ឯកឧត្តម សាន្ត វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានថ្លែងនៅក្នុងសិក្ខាសាលាផ្សព្វផ្សាយស្តីពីការប្រកាសដាក់ប្រើប្រាស់ប្រព័ន្ធព័ត៌មានគ្រប់គ្រងសិស្សអាហារូបករណ៍និងណែនាំពីរបៀបប្រើប្រាស់ប្រព័ន្ធនៅខេត្តសៀមរាបនៅព្រឹកថ្ងៃទី០៧ខែវិច្ឆិកាឆ្នាំ២០១៩នេះថា នៅក្នុងរយៈពេល២ឆ្នាំកន្លងមកនេះ ក្រសួងអប់រំ យុវជន និងកីឡាបានសហការជាមួយកម្មវិធីស្បៀងអាហារពិភពលោកនៃអង្គការសហប្រជាជាតិ បានបង្កើតប្រព័ន្ធគ្រប់គ្រងព័ត៌មានមួយ ដើម្បីពិនិត្យតាមដានទៅលើការអនុវត្តផ្តល់អាហារូបករណ៍ជូនសិស្ស ដោយបានចាប់ផ្តើមអនុវត្តការប្រើប្រាស់ដំបូងនៅខេត្តសៀមរាប ខេត្តកំពង់ធំ ខេត្តបាត់ដំបង។
ឯកឧត្តមបានបន្តថា បច្ចុប្បន្ននេះចំនួនសិស្សចេះតែច្រើនឡើងៗ ហើយបែបផែននៃការគ្រប់គ្រង គឺកាន់តែមានភាពពិបាក គោលនយោបាយរបស់យើងកាន់តែមានភាពស៊ីជំម្រៅជាងមុន ដូច្នេះយើងចាំបាច់ត្រូវសម្រេចជ្រើសរើសឧបករណ៍មួយមកជំនួយតាមបែបឌីជីថល ហើយការប្រើប្រាស់ប្រព័ន្ធព័ត៌មានឌីជីថលគ្រប់គ្រងសិស្សអាហារូបករណ៍នេះ គឺជាចំណែកមួយដ៏សំខាន់ក្នុងការអភិវឌ្ឍវិស័យអប់រំនៅកម្ពុជា ខណៈដែលក្រសួងអប់រំកម្ពុជាមានគោលដៅឈានឆ្ពោះទៅធ្វើការអប់រំឌីជីថល និងជាចំណែកមួយជំរុញកម្ពុជាឱ្យមានការភិវឌ្ឍសេដ្ឋកិច្ចបែបឌីជីថលផងដែរ។ ឯកឧត្តមបានបញ្ជាក់ថា បន្ទាប់ការប្រើប្រាស់ប្រព័ន្ធព័ត៌មានគ្រប់គ្រងសិស្សអាហារូបករណ៍នៅខេត្តទាំងបីនេះជោគជ័យក្រសួងអប់រំក៏មានគោលដៅពង្រីកកម្មវិធីនេះឱ្យបានទូទាំងប្រទេសផងដែរ។
លោក កែវ គ្រឹស្នា មន្ត្រីកម្មវិធីស្បៀងអាហារពិភពលោក បានលើកឡើងដែរថា កម្មវិធីស្បៀងអាហារពិភពលោកបាននិងកំពុងគាំទ្រដល់ការបង្កើត និងប្រើប្រាស់ដំណោះស្រាយបែបឌីជីថល ដើម្បីបំពេញទៅតាមតម្រូវការជាក់ស្ដែងរបស់ដៃគូររាជរដ្ឋាភិបាល ដែលទទួលបន្ទុកលើកិច្ចការអប់រំ គ្រប់គ្រងគ្រោះមហន្តរាយ សន្តិសុខស្បៀង និងអាហារូបត្ថម្ភ ជាដើម។ ក្នុងនោះដែរ កម្មវិធីស្បៀងអាហារពិភពលោកក៏បាននិងកំពុងរួមចំណែកដល់ការពង្រឹងសមត្ថភាពគ្រប់គ្រងព័ត៌មាន និងហេដ្ឋារចនាសម្ព័ន្ធព័ត៌មានថ្នាក់ជាតិ ដោយសហការយ៉ាងជិតស្និទ្ធជាមួយក្រសួងពាក់ព័ន្ធនានា ដូចជា ក្រសួងអប់រំ យុវជន និងកីឡា គណៈកម្មាធិការជាតិគ្រប់គ្រងគ្រោះមហន្តរាយ ក្រសួងផែនការ ក្រសួងកសិកម្ម ក្រសួងប្រៃសណីយ៍ និងទូរគមនាគមន៍ ជាដើម។
ចំពោះក្រសួងអប់រំយុវជននិងកីឡា ដោយបានរចនានិងអភិវឌ្ឍប្រព័ន្ធព័ត៌មានគ្រប់គ្រងសិស្សអាហារូបករណ៍នៅបឋមសិក្សា ទៅតាមតម្រូវការជាក់ស្តែងរបស់អ្នកប្រើប្រាស់នៅថ្នាក់ជាតិនិងថ្នាក់ក្រោមជាតិ ដោយចាប់ផ្តើមអនុវត្តការប្រើប្រាស់ដំបូងនៅខេត្តសៀមរាប ខេត្តកំពង់ធំ ខេត្តបាត់ដំបង។ ហើយប្រព័ន្ធគ្រប់គ្រងព័ត៌មាននេះត្រូវបានអភិវឌ្ឍឡើងដោយផ្អែកលើបច្ចេកវិទ្យាកូដចំហ(Open Source) ចុងក្រោយ ស្របតាមគោលការណ៍របស់ក្រសួងអយក ហើយងាយស្រួលសម្រាប់អ្នកអភិវឌ្ឍកម្មវីធីកុំព្យូទ័ររបស់ក្រសួងយកទៅអភិវឌ្ឍបន្ត និង បង្កើនវិសាលភាពនៃការប្រើប្រាស់។ពិសេសប្រព័ន្ធនេះត្រូវបានអភិវឌ្ឍឡើងដោយមាន Application Programming Interface (API) ដើម្បីចែកចាយទិន្នន័យសំខាន់ៗ របស់សិស្សអាហារូបករណ៍ ទៅកាន់ប្រព័ន្ធគ្រប់គ្រងព័ត៌មានដ៏ទៃទៀតរបស់ក្រសួងអប់រំ ដោយស្វ័យប្រវត្តិ ងាយស្រួល និងរហ័ស។ ដូចជាការចែកចាយទិន្នន័យអំពីលទ្ធផលសិក្សារបស់សិស្សអាហារូបករណ៍ទៅកាន់ប្រព័ន្ធEMIS ហិរញ្ញវត្ថុប្រសួងជាដើម៕
អត្ថបទនិងរូបភាព៖ ភ្នាក់ងារព័ត៌មាន សៀមរាប
