចោទប្រកាន់យ៉ាងធ្ងន់ចំពោះអភិបាលខេត្តសៀមរាប កាងឲ្យលោកឧកញ៉ា ង៉ោ ស្រ៊ុន ប្លន់យកផ្លូវសាធារណៈ និង ដីប្រជាពលរដ្ឋ នៅឃុំកណ្តែក ធ្វើជាកម្មសិទ្ធិ គឺជារឿងមិនពិត ដែលជនទាំងនោះ បានប្រឌិតព័ត៌មាន ដើម្បីបំពុលបរិយាកាសសង្គម ។
លោកឧកញ៉ា ង៉ោ ស្រ៊ុន បានបញ្ជាក់ឲ្យដឹងផងដែរថា នូវរាល់បញ្ហាដែលប្រជាពលរដ្ឋ បានចោទប្រកាន់ចំពោះលោកនោះ គឺមិនបានពាក់ព័ន្ធទៅនឹងអភិបាលខេត្តសៀមរាបឡើយ ហើយម្យ៉ាងទៀត ក្នុងករណីដែលដីរបស់លោក មានការប៉ះពាល់ផ្លូវពិតប្រាកដនោះ លោកនឹងកាត់ជូនធ្វើជាផ្លូវសាធារណៈ ព្រមទាំងធ្វើផ្លូវជូនទៅតាមសំណូមពររបស់បងប្អូនទាំង១៨៥គ្រួសារ ដែលបានផ្តឹតមេដៃប្តឹងតវ៉ា ប៉ុន្តែសូមឲ្យម្ចាស់បណ្តឹងទាំង១៨៥គ្រួសារនេះ មកបង្ហាញមុខ តើពិតជាម្ចាស់បណ្តឹងមែនឬមិនមែន ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ទំនាស់ដីធ្លី
